ចាប់ជនជាតិវៀតណាម ប្រើឧបករណ៍ឆក់ត្រី ខុសច្បាប់
ខេត្តកំពង់ចាមៈ នគរបាលប្រឆាំងបទល្មើសសេដ្ឋកិច្ច បានចុះបង្ក្រាបបទល្មើសនេសាទខុសច្បាប់ ដោយចាប់ជនជាតិវៀតណាម ប្រើឧបករណ៍ឆក់ត្រីខុសច្បាប់។
ស្នងការដ្ឋាននគរបាលខេត្តកំពង់ចាម បានផ្សាយថា នៅព្រឹកថ្ងៃទី១៦ ខែវិច្ឆិកា ឆ្នាំ២០១៨ វេលាម៉ោង ៤:២០នាទី ក្រោយពីទទួលបានព័ត៌មាន ពីប្រជាពលរដ្ឋ រាយការណ៍អំពីបទល្មើសនេសាទខុសច្បាប់ (ឆក់) លោកឧត្តមសេនីយ៍ទោ ឯម កុសល បានចាត់បញ្ជា លោកវរសេនីយ៍ឯក ស្រេង ធារី នាយការិយាល័យប្រឆាំងបទល្មើសសេដ្ឋកិច្ច ដឹកនាំដោយលោកឧត្តមសេនីយ៍ត្រី អ៊ិត តារា ស្នងការរងទទួលការងារប្រឆាំងបទល្មើសសេដ្ឋកិច្ច បានចុះបង្ក្រាបបទល្មើសនេសាទខុសច្បាប់ នៅចំណុច ភូមិចុងថ្នល់ទី១ សង្កាត់បឹងកុក ក្រុងកំពង់ចាម ខេត្តកំពង់ចាម។ ជាលទ្ធផលដកហូតបាន: ឧបករណ៍ឆក់ត្រី ចំនួន ២ គ្រឿង (ក្តៅ ចំនួន១គ្រឿង និងត្រជាក់ ចំនួន ១គ្រឿង) អាគុយ ចំនួន២ ទូកម៉ាស៊ីន ចំនួន ១គ្រឿង ដងឆក់ ចំនួន ១គូរ ត្រីចម្រុះ ចំនួន ៣០គីឡូក្រាម និងបានឃាត់ខ្លួនជនសង្ស័យ ចំនួន២នាក់ ១-ឈ្មោះ ថាំង លី ភេទប្រុស អាយុ៣៩ឆ្នាំ ជនជាតិវៀតណាម មានលំនៅភូមិចុងថ្នល់ទី១ សង្កាត់បឹងកុក ក្រុងកំពង់ចាម ខេត្តកំពង់ចាម ២-ឈ្មោះ គឹម នី ភេទប្រុស អាយុ៣៤ឆ្នាំ ជនជាតិខ្មែរ មានលំនៅភូមិចុងថ្នល់ទី១ សង្កាត់បឹងកុក ក្រុងកំពង់ចាម ខេត្តកំពង់ចាម។
បច្ចុប្បន្ន សម្ភារៈវត្ថុតាង និងជនល្មើស ត្រូវបានប្រគល់ជូន ខណ្ឌរដ្ឋបាលជលផលខេត្តកំពង់ចាម ដើម្បីចាត់ការតាមនីតិវិធីច្បាប់បន្ត៕
