ព្រឹកនេះសាលាក្តីបើកសវនាការប្រកាសសាលក្រមលើសំណុំរឿង០០២ វគ្គ០២ ពាក់ព័ន្ធនឹងជនជាប់ចោទ នួន ជា និងខៀវ សំផន
ភ្នំពេញ ៖ សាលាដំបូងនៃសាលាក្តីខ្មែរក្រហម នៅវេលាម៉ោង៩ និង៣០ នាទី ព្រឹក ថ្ងៃទី១៦ ខែវិច្ឆិកា ឆ្នាំ ២០១៨ នេះបាននិងកំពុងបើកសវនាការប្រកាសសាលក្រមលើសំណុំរឿង០០២/០២ ពាក់ព័ន្ធនឹងជនជាប់ ចោទ នួន ជា និងខៀវ សំផន ដែលត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ឧក្រិដ្ឋកម្មប្រល័យពូជសាសន៍ប្រឆាំងជនជាតិចាម និងជនជាតិវៀតណាម។
តាមសាលាក្តីខ្មែរក្រហមមបានបញ្ជាក់ថា ពិធីប្រកាសសាលក្រមលើសំណុំរឿង០០២/០២ ដែលមានជនត្រូវចោទ នួនជា និងខៀវសំផន នេះ មានអ្នកចូលរួមប្រមាណ១០០០នាក់ មកពីគ្រប់មជ្ឈដ្ឋានទាំងអស់ រួមមាន ជនរងគ្រោះ សិស្ស យុវជន ឥស្សរជនជាន់ខ្ពស់ និងបណ្តាអង្គទូតទាំងអស់ ហើយព្រឹត្តិការណ៍ជាតិប្រវត្តិសាស្ត្រនេះ នឹងមានការផ្សាយផ្ទាល់តាមទូរទស្សន៍ជាតិកម្ពុជា ទ.ទ.ក (TVK) និងទូរទស្សន៍ឯកជនដទៃទៀត ព្រមទាំងមានបណ្តាញសារព័ត៌មានជាតិ និងអន្តរជាតិ ធ្វើការផ្សព្វផ្សាយផ្ទាល់ពី អ.វ.ត.ក ផងដែរ។ជុំវិញព្រឹត្តិការណ៍ជាប្រវត្តិសាស្ត្រនេះ លោក ហ៊ុយ វណ្ណៈ ប្រធានសហភាពសហព័ន្ធអ្នកកាសែតកម្ពុជា ស.ស.ស.ក បានអំពាវនាវដល់សារព័ត៌មានទាំងអស់ ចូលរួមផ្សព្វផ្សាយឲ្យបានទូលំទូលាយលើការប្រកាសសាលក្រម លើសំណុំរឿង០០២ ដំណាក់កាលទី២ ជាប្រវត្តិសាស្ត្រនេះ។
សូមរម្លឹកថា សវនាការដេញដោល ពិនិត្យភ័ស្តុតាងលើសំណុំរឿង០០២ ដំណាក់កាលទី២ បានចាប់ផ្តើម ដោយការធ្វើសេចក្តីសន្និដ្ឋានចោទប្រកាន់ កាលពីថ្ងៃទី១៧ ខែតុលា ឆ្នាំ២០១៤ និងបានបញ្ចប់នៅថ្ងៃទី១១ ខែមករា ឆ្នាំ២០១៧។ សរុបមក ការជំនុំជម្រះ រួមទាំងការស្តាប់សេចក្តីសន្និដ្ឋាន បិទបញ្ចប់កិច្ចពិភាក្សាដេញដោល លើសំណុំរឿង០០២/០២ មានរយៈពេលចំនួន២៨៣ ថ្ងៃ។
