ស្លាប់២នាក់ និងបាត់ខ្លួន២នាក់ ករណីរថយន្តដឹកដែក បុកម៉ូតូនៅផ្លូវ ចុះចំណោតតាតៃក្រោម
កោះកុង៖ តៃកុងរថយន្តម្នាក់ អ្នកបើកម៉ូតូម្នាក់ស្លាប់នៅហ្នឹងកន្លែងកើតហេតុ និងអ្នករួមដំណើរ២នាក់ទៀតកំពុងបាត់ខ្លួន បន្ទាប់ពីជួបឧបទ្ទវហេតុរថយន្តដឹកដែកមួយគ្រឿង ចុះចំណោតជាន់ហ្វ្រាំងមិនស៊ី បុកម៉ូតូមួយគ្រឿង ក្រឡាប់បង្កជាអគ្គិភ័យ បានកើតឡើងនៅថ្ងៃទី២៥ ខែតុលា ឆ្នាំ២០១៨ វេលាម៉ោង៩និង១២នាទីព្រឹក នៅចំណុចចំណោតតាតៃក្រោម ចន្លោះគីឡូម៉ែត្រលេខ១៣០-១៣១ ស្ថិតនៅភូមិអន្លង់វ៉ាក់ ឃុំតាតៃក្រោម ស្រុកកោះកុង ខេត្តកោះកុង។
ស្នងការដ្ឋាននគរបាលខេត្តកោះកុង បានឲ្យដឹងថា ករណីគ្រោះថ្នាក់ បង្កឡើងដោយខ្លួនឯង រថយន្តម៉ាក់ ហ៊ីយុនដាយ ប្រភេទសន្តោងរ៉ឺម៉ក ពណ៌ខៀវ ពាក់ផ្លាកលេខ ភ្នំពេញ 3B-8695 នឹងរ៉ឺម៉ក ពាក់ផ្លាកលេខ ភ្នំពេញ 4A-1613 ដឹកដែក មានទិសដៅ ភ្នំពេញ-កោះកុង អ្នកបើកបរ ពុំទាន់ស្គាល់អត្តសញ្ញាណ (ស្លាប់នៅក្រោមរថយន្តកិនសង្កត់ ពុំទាន់យកសាកសពចេញ) ។
ករណីនេះ បណ្តាលមកពីដឹកធ្ងន់ ចុះចំណោទត្រង់ចំណុចផ្លូវកែង ជាន់ហ្វ្រាំងមិនស៊ីបណ្តាលឲ្យក្រឡាប់ឆ្លងចរន្តអគ្គិសនី ឆេះក្បាលរថយន្ត និងបានបុកម៉ូតូធ្វើដំណើរឡើងចំណោទ មានទិសដៅបញ្រ្ចាសគ្នា ម៉ូតូម៉ាក់ វ៉េវអាលហ្វា ពណ៌ ខ្មៅ-ទឹកមាស គ្មានស្លាកលេខ លេខតួRLGA304EX -065451 និងលេខម៉ាស៊ីន GA3IE-0232964 បើកបរដោយឈ្មោះ សាត សុម៉ានុត្យ ភេទប្រុស អាយុ ២១ឆ្នាំ ជាគ្រូបង្រៀននៅឃុំឫស្សីជ្រុំ ស្រុកថ្មបាំង មានទីលំនៅភូមិដងទង់ ឃុំដងទង់ ស្រុកស្មាច់មានជ័យ ខេត្តកោះកុង ទីលំនៅបច្ចុប្បន្នភូមិ០៤ សង្កាត់ដងទង់ ក្រុងខេមរះភូមិន្ទ ខេត្តកោះកុង (ស្លាប់) និងរួមដឹណើរចំនួន ២នាក់ទៀត រកពុំទាន់ឃើញនូវឡើយ។
ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលតាតៃក្រោម សហការជាមួយកម្លាំងអធិការដ្ឋាននគរបាលស្រុកកោះកុង និងកម្លាំងជំនាញការិយាល័យពន្លត់អគ្គិភ័យ នៃស្នងការដ្ឋាននគរបាលខេត្តកោះកុង ចុះអន្តរាគមន៍ទាន់ពេលពេលវេលា បានបាញ់ទឹកពន្លត់ភ្លើងឆេះរថយន្ត បច្ចុប្បន្នកម្លាំងយើងកំពុងតែធ្វើការរុករកជនរងគ្រោះដែរបានបាត់ខ្លួន ។
លោក ស៊ុន ឃៀម អធិការស្រុកកោះកុង បានឲ្យដឹងទៀតថា ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលតាតៃក្រោម សហការជាមួយកម្លាំងអធិការដ្ឋាននគរបាលស្រុកកោះកុង និងកម្លាំងជំនាញការិយាល័យពន្លត់អគ្គិភ័យ នៃស្នងការដ្ឋាននគរបាលខេត្តកោះកុង ជួយអន្តរាគមន៍ទាន់ពេលពេលវេលា បានបាញ់ទឹកពន្លត់ភ្លើងឆេះរថយន្ត។ បច្ចុប្បន្នកម្លាំងជំនាញកំពុងសហការគ្នាស្វែង រកជនរងគ្រោះដែរបានបាត់ខ្លួន៕
