ឃាត់ខ្លួនជនជាតិចិនម្នាក់លាក់គ្រឿងញៀនដោយរុំជាប់នឹងខ្លួនជិត២គីឡូនៅព្រលានយន្តអន្តរជាតិភ្នំពេញ
ភ្នំពេញ៖ បុរសជនជាតិចិនម្នាក់បានលួចលាក់គ្រឿងញៀនក្នុងកញ្ចប់ស្បោង ដោយរុំជាប់នៅនឹងភ្លៅទាំងសងខាង និងដងខ្លួនប្រមាណជិត២គីឡូក្រាមគោលបំណងបម្រុងនាំចេញទៅក្រៅប្រទេសមិនទាន់បានចេញផងក៏ត្រូវកម្លាំងនគរបាលអន្ដោប្រវេសន៍ប្រចាំការនៅព្រលានយន្តហោះអន្ដរជាតិភ្នំពេញ សហការជាមួយកម្លាំងគយប្រចាំនៅព្រលានយន្តហោះឃាន់ខ្លួនបានតែម្ដង។
ពាក់ព័ន្ធករណីឃាត់ខ្លួនជនជាតិចិនខាងលើនេះមន្ដ្រីនគរបាលជំនាញ បានបញ្ជាក់ឱ្យដឹងនៅរសៀលថ្ងៃទី២២ ខែតុលា ឆ្នាំ២០១៨នេះ ឲ្យដឹងថា បុរសជនជាតិចិននេះ មានឈ្មោះ YU WEI YI កាន់លិខិតឆ្លងដែនលេខៈ462923។
មន្ដ្រីនគរបាលបានបន្ថែមថា៖មុនពេលកើតហេតុជនសង្ស័យខាងលើនេះបានធ្វើដំណើរចេញពីប្រទេសកម្ពុជាគោលបំណងចេញក្រៅប្រទេស តែត្រូវកម្លាំងនគរបាលអន្ដោប្រវេសន៍ប្រចាំការនៅព្រលានយន្តហោះអន្ដរជាតិភ្នំពេញ សហការជាមួយកម្លាំងគយ សង្ស័យថា មានសារធាតុញៀននាំចេញខុសច្បាប់ក៏ត្រូវបានឃាត់ខ្លួនភ្លាមៗ។
មន្ដ្រីនគរបាលជំនាញបានបញ្ជាក់ថា៖ ក្រោយពេលត្រួតពិនិត្យជាក់ស្ដែង ឃើញមានសារធាតុញៀនលាក់ ក្នុងកញ្ចប់ស្បោងរុំជាប់ នៅនឹងភ្លៅទាំងសងខាង និងដងខ្លួន សរុបចំនួន៤កញ្ចប់ ជាគ្រឿងញៀនប្រភេទ METHAMPHETAMINE ដែលមានទម្ងន់ចំនួន១,៩៩៤.៧២ ក្រាម (មួយពាន់ប្រាំបួនរយកៅសិបបួនក្បៀសចិតសិបពីរក្រាម)៕
