អំពាវនាវដល់សាធារណជនជាអ្នកប្រើប្រាស់ផ្លូវចំនួន១០ចំណុច ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីអុំទូក
ភ្នំពេញ៖ ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីអុំទូក អកអំបុកអក បណ្ដែតប្រទីបនិងសំពះព្រះខែ គណៈកម្មការជាតិសុវត្ថិភាពចរាចរណ៍ផ្លូវគោក សូមធ្វើការអំពាវនាវដល់សាធារណជនជាអ្នកប្រើប្រាស់ផ្លូវចំនួន១០ចំណុច។
ស្តេចក្រឡាហោម សខេង បានមានប្រសាសន៍ថា ” ក្នុងនាមខ្ញុំជាប្រធាន គណៈកម្មការជាតិសុវត្ថិភាពចរាចរណ៍ផ្លូវគោកសូមថ្លែងនូវការកោតសរសើរប្រកបដោយសេចក្តី មោទនភាពជាទីបំផុតចំពោះអ្នកប្រើប្រាស់ផ្លូវដ៏ច្រើនលើសលប់ដែលមានឆន្ទៈក្នុងការចូលរួមគោរពនិងអនុវត្តន៍ច្បាប់ស្ដីពីចរាចរណ៍ផ្លូវគោកយ៉ាងផុសផុលក្នុងពេលធ្វើចរាចរណ៍រួមចំណែកក្នុងការកាត់បន្ថយការបាត់បង់ជីវិតរងគ្រោះនិងការខូចខាតទ្រព្យសម្បត្តិដោយគ្រោះថ្នាក់ចរាចរណ៍ផ្លូវគោកនាពេលកន្លងទៅ”។
ប៉ុន្តែគ្រោះថ្នាក់ចរាចរណ៍ផ្លូវគោកនៅតែជាបញ្ហាប្រឈមចំពោះមុខនិងយូរអង្វែងដែលអាចកើតឡើងភ្លាមភ្លាមក្នុងករណីអ្នកប្រើប្រាស់ផ្លូវមានការធ្វេសប្រហែសរឺខ្ជិលជាមិនគោរពច្បាប់។
គួរកត់សម្គាល់ក្នុងត្រីមាសទី៣ ឆ្នាំ២០១៨នេះ មានអ្នកជិះទោចក្រយានយន្តចំនួន៨១% ដែលភាគច្រើនជាយុវវ័យបានក្លាយជាជនរងគ្រោះថ្នាក់ចរាចរណ៍ផ្លូវគោកហើយក្នុងចំណោមជនរងគ្រោះទាំងនោះមាន៧៧ %0ដែលមិនបានពាក់មួកសុត្ថិភាពក្នុងពេលគ្រោះថ្នាក់ចរាចរណ៍។
ដូច្នេះ ក្នុងឱកាសពិធីបុណ្យអុំទូក អកអំបុក បណ្ដែតប្រទីប និងសំពះព្រះខែដែលនឹងប្រព្រឹត្តទៅថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨ ខាងមុខនេះយានយន្តធ្វើចរាចរនឹងមានកំណើនកើនឡើងខ្ពស់ខុសពីប្រក្រតីដែលអាចមានគ្រោះថ្នាក់ចរាចរណ៍ឬការកកស្ទះចរាចរណ៍ ដូចក្នុងពិធីបុណ្យនានាកន្លងទៅផងដែរ។
ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសពិធីអុំទូក អកអំបុកអក បណ្ដែតប្រទីបនិងសំពះព្រះខែ គណៈកម្មការជាតិសុវត្ថិភាពចរាចរណ៍ផ្លូវគោកសូមធ្វើការអំពាវនាវដល់សាធារណជនជាអ្នកប្រើប្រាស់ផ្លូវដូចខាងក្រោមៈ
១.ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្ត
២. មិនត្រូវបើកបរលើសល្បឿនកំណត់ជាដាច់ខាត
៣.មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត
៤.ត្រូវគោរពសិទ្ធិអាទិភាពរូបសញ្ញាចរាចរនិងប្រកាន់ស្តាំជានិច្ច
៥.ត្រូវពាក់ខ្សែក្រវាត់សុវត្ថិភាពជានិច្ចក្នុងពេលធ្វើដំណើរតាមរថយន្ត
៦.មិនត្រូវបត់ ឬវ៉ាជែងក្នុងភាពប្រថុយប្រថាន ឬប្រើទូរស័ព្ទដោយគ្មានឧបករណ៍សម្លេងភ្ជាប់ទំនាក់ទំនង
៧.ត្រូវពិនិត្យលក្ខណៈបច្ចេកទេសយានយន្ដជានិច្ច ពិសេសត្រួតពិនិត្យកង ចង្កូត ហ្វ្រាំង ភ្លើងបំភ្លឺ។ល។
៨.សូមកុំទុកអ្នកដំណើរ ឬទំនិញលើសច្បាប់កំណត់។ ចំពោះរថយន្តដឹកអ្នកដំណើរ ឬដឹកកម្មករ មិនត្រូវផ្ទុកអ្នកដំណើរ ឬអ្នកលើដំបូល និងសូមមេត្តាកុំតម្លើងថ្លៃធ្វើដំណើរក្នុងឱកាសនេះ។
៩.មិនត្រូវបើកបរក្នុងស្ថានភាពមួយដែលជាដាច់ខាត។
១០.ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌យប់យល់អធ្យាស្រ័យ។
គណៈកម្មការជាតិសុវត្ថិភាពចរាចរណ៍ផ្លូវគោក សូមសំដែងនូវសេចក្តីសង្ឃឹមជឿជាក់លើអ្នកប្រើប្រាស់ ផ្លូវគ្រប់រូបនិងចូលរួមគោរពអនុវត្តច្បាប់ស្ដីពីចរាចរណ៍ផ្លូវគោក ក៏ដូចជាអនុវត្តតាមសេចក្តីអំពាវនាវនេះ ដើម្បីនាំមកសុវត្ថិភាព និងសេចក្តីសុខ ក្នុងឱកាសពិធីបុណ្យអុំទូក អកអំបុក បណ្ដែតប្រទីប និងសំពះព្រះខែខាងមុខនេះ៕
