ព្រះករុណាជាអម្ចាស់ជីវិតលើត្បូង ប្រទានភ្លើងក្នុងព្រះរាជពិធីបុណ្យបណ្តែតប្រទីប
នាវេលាយប់ថ្ងៃពុធ ទី២១ ខែវិច្ឆិកា ឆ្នាំ២០១៨ ព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេចសព្វព្រះរាជហឫទ័យយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីបុណ្យបណ្តែតប្រទីប នាព្រះពន្លាជ័យ ខាងមុខព្រះបរមរាជវាំង ដោយមានការយាងអមដង្ហែដោយព្រះរាជវង្សានុវង្ស និងឥស្សរជនជាន់ខ្ពស់នៃរាជរដ្ឋាភិបាល ព្រមទាំងប្រជានុរាស្រ្តយ៉ាងច្រើនកុះករ ។
សម្តេចតេជោ ហ៊ុន សែន អញ្ជើញដង្ហែរព្រះមហាក្សត្រយាងទតព្រះរាជពិធី បណ្តែតប្រទីប និងអុចកាំជ្រួច
នៅថ្ងៃដំបូងនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានអញ្ជើញដង្ហែរព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា យាងទត ពិធីអុំទូក បណ្តែតប្រទីប និងការអុចកាំជ្រួច នៅមុខព្រះបរមរាជវាំងដើម្បីអបអរសាទរព្រះរាជពិធីបុណ្យអុំទូកឆ្នាំ២០១៨ នាថ្ងៃទី១នេះ។
នៅថ្ងៃទី១នៃព្រះរាជពិធីបុណ្យអុំទូកថ្ងៃនេះ គឺបានផ្តល់នូវការ សប្បាយរីករាយក្រៃលែង ដល់បងប្អូនប្រជាពលរដ្ឋមកពីគ្រប់ទិសទី។ ទន្ទឹមនឹងនេះ គឺបានបង្ហាញអោយកូនចៅខ្មែរយើង និងភ្ញៀវទេសចរណ៍ បរទេសបានឃើញ និងបានស្គាល់នូវវប្បធម៍ ទំនៀមទម្លាប់ប្រពៃណីដ៏ថ្លៃថ្លា បំផុតរបស់ជាតិសាសន៍យើងផងដែរ។
សូមជនរួមជាតិ និងភ្ញៀវទេសចរណ៍បរទេស ចូលរួមកំសាន្តសប្បាយរីករាយនៅ ក្នុងព្រះរាជពិធីបុណ្យអុំទូកជាបន្តទៀតនៅថ្ងៃទី២ស្អែកនេះ៕
