ឃាតកម្មប្ដីសម្លាប់ប្រពន្ធ និងកូនប្រុស២នាក់ រួចរត់ទៅចងកសម្លាប់ខ្លួននៅស្រុកមុខកំពូល ខេត្តកណ្តាល

កណ្តាល៖បុរសជាប្ដីម្នាក់បានសម្លាប់ប្រពន្ធ និងកូនប្រុសចំនួន២នាក់ រួចរត់ទៅចងកសម្លាប់ខ្លួន បង្កឲ្យមានការភ្ញាក់ផ្អើល កាលពីវេលាម៉ោង ៦៖៤០នាទីព្រឹកថ្ងៃទី២៣ ខែវិច្ឆិកា ឆ្នាំ២០២៤ ស្ថិតនៅភូមិព្រៃផ្ដៅ ឃុំរកាកោងទី១ ស្រុកមុខកំពូល ខេត្តកណ្ដាល។

សេចក្តីរាយការណ៍ពីសមត្ថកិច្ចមូលដ្ឋាន បានឲ្យដឹងថា បុរសជាប្តីឈ្មោះ វុធ សុខចាន់ អាយុ៣៤ឆ្នាំ ហើយប្រពន្ធដែលត្រូវប្តីសម្លាប់ឈ្មោះ ទូច ស្រីហាច អាយុ៣៤ឆ្នាំ ព្រមទាំងកូនប្រុស២នាក់ ឈ្មោះ វុធ ស៊ីប៊ែល អាយុ១២ឆ្នាំ និងឈ្មោះ វុធ ស៊ីជន អាយុ១០ឆ្នាំ។

បើតាមសមត្ថកិច្ច, សម្រាប់មូលហេតុដែលនាំឲ្យប្តីសម្លាប់ប្រពន្ធ និងកូនប្រុសទាំង២នាក់ខាងលើនេះ សង្ស័យមកពីជំពាក់បំណុលច្រើនពេក។ ក្រោយកើតហេតុ កម្លាំងនគរបាលជំនាញបានចុះទៅពិនិត្យ និងធ្វើកោសល្យវិច្ច័យ រួចហើយបានប្រគល់សពដល់គ្រួសារសព ដើម្បីធ្វើបុណ្យតាមប្រពៃណី៕