សម្តេចតេជោហ៊ុន សែន ប្រាប់ទៅពួកក្រុមប្រឆាំងជ្រុល និយមថា សុខភាព ហ៊ុន សែន បន្តរស់រហូតកម្ចាត់ចោលពួកជ្រុលនិយមអស់ពីកម្ពុជា

ភ្នំពេញ ៖សម្ដេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាបានប្រាប់ទៅពួកក្រុមប្រឆាំងជ្រុលនិយមថា សុខភាព ហ៊ុន សែន បន្តរស់រហូតកម្ចាត់ចោលពួកជ្រុលនិយមអស់ពីកម្ពុជា ទើប ហ៊ុន សែន លាចាកលោកនេះទៅ។ នេះបើយោងតាមផេកហ្វេសប៊ុកផ្លូវការ របស់សម្ដេចតេជោនារសៀលថ្ងៃទី១១ ខែមករា ឆ្នាំ២០២៤។ សម្ដេចតេជោ ហ៊ុន សែន បានថ្លែងបញ្ជាក់ថា៖ មុននេះបន្តិចខ្ញុំទទួលបានព័ត៌មានថាពួកក្រុម ប្រឆាំងជ្រុលនិយមបានបំផុសដំណឹងថាសុខភាពខ្ញុំមិនល្អមកលាងឈាមមិនដឹងថាត្រឡប់ទៅប្រទេសវិញបាន ឬអត់។ យើងសូមប្រាប់ទៅពួកអ្នកវិញថាសុខភាព ហ៊ុន សែន បន្តរស់រហូតកម្ចាត់ចោលពួកជ្រុលនិយមអស់ពីកម្ពុជាទើប ហ៊ុន សែន លាចាកលោកនេះទៅ។ យើងសូមផ្តល់យោបល់ឱ្យពួកអ្នកការពារសុខភាពខ្លួនប្រសើរជាងគិតពីសុខភាព ហ៊ុន សែន។ ក្រោយម៉ោង២ល្ងាច ថ្ងៃស្អែកទី១២ ខែមករា ឆ្នាំ២០២៤ ខ្ញុំនឹងមានវត្តមាននៅកម្ពុជាវិញ សូមពួកជ្រុលនិយមកុំបារម្មពីខ្ញុំ ធ្វើអីគិតពីខ្លួនឯងទៅល្អជាង។»
សម្ដេចតេជោ ហ៊ុន សែន បានថ្លែងបញ្ជាក់ថា ទោះបីខ្ញុំមិនមែនជានាយករដ្ឋមន្ត្រីទៀតក្តីតែដោយក្តីស្រឡាញ់រាប់អានក្នុងឋានៈជាមិត្តចាស់ដែលធ្លាប់ធ្វើការជាមួយគ្នាក្នុងការលើកកម្ពស់ទំនាក់ទំនងមិត្តភាពកម្ពុជា-ជប៉ុន ឯកឧត្តមនាយករដ្ឋមន្ត្រីជប៉ុន គីស៊ីដា ហ្វីមីអូ បានឆ្លៀតទទួលខ្ញុំនៅវិមានរដ្ឋាភិ បាល នាពេលល្ងាចនេះ។ សម្ដេចតេជោបានបន្ថែមថា៖ «ខ្ញុំសូមអរគុណចំពោះឯកឧត្តម គីស៊ីដា ហ្វីមីអូ ដែលនៅបន្តរាប់អានខ្ញុំ ក្នុងឋានៈជាមិត្តចាស់ម្នាក់ និងបានទទួលជួបដោយក្តីស្រឡាញ់រាប់អាន។ ខ្ញុំសូមអរគុណផងដែរដល់មិត្តភក្ដិ ទាំងអស់ដែលមកជួបពិភាក្សាជាមួយ ខ្ញុំពេលខ្ញុំស្នាក់នៅទី ក្រុង តូក្យូ»៕ សំរិត