កម្លាំងនគរបាលឡោមព័ទ្ធទតាំងមួយកន្លែង ឃាត់ខ្លួនបានជនសង្ស័យម្នាក់ពាក់ព័ន្ធនឹងក្រុមប៉ុនប៉ងបំផ្ទុះភេរវកម្មនៅកម្ពុជា
ភ្នំពេញ៖ ជនសង្ស័យម្នាក់ ដែលជាបក្ខពួកក្រុម
ប៉ុនប៉ងបំផ្ទុះភេរវកម្ម ប្រឆាំងរាជរដ្ឋាភិបាលនៅកម្ពុជាត្រូវបាននគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ និងនគរបាលខណ្ឌពោធិ៍សែនជ័យបាន សហការជាមួយកម្លាំងនគរបាលនាយកប្រឆាំងភេរវកម្ម និងឧក្រិដ្ឋឆ្លងដែន នៃអគ្គស្នងការដ្ឋាននគរបាលជាតិ ធ្វើការឃាត់ខ្លួន ក្រោយពីធ្វើការស្រាវជ្រាវរហូតឡោមព័ទ្ធផ្ទះមួយកន្លែង ។
កិច្ចប្រតិបត្តិការខាងលើនេះ បានធ្វើឡើងនៅព្រឹកថ្ងៃទី០១ ខែវិច្ឆិកា ឆ្នាំ២០១៨នេះ ស្ថិតត្រង់ចំណុចផ្ទះលេខ១៨៤A ផ្លូវលេខ៦៩R ក្នុងភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក យឹម សារ៉ាន់ ដែលជាអធិការនគរបាលខណ្ឌពោធិ៍សែនជ័យ បានឲ្យដឹង ថា ជនសង្ស័យខាងលើមានឈ្មោះ ប៉េង រ៉ា អាយុ៤៨ឆ្នាំ ជាអ្នកធ្វើការ និងចាំដីឲ្យគេនៅម្តុំពេជ្រនិល គឺជាបក្ខពួកក្រុមចង់បំផ្ទុះភេរវកម្ម ក្នុងចំណោមបក្ខពួកសរុបចំនួន៨នាក់។ ជននេះត្រូវបានចាប់ខ្លួនតាមដីការបស់តុលាការ និងធ្វើឡើងក្រោមបញ្ជាពីនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងស្នងការនគរបាលរាជធានីភ្នំពេញ លោកឧត្តមសេនីយ៍ឯក ស ថេត។
បច្ចុប្បន្ន ជនសង្ស័យត្រូវបានបញ្ជូន ទៅកាន់នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន ដើម្បីចាត់ការតាមនីតិវិធីច្បាប់៕
