លោក ដូណាល់ ត្រាំ ទៅដល់រដ្ឋធានីវ៉ាស៉ីនតោន ដើម្បីត្រៀមស្បថចូលកាន់តំណែង ជាប្រធានាធិបតីអាមេរិក ជាលើកទី២

ក្រុងវ៉ាស៉ីនតោន៖កាលពីថ្ងៃសៅរ៍ ទី១៨ ខែមករា ប្រធានាធិបតីជាប់ឆ្នោតអាមេរិក លោក ដូណាល់ ត្រាំ បានធ្វើដំណើរទៅដល់រដ្ឋធានីវ៉ាស៉ីនតោន ជាទីដែលរូបលោក នឹងត្រូវចូលរួមព្រឹត្តិការណ៍ និងកម្មវិធីអបអរសាទរជាច្រើន មុនពេលស្បថចូលកាន់តំណែង នៅដើមសប្តាហ៍ក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
លោក ត្រាំ បានធ្វើដំណើរទៅដល់អាកាសយានដ្ឋានអន្តរជាតិ Dulles ជាមួយភរិយារបស់លោក គឺលោកស្រី Melania ព្រមទាំង សមាជិកគ្រួសារមួយចំនួនទៀត។ ក្រោយពេលទៅដល់ភ្លាម លោក ត្រាំ បានឆ្ពោះទៅចូលរួមព្រឹត្តិការណ៍ឯកជនមួយ ដែលរួមមាន ទាំងការបាញ់កាំជ្រួចអបអរ នៅឯក្លឹបវាយកូនហ្គោលមួយរបស់លោក។ នៅថ្ងៃអាទិត្យ ទី១៩ ខែមករា លោក ត្រាំ ក៏ត្រូវបានរំពឹងថា នឹងរៀបចំព្រឹត្តិការណ៍ជួបជុំជាមួយអ្នកគាំទ្រ ផងដែរ។ លោក ត្រាំ បានទទួលជ័យជម្នះ ក្នុងការបោះឆ្នោតប្រធានាធិបតីអាមេរិក កាលពីថ្ងៃទី៥ ខែវិច្ឆិកា ឆ្នាំ២០២៤ ក្រោយផ្តួលលោកស្រី Kamala Harris ដែលជាអនុប្រធានាធិបតីអាមេរិកបច្ចុប្បន្ន។ ប្រធានាធិបតីអាមេរិក លោក ចូ បៃដិន បានសម្រេចចិត្តដកខ្លួនពីការប្រកួត។
គួរបញ្ជាក់ថា ពិធីស្បថចូលកាន់តំណែងរបស់លោក ត្រាំ នឹងប្រព្រឹត្តទៅនៅវិមានសភាអាមេរិក នាថ្ងៃទី២០ ខែមករា ហើយរូបលោក នឹងធ្វើសច្ចាប្រណិធានចូលកាន់តំណែងមុខតំណែង នៅម៉ោង១២ថ្ងៃត្រង់ ម៉ោងនៅវ៉ាស៉ីនតោន ដែលនឹងត្រូវនឹងខ្ទង់ម៉ោង១២យប់ ថ្ងៃចន្ទឆ្លងចូលថ្ងៃអង្គារសប្តាហ៍ក្រោយ បើតាមម៉ោងនៅកម្ពុជា។ វានឹងក្លាយជាលើកទី២ ដែលលោក ត្រាំ កាន់តំណែងជាប្រធានាធិបតី របស់សហរដ្ឋអាមេរិក ខណៈលោកធ្លាប់កាន់តួនាទីកំពូលនេះម្តងរួចមកហើយ កាលពីចន្លោះឆ្នាំ២០១៧-២០២១៕