បុរសម្នាក់ លួចធ្វើអត្តឃាតចងកសម្លាប់ខ្លួន ហើយសមត្ថកិច្ចរកកាំភ្លើង៣ដើមក្នុងបន្ទប់
ពោធិ៍សាត់៖ បុរសម្នាក់មានមុខរបរលក់ចាប់ហួយ លួចធ្វើអត្តឃាតចងកសម្លាប់ខ្លួន ហើយបើតាមសមត្ថកិច្ចមូលដ្ឋានបានសន្និដ្ឋាន ករណីនេះកើតឡើងដោយសារអត្តឃាតជនមានវិបត្តិ ទើបបណ្តាលឲ្យសម្រេចចិត្តលួចធ្វើអត្តឃាតចងកសម្លាប់ខ្លួនបែបនេះ ហើយនៅពេលដែលសមត្ថកិច្ចជំនាញ ចុះទៅពិនិត្យក្នុងបន្ទប់របស់ជនអត្តឃាត សមត្ថកិច្ចបានរកឃើញ កាំភ្លើងចំនួន៣ដើម កាំភ្លើងខ្យល់វែង បាញ់គ្រាប់សំណរ ចំនួន២ដើម និងកាំភ្លើងខ្លីជ័រមួយដើម បាញ់គ្រាប់កង់។
បុរសរូបនោះ ឈ្មោះ ស៊្រី វិសាលអាយុ៣០ឆ្នាំ មានមុខរបរលក់អ៊ីវ៉ាន់ចាប់ហួយ រស់នៅភូមិស្ពានថ្ម សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់ បានលួចធ្វើអត្តឃាតចងកសម្លាប់ខ្លួន នៅចំណុចក្នុងបន្ទប់ដេក កាលពីថ្ងៃទី១១ ខែវិច្ឆិកា ឆ្នាំ២០១៨ ។
តាមការរៀបរាប់របស់ឈ្មោះ សុខ ស្រីដែន ត្រូវជាប្រពន្ធ បាននិយាយប្រាប់សមត្ថកិច្ចឲ្យដឹងថា មុនពេលកើតហេតុ ប្តី បានចូលដំណេក លុះដល់ថ្ងៃកើតហេតុ កូនស្រីរបស់គាត់ បានរុញទ្វារបន្ទប់ដេក ក្នុងគោលបំណងទៅយកសៀវភៅ តែទ្វារបន្ទប់ជាប់សោ និងគន្លឹះខាងក្នុង ក៏ស្រែកហៅម្តាយឲ្យមកជួយបើកទ្វារ លុះបើកបានក៏ប្រទះឃើញប្តីរបស់ខ្លួន ចងកស្លាប់បាត់បង់ជីវិត ធ្វើឲ្យមានការភ្ញាក់ផ្អើល និងប្តឹងទៅសមត្ថកិច្ច និងអាជ្ញាធរមូលដ្ឋាន នៅវេលាម៉ោង៩ព្រឹកថ្ងៃទី១១ ខែវិច្ឆិកា ឆ្នាំ២០១៨ ។
លោកវរសេនីយ៍ទោ មាស ម៉ុល នាយការិយាល័យនគរបាលព្រហ្មទណ្ឌកម្រិតធ្ងន់ បានប្រាប់ឲ្យដឹងថា ក្រោយពីទទួលព័ត៌មានពីក្រុមគ្រួសារជនរងគ្រោះ សមត្ថកិច្ចជំនាញបានសហការ ជាមួយអាជ្ញាធរមូលដ្ឋាន ចុះដល់កន្លែងកើតហេតុ ពិនិត្យសាកសព ហើយបានអះអាងថា ជនរងគ្រោះស្លាប់ នៅវេលាម៉ោង៦ព្រឹក ព្រោះមានវិបត្តិ ទើបបណ្តាលឲ្យជនរងគ្រោះសម្រេចចិត្តលួចធ្វើអត្តឃាតចងកសម្លាប់ខ្លួនបែបនេះ ។ នៅពេលពិនិត្យក្នុងបន្ទប់ជនរងគ្រោះ សមត្ថកិច្ចបានរកឃើញ កាំភ្លើងចំនួន៣ដើម កាំភ្លើងខ្យល់វែង បាញ់គ្រាប់សំណ ចំនួន២ដើម និងកាំភ្លើងខ្លីជ័រមួយដើម បាញ់គ្រាប់កង់ សមត្ថកិច្ចនគរបាលក្រុងពោធិ៍សាត់ កសាងសំណុំរឿង បញ្ជូនមករក្សាទុកនៅ ការិយាល័យនគរបាលបច្ចេកទេស នៃស្នងការដ្ឋាននគរបាលខេត្ត ដើម្បីធ្វើការស្រាវជ្រាវបន្ត រីឯសាកសពត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី ៕