គណៈសង្ឃនាយក លើកទឹកចិត្តឲ្យលោក សុខ ទូច ចូលបូសជាបព្វជិត និងខិតខំប្រតិបត្តិតាមផ្លូវព្រះពុទ្ធសាសនា ឲ្យបានជាគំរូដល់អ្នកបូសជាមុនសិន ចាំរិះគន់
ភ្នំពេញ៖ គណៈសង្ឃនាយកនៃព្រះរាជាណាចក្រកម្ពុជា នៅថ្ងៃទី២២ ខែតុលា ឆ្នាំ២០១៨នេះ បានចេញសេចក្តីបំភ្លឺមួយច្បាប់ ផ្ញើទៅកាន់លោកបណ្ឌិត សុខ ទូច ប្រធានរាជបណ្ឌិត្យសភានៃកម្ពុជា ដោយអះអាងថា ការថ្លែងរបស់លោក ធ្វើឲ្យព្រះសង្ឃទូទាំងប្រទេស មិនអាចទទួលយកបានឡើយ។ ការថ្លែងសុន្ទរកថារបស់លោកសុខ ទូច នៅក្នុងសិក្ខាសាលានោះ ធ្វើឲ្យព្រះសង្ឃទូទាំងប្រទេស សម្តែងការមិនពេញព្រះទ័យ ហើយចំណុចមួយចំនួន ពិតជាមិនអាចទទួលយកបានទេ។
ការចេញសេចក្តីបំភ្លឺនេះ ត្រូវបានធ្វើឡើងបន្ទាប់ពីលោកបណ្ឌិត សុខ ទូច កាលពីថ្ងៃទី១៩ ខែតុលា ឆ្នាំ២០១៨ នៅក្នុងសាលាសិក្ខាជាតិស្តីពី សង្គតិភាពព្រះពុទ្ធសាសនា ដើម្បីពង្រីកនិងអភិវឌ្ឍន៍ពុទ្ធចក្រ និងអាណាចក្រ ក្នុងសង្គមកម្ពុជាបច្ចុប្បន្ន បានប្រាប់ឲ្យមន្ត្រីរាជបណ្ឌិត្យសភាកម្ពុជា សហការជាមួយក្រសួងធម្មការ និងសាសនា ដើម្បីស្រាវជ្រាវបង្កើតច្បាប់ស្តីពី វិន័យសង្ឃ។ លោក សុខ ទូច បានបន្តថា មូលហេតុដែលលោកថ្លែងយ៉ាងដូច្នេះ ដោយសារមានព្រះសង្ឃជាច្រើន បានប្រព្រឹត្តខុសពីវិន័យព្រះពុទ្ធសាសនា ហើយលោក បានបន្ថែម ឲ្យពង្រឹងសង្ឃវិន័យ , ព្រះពុទ្ធចេញពីក្នុងវាំង ទៅគង់នៅក្រោមដើមពោធិ៍ ចំណែកយើងឥឡូវចេញចេញពីផ្ទះតូច មកនៅវិឡាកុដិ រួមជាមួយនឹងសម្ភារនិយមទំនើបៗថែមទៀត , រៀនហើយចាំបូស កុំបូសហើយមករៀន , រាជបណ្ឌិត្យសភាកម្ពុជា គ្រោងនឹងសិក្សាស្រាវជ្រាវរៀបចំច្បាប់ គ្រប់គ្រងព្រះសង្ឃបញ្ជូនទៅរដ្ឋសភា។
យោងតាមសេចក្តីបំភ្លឺ របស់គណៈសង្ឃនាយកនៃកម្ពុជា នៅថ្ងៃទី២២ ខែតុលានេះ បានបញ្ជាក់យ៉ាងដូច្នេះថា ការថ្លែងសុន្ទរកថារបស់ឯកឧត្តម នៅក្នុងសិក្ខាសាលានោះ ធ្វើឲ្យព្រះសង្ឃទូទាំងប្រទេស ការសម្តែងការមិនពេញព្រះទ័យ ហើយចំណុចមួយចំនួនពិតជា មិនអាចទទួលយកបាន។
គណៈសង្ឃនាយកនៃកម្ពុជា ការពង្រឹងវិន័យសង្ឃ គឺជាសមត្ថកិច្ចរបស់ស្ថាប័នគណៈសង្ឃនាយក និងថេរសភាពុទ្ធសាសនា ដែលមានភារកិច្ចរៀបចំ ចាត់ចែង និងបកស្រាយលើបញ្ហានេះ។ ទង្វើរបស់ឯកឧត្តមនេះបានរំលោភបំពានយ៉ាងគឃ្លើនមកលើស្ថាប័នគណៈសង្ឃ និងប៉ះពាល់ដល់កិត្តិយសព្រះពុទ្ធសាសនាខ្មែរយ៉ាងធ្ងន់ធ្ងរ។ គណៈសង្ឃនាយកនៃព្រះរាជាណាចក្រកម្ពុជា សង្ឃឹមថា នឹងបានជួបពិភាក្សាជាមួយឯកឧត្តមបណ្ឌិតសភាចារ្យផ្ទាល់ក្នុងពេលដ៏សមស្របណាមួយ ជាក់ជាមិនខាន បើឯកឧត្តមបណ្ឌិតសភាចារ្យមានបេះដូងក៏បរិសុទ្ធចង់ជួយលើកល្ទួយព្រះពុទ្ធសាសនា ពិតប្រាកដមែន៕
ព័ត៌មានលម្អិត សូមអានសេចក្តីបំភ្លឺខាងក្រោមនេះ៖
