ផ្សឹកសាមណេអត់សិលចំនួន៦អង្គ នៅវត្តជុំសិរីសុក្ខារាម មានផ្ទុកនូវសារធាតុញៀន
បាត់ដំបង៖ សមត្ថកិច្ចនិងមន្ត្រីសង្ឃ នៅក្នុងខេត្តបាត់ដំបង បានសម្រេចផ្សឹកព្រះសង្ឃចំនួន៦អង្គ នៅក្នុងវត្តមួយ បន្ទាប់ពីការស្រាវជ្រាវ និងពិនិត្យឃើញថា មានការប្រើប្រាស់គ្រឿងញៀន។
តាមការចុះផ្សាយរបស់អគ្គស្នងការដ្ឋាននគបាលជាតិនៅថ្ងៃទី២២វិច្ឆិកានេះ នៅថ្ងៃពុធទី២១ ខែវិចិ្ឆកា ឆ្នាំ២០១៨ កម្លាំងអធិការដ្ឋាននគរបាលស្រុករុក្ខគីរី បានចុះសហការជាមួយ មន្ទីរធម្មការស្រុករុក្ខគិរី ចុះត្រួតពិនិត្យវត្តជុំសិរីសុក្ខារាម ហៅវត្តដំណាក់ពង្រ ស្ថិតក្នុងភូមិទួលស្វាយ ឃុំមុខរាហ៍ ស្រុករុក្ខគិរី ត្រួតពិនិត្យឃើញនៅលើកុដិ មានឧបករណ៍ប្រើប្រាស់គ្រឿងញៀន មួយចំនួន ដូចជា ដបកែច្នៃប្រើប្រាស់ចំនួន ១ ដែកឆាប ១ វិទ្យុទាក់ទង (icon) ១គ្រឿង និងកូនកាំបិតចុងស្រួច ១ ខោជើងវែង ២ កន្សែង ១ កាតាបស្ពាយ ១។
សមត្ថកិច្ច បានស្នើសុំអាចារ្យគណៈកម្មការ និងធម្មការ ធ្វើតេស្តទឹកនោម លើសាមណេ ក្នុងវត្តឃើញថា មានផ្ទុកនូវសារធាតុញៀនចំនួន ៦អង្គ បន្ទាប់មកធម្មការស្រុក បានអនុវត្តតាមវិន័យរបស់ពុទ្ធសាសនា ដោយធ្វើការផ្សឹកសាមណេទាំង ៦អង្គ ។
ក្រោយពីការផ្សឹករួច កម្លាំងនគរបាលស្រុកបានធ្វើការអប់រំ ធ្វើកិច្ចសន្យា បញ្ឈប់ការប្រើប្រាស់គ្រឿងញៀន ។ ចំពោះធម្មការស្រុកបាននិមន្តព្រះសង្ឃ ដែលនៅសេសសល់ចំនួន ៦អង្គ មកប្រជុំ ដើម្បីពង្រឹងលើវិន័យព្រះធម៌របស់ព្រះសង្ឃ ៕
