លោក អូស្មាន ហាស្សាន់៖ ដោយកំណើនសេដ្ឋកិច្ចនៅកម្ពុជា សមាគមអ្នកធុរជនឥស្លាមថៃ គ្រោងនឹងរៀបចំ ពិធីតាំងពិពណ៍ផលិតផលហាឡាល់ ថៃនៅកម្ពុជាឆ្នាំ២០១៩
ភ្នំពេញ៖ លោក អូស្មាន ហាស្សាន់ បានបញ្ជាក់ថា៖ សមាគមអ្នកធុរជនឥស្លាមថៃ MTMA ដែលមានសមាជិក២៥០ប្រទេស បាននិងកំពុងធ្វើការទំនាក់ទំនង ដើម្បីបើកពិធីតាំងពិពណ៌ផលិតផល ហាឡាល់ថៃលំដាប់អន្តរជាតិមួយនៅកម្ពុជា ដែលគ្រោងនឹងបើកនៅខែមិថុនា ឆ្នាំ២០១៩ខាងមុខនេះ។ នេះគឺជាការលើកឡើងរបស់ លោក Vasu Sensom ប្រធាន សមាគមMTMAថៃ ក្នុងជំនួបសម្តែងការគួរសម និងពិភាក្សាការងារជាមួយ លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស កាលពីថ្ងៃពុធ៦រោច ខែកត្ដិក ឆ្នាំចសំរឹទ្ធស័កព.ស២៥៦២ត្រូវនិងថ្ងៃទី ២៨ ខែវិច្ឆិកា ឆ្នាំ២០១៨ នៅការិយាល័យផ្ទាល់របស់ លោកទេសរដ្ឋមន្ត្រី ។
លោក អូស្មាន ហាស្សាន់ បានបញ្ជាក់ថា៖ ដោយមើល ឃើញពីសក្តានុពល និង ឱកាសវិនិយោគនៅកម្ពុជា ជា ពិសេស ការវិនិយោគលើវិស័យឧស្សាហកម្មហាឡាល់ គឺជាទិសដៅសំខាន់របស់ភាគីវិនិយោគ និងធុរជនលើសកលលោក កំពុងមានចំណាប់អារម្មណ៍ រួមទាំងអ្នកវិនិយោគវិស័យហាឡាល់ ក្នុងតំបន់ កំពុងផ្តោតការយកចិត្តទុកដាក់មកវិនិយោគនៅកម្ពុជា។
លោក អូស្មាន ហាស្សាន់ បានបញ្ជាក់ថា ៖ ក្រោមគោល នយោបាយអភិវឌ្ឍន៍របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដែលកំណើនសេដ្ឋកិច្ចនៅកម្ពុជាក្នុងអត្រាជាង ៧% ប្រចាំឆ្នាំ ក្នុងរយៈពេលជាង២ទសវត្សរ៍។
លោកបន្តថា ៖ កម្ពុជាស្វាគមន៍ និងបើកទូលាយទទួលរាល់ការវិនិយោគទាំងអស់ ហើយកម្ពុជាក៏មានធន់ធានគ្រប់គ្រាន់ និងមានលក្ខណៈអំណោយផលទាំងភូមិសាស្រ្ត និង ស្ថេរភាពនយោបាយ សន្តិសុខសង្គម ដែលជាកត្តាចម្បង ធានាបាននូវសុវត្ថិភាពក្នុងការងារវិនិយោគ និងគ្មានហានិភ័យ ណាមួយកើតឡើងចំពោះអ្នកវិនិយោគទុន នៅកម្ពុជា ទាំងបច្ចុប្បន្ន និងទៅថ្ងៃអនាគត ៕ ដោយ៖ សំរិត
