ឃាត់ខ្លួនស្ត្រីម្នាក់ លួចទូរស័ព្ទដៃ ពេលម្ចាស់កំពុងដេកលក់
ភ្នំពេញ៖ កម្លាំងនគរបាលប៉ុស្តិ៍ឫស្សីកែវឃាត់ខ្លួនស្ត្រីម្នាក់ លួចទូរស័ព្ទដៃពីស្ត្រីម្នាក់ នៅថ្ងៃទី១០ ខែវិច្ឆិកា ឆ្នាំ២០១៨ វេលាម៉ោង១៣រសៀល នៅចំណុចផ្សារបឹងសាឡាងថ្មី ផ្លូវបេតុង ក្រុមទី១៣ ភូមិបឹងសាឡាង សង្កាត់ឫស្សីកែវ។
លោកវរសេនីយ៍ទោ គល់ យី អធិការនគរបាលបានឲ្យដឹងថា ជនសង្ស័យឈ្មោះ ធូ ស្រីពេជ្រ ភេទស្រី អាយុ៣២ឆ្នាំ មានទីលំនៅផ្ទះលេខ១៩៥ ផ្លូវ៨០ ភូមិ២២ សង្កាត់ស្រះចក ខណ្ឌដូនពេញ មុខរបរបុគ្គលិកក្រុមហ៊ុនហ្វេខាប់។ ចំណែកជនរងគ្រោះ ឈ្មោះ អ៊ុង សុផល្លី ភេទស្រី អាយុ៤៧ឆ្នាំ ស្នាក់នៅផ្ទះលេខ៥៥៨ ផ្លូវបេតុង ក្រុមទី១៣ ភូមិបឹងសាឡាង សង្កាត់ឫស្សីកែវ មុខរបរលក់ដូរ៊
លោកអធិការបន្តថា មុនពេលកើតហេតុ ជនរងគ្រោះកំពុងដេក នៅក្នុងតូបលក់អីវ៉ាន់នៅក្នុងផ្សារ ចំណែកជនសង្ស័យដើរលក់ភេសជ្ជៈ ឃើញទូរស័ព្ទដែលជនរងគ្រោះ ដាក់សាកថ្មនៅក្នុងតូប ក៏ធ្វើសកម្មភាពលួចយកទូរស័ព្ទនោះ ភ្លាមនោះជនរងគ្រោះបានឃើញទាន់ ក៏ដេញតាមរហូតមកដល់រ៉ឺម៉កលក់ភេសជ្ជៈរបស់ជនសង្ស័យ ឆែករកឃើញទូរស័ព្ទនៅក្នុងរ៉ឺម៉កនោះតែម្តង។
សម្ភារៈដកហូតៈទូរស័ព្ទដៃ៣គ្រឿងម៉ាកស៊ូហ្គា ពណ៌មាស ១គ្រឿង,ម៉ាកNokia ពណ៌ខ្មៅ ១គ្រឿង និងម៉ាកTrue ពណ៌ខ្មៅ ១គ្រឿង,ប្រាក់ចំនួន ១៣២.០០០រៀល និងប្រាក់ដុល្លារ ៥ដុល្លារ។ ចំណែកឯទូរស័ព្ទដៃម៉ាកស៊ូហ្គា បានប្រគល់ជូនជនរងគ្រោះវិញ។ បច្ចុប្បន្នជនសង្ស័យកម្លាំងជំនាញ អធិការដ្ឋាននគរបាលខណ្ឌឫស្សីកែវ កំពុងសាកសួរយកចម្លើយកសាងសំណុំរឿង បញ្ជូនទៅសាលាដំបូងរាជធានីភ្នំពេញដើម្បីអនុវត្តតាមនីតិវិធី៕