តុលាការឃុំអ្នកបើកបរម្នាក់ ដាក់ពន្ធនាគារព្រៃស បើកបរដោយធ្វេសប្រហែស ខ្ជីខ្ជា បណ្តាលឲ្យស្លាប់អ្នកដទៃ
ភ្នំពេញ៖ លោក ហម ម៉េងសែ ចៅក្រមស៊ើបសួងរសាលាដំបូងរាជធានីភ្នំពេញ នៅថ្ងៃទី១២ ខែវិច្ឆិកា ឆ្នាំ២០១៨ បានចេញដីកាបង្គាប់ឲ្យឃុំខ្លួនជនជាប់ចោទម្នាក់ជាអ្នកបើកបរ ពីបទ៖បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចបណ្តាលឲ្យស្លាប់អ្នកដទៃ ប្រព្រឹត្តនៅចំណុចផ្លូវ៥០ម៉ែត្រ ប្រសព្វផ្លូវបេតុង ភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ កាលពីថ្ងៃទី៩ ខែវិច្ឆិកា ឆ្នាំ២០១៨។ បទល្មើសព្រហ្មទណ្ឌមានចែងនិងផ្តន្ទាទោស តាមបញ្ញត្តិមាត្រា៨៥នៃច្បាប់ស្តីពីចរាចរណ៍ផ្លូវគោក។
យោងតាមដីកាបង្គាប់ឲ្យឃុំខ្លួនជនត្រូវចោទមានឈ្មោះ ម៉ៃ សាន ភេទប្រុស អាយុ៣២ឆ្នាំ ជនជាតិខ្មែរ មុខរបរអ្នកបើកបរ រស់នៅភូមិអំពិល ស្រុកបសេដ្ឋ ខេត្តកំពង់ស្ពឺ។ ចប្ចុច្បន្នស្នាក់នៅភូមិត្រពាំងបាគូ ឃុំត្រពាំងវែង ស្រុកកណ្តាលស្ទឹង ខេត្តកណ្តាល។ លោក ហម ម៉េងសែ បានបង្គាប់ឲ្យបញ្ជាឲ្យភ្នាក់ងារ មានសមត្ថកិច្ចនៃកងកម្លាំងសាធារណៈ ធ្វើការឃុំខ្លួនជនត្រូវចោទ ទៅមណ្ឌលអប់រំកែប្រែទី១ ដោយអនុវត្តឲ្យបានត្រឹមត្រូវតាមផ្លូវច្បាប់ ហើយប្រធានមណ្ឌលអប់រំកែប្រែទី១ ត្រូវទទទួលនិងឃុំខ្លួនជនរូបនេះ៕
