អេ រដ្ឋា និង វ៉ាន់ វឿនកក់កៅអីសម្រាប់ជុំទី២
ភ្នំពេញ:ទីបំផុតម្ចាស់មេដាយសំរិទ្ធស៊ីហ្គេមវ៉ាន់ វឿនក្លិបឃ្លាំងមឿងកីឡាបានកក់កៅអីសម្រាប់ជុំទី២នៃព្រឹត្តិការណ៍TV5 Boxing Knock Out Serie by K-Cementបន្ទាប់ពីផ្ដួលអ្នកប្រដាល់ភួងពិសិដ្ឋក្លិបខេត្តរតនគីរីបានមុន ស្នូរជួងបញ្ចប់ទឹកទី ១ នោះ ។
ពិសិដ្ឋជាអ្នកប្រដាល់ដែលមានកណ្ដាប់ដៃធ្ងន់វ៉ៃចេញរហ័សតែវ៉ាន់ វឿនដែលមានជង្គង់ល្អនិងរហ័សជាងនោះ គេបញ្ចេញជង្គង់វាយសន្ធាប់ លើពិសិដ្ឋធ្វើឲ្យពិសិដ្ឋសន្លប់ក្រោកលែងរួចនៅត្រឹមទឹកទី១ ។
ពិសិដ្ឋពេលនេះហាលអាវទាំងព្រលឹបអុរតែម្ដងក្នុងខណៈដែលវ៉ាន់ វឿនវ៉ៃមិនទាន់បានចេញញើសផងនោះក៏ដណ្ដើម បានកៅអីសម្រាប់ប្រកួតជម្រុះបន្តនៅជុំទី២ទៀត ។
ប្រកួតក្នុងព្រឹត្តិការណ៍នេះដែរង៉ែត វុធក្លិបទ័ពឆ័ត្រយោង៩១១ក៏ខ្ទាតចេញ ពីការប្រកួតដែរបន្ទាប់ពីប្រកួតចាញ់អេ រដ្ឋាក្លិបអេភូថងកីឡាដោយពិន្ទុដាច់នោះ ។
ការប្រកួតដែលមានតែ៣ទឹកនោះរដ្ឋមានប្រៀបទាំង៣ទឹក តែម្ដងដោយចៅក្រមទាំង៥រូបសុទ្ធតែផ្ដល់ពិន្ទុឲ្យរដ្ឋាឈ្នះដូចគ្នា ។ មិនតែប៉ុណ្ណោះនៅទឹកទី៣ង៉ែត វុធត្រូវរដ្ឋាវាយមួយកែងបណ្ដាល ឲ្យមានរបួសនៅចុងភ្នែកឆ្វេងទៀតផង ។
អេ រដ្ឋាពេលនេះមានកៅអីសម្រាប់ឡើងប្រកួតជម្រុះបន្តនៅជុំទី២ទៀត ក្នុងខណៈដែលង៉ែត វុធត្រូវហាលអាវទាំងព្រឹកព្រលឹមដែរនោះ ។ ពេលនេះមានអ្នកប្រដាល់៤រូបហើយដែលធ្លាក់ក្នុងការប្រកួតជម្រុះនៅជុំទី១ ហើយក៏មាន អ្នកប្រដាល់៤រូបដែរដែលកក់កៅអីសម្រាប់ជុំទី២នោះ ។
ការប្រកួតជាមិត្តភាពជាមួយអ្នកប្រដាល់ថៃវិញនោះអ្នកប្រដាល់ឯម ឡេងលីក្លិបថ្មគោលខ័ណ្ឌពោធិ៍សែនជ័យប្រើជង្គង់ផ្ដួល អ្នកប្រដាល់ថៃឃុន ផែន(Khun Phen)ឲ្យសន្លប់នៅទឹកទី១ ។
ចំពោះគូប្រកួតក្រៅព្រឹត្តិការណ៍ពានរង្វាន់នោះចេង គាក្លិបពន្លឺវិបុលឈ្នះង៉ែត រដ្ឋាក្លិបតាព្រហ្មមានជ័យដោយពិន្ទុ ។សាន សំអុលក្លិបអារុណរះកីឡាប្រកួត ឈ្នះលាង ភារម្យក្លិបម៉ៃទីក្រាំងយ៉ូវដោយពិន្ទុ ។