ឃាត់ខ្លួនជនសង្ស័យម្នាក់ ពាក់ពន្ធ័ករណីលួចប្រាក់តាមរយៈគណនីធនាគារ AMK របស់ពលរដ្ឋនៅក្រុងប៉ោយប៉ែត អស់ប្រាក់ចំនួន ៨១៤០ដុល្លារ

បន្ទាយមានជ័យ: កម្លាំងការិយាល័យនគរបាលប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលខេត្តបន្ទាយមានជ័យ សហការជាមួយ កម្លាំងអធិការដ្ឋាននគរបាលក្រុងប៉ោយប៉ែត ចុះស្រាវជ្រាវនិងឃាត់ខ្លួនជនសង្ស័យ១នាក់ ក្រោយពីជនសង្ស័យបានធ្វើសកម្មភាព លួចប្រាក់តាមរយៈគណនីធនាគារ AMK របស់ពលរដ្ឋ ចំនួន ៨១៤០ដុល្លារ
នៅចំណុចភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

លោកវរសេនីយ៍ទោ សោម សារុន នាយការិយាល័យនគរបាលប្រឆាំងបទល្មើសបច្ចេកវិទ្យា បានឲ្យដឹងថា ដោយអនុវត្តន៍បទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងការសម្របសម្រួលនីតិវិធីពីឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្ត និងយោងបណ្តឹងរបស់ជនរងគ្រោះឈ្មោះ សៀក ស្រីនាង ភេទស្រី អាយុ ៤២ ឆ្នាំ រស់នៅក្រុងប៉ោយប៉ែត បានបាត់ប្រាក់ពីកង់ធនាគារAMK អស់ប្រាក់ចំនួន ៨១៤០ដុល្លារ(ប្រាំបីពាន់មួយរយសែសិបដុល្លារ) កម្លាំងការិយាល័យនគរបាលប្រឆាំងបទល្មើសបច្ចេកវិទ្យា បានដឹកនាំកម្លាំង សហការណ៍ជាមួយកម្លាំងអធិការដ្ឋាននគរបាលក្រុងប៉ោយប៉ែត កាលពីថ្ងៃទី ០៧ ខែ កុម្ភៈ ឆ្នាំ២០២៤ ចុះស្រាវជ្រាវនិងបានឃាត់ខ្លួនជនសង្ស័យបាន ១នាក់ឈ្មោះ គឹម វិបុល ហៅមិញ ភេទ ប្រុស អាយុ ៤០ ឆ្នាំ រស់នៅភូមិបាលិលេល្យ២ សង្កាត់ប៉ោយប៉ែត ក្រុងប៉ោយប៉ែត ។

យោងបណ្តឹងជនរងគ្រោះ ឈ្មោះសៀក ស្រីនាង បានឲ្យដឹងថា កាលពីថ្ងៃទី ៥ ខែ កញ្ញា ឆ្នាំ២០២៣ លោកស្រីគាត់បានបាត់ទូរស័ព្ទដៃមួយគ្រឿងម៉ាក់OPPO ដោយមានភ្ជាប់ទៅជាមួយនៅកុងគណនីធនាគារAMK ឈ្មោះ សៀក ស្រីនាង ទៅជាមួយ ក្រោយពីបាត់ទូរស័ព្ទម្ចាស់ទូរស័ព្ទបានទៅជួបខាងធនាគារសួរនាំដែរពីរឿងបាត់ទូរស័ព្ទនិងចង់ឲ្យធនាគារប្តូរAPPគណណីរបស់ខ្លួនមកទូរស័ព្ទថ្មី តែពេលនោះគាត់មិនបានយកលេខទូរស័ព្ទចាស់ទៅក៏ផ្លាស់ប្តូរមិនបាននិងបានសួរទៅបុគ្គលិកធនាគារថាអាចបាត់លុយដែរឬអត់ ហើយបុគ្គលិកធនាគារក៏បានប្រាប់មកវិញថាអាចបាត់បើសិនជាគេស្គាល់លេខកូដសម្ងាត់តែបើគេមិនស្គាល់ទេគឺមិនបាត់ទេ ពេលសួរហើយឈ្មោះ សៀក ស្រីនាងក៏បានដាក់លុយចូលកុងគណនីបន្ថែមទៀតចំនួន១៨០០ដុល្លារ ហើយក៏ត្រឡប់ទៅផ្ទះវិញបាត់ទៅ ។ លុះនៅថ្ងៃទី១១ខែកញ្ញា ឆ្នាំ២០២៣ ម្ចាស់គណនីឈ្មោះ សៀក ស្រីនាង បានយកលុយទៅដាក់ក្នុងកុងបន្ថែមទៀតចំនួន៤០០០ដុល្លារតែមុននិងដាក់បានឲ្យបុគ្គលិកធនាគារឆែកមើលលុយក៏បានឃើញថាបាត់អស់ពីក្នុងកុងធនាគាររបស់ខ្លួនទើបដឹងថាមានគេលួចចូលគណនីលួចប្រាក់ពីកុងគណនីរបស់ខ្លួនអស់ទឹកប្រាក់ចំនួន៨១៤០ដុល្លារ ។

បច្ចប្បន្នជនសង្ស័យ ១នាក់ ត្រូវបានឃាត់ខ្លួនបណ្តោះអាសន្ន ដើម្បីសួរនាំនិងកសាងសំណុំរឿងបញ្ជូនទៅតុលាការចាត់ការតាមនីតិវិធី ៕