ចិន ប្រកាសពន្ធសងសឹក ៣៤% លើការនាំចូលទំនិញទាំងអស់ពីសហរដ្ឋអាមេរិក និងការរឹតបន្តឹងលើការនាំចេញវត្ថុធាតុដើមដ៏កម្រមួយចំនួន

ក្រុងប៉េកាំង៖ប្រទេសចិន បានប្រកាសនៅថ្ងៃសុក្រនេះ នូវវិធានការសងសឹកយ៉ាងខ្លាំងក្លា ដើម្បីឆ្លើយតបទៅនឹងការដំឡើងពន្ធថ្មីៗរបស់ប្រធានាធិបតីអាមេរិក លោក ដូណាល់ ត្រាំ ដែលបានធ្វើឱ្យសង្គ្រាមពាណិជ្ជកម្ម រវាងប្រទេសមហាអំណាចទាំងពីរនេះកាន់តែឡើងកម្ដៅ។ វិធានការថ្មីនេះ រួមមានការដំឡើងពន្ធបន្ថែមលើទំនិញនាំចូលពីសហរដ្ឋអាមេរិករហូតដល់ ៣៤% និងការរឹតបន្តឹងលើការនាំចេញវត្ថុធាតុដើមដ៏កម្រមួយចំនួនដែលមានសារៈសំខាន់សម្រាប់ឧស្សាហកម្មបច្ចេកវិទ្យា។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃសុក្រ ទី៤ ខែមេសា ឆ្នាំ ២០២៥។
ក្រសួងហិរញ្ញវត្ថុចិនបានបញ្ជាក់ថា ពន្ធបន្ថែមទាំងនេះនឹងចាប់ផ្តើមអនុវត្តចាប់ពីថ្ងៃទី ១០ ខែមេសាខាងមុខនេះ។ ការប្រកាសនេះគឺជាការឆ្លើយតបដោយផ្ទាល់ ចំពោះការប្រកាសរបស់លោក ត្រាំ កាលពីថ្ងៃពុធ ដែលបានគំរាមដាក់ពន្ធសរុបរហូតដល់ ៥៤% លើទំនិញចិន ដោយបន្ថែមពន្ធ ៣៤% ទៅលើពន្ធ ២០% ដែលបានដាក់រួចហើយកាលពីដើមឆ្នាំ។
មិនត្រឹមតែប៉ុណ្ណោះ វិស័យកសិកម្មក៏រងផលប៉ះពាល់ផងដែរ ដោយគយចិនបានសម្រេចផ្អាកជាបន្ទាន់នូវការនាំចូលគ្រាប់ធញ្ញជាតិពីក្រុមហ៊ុនអាមេរិក C&D (USA) Inc. ក៏ដូចជាបសុបក្សី និងសាច់ពីក្រុមហ៊ុនអាមេរិកចំនួនបីផ្សេងទៀត។
អ្វីដែលគួរឱ្យកត់សម្គាល់នោះគឺ ប្រទេសចិនក៏បានប្រកាសដាក់ការត្រួតពិនិត្យយ៉ាងតឹងរ៉ឹងលើការនាំចេញរ៉ែដ៏កម្រប្រភេទមធ្យម និងធ្ងន់ ដូចជា សាម៉ារីយ៉ូម (samarium), ហ្គាដូលីនីញ៉ូម (gadolinium), តឺប៊ីញ៉ូម (terbium), ឌីសប្រូស៉្យូម (dysprosium), លូទីត្យូម (lutetium), ស្កេនឌីយ៉ូម (scandium) និងអ៊ីទ្រីយ៉ូម (yttrium) ទៅកាន់សហរដ្ឋអាមេរិក ដោយចូលជាធរមាននៅថ្ងៃទី ៤ ខែមេសា។ ក្រសួងពាណិជ្ជកម្មចិនបានបញ្ជាក់ថា គោលបំណងនៃវិធានការនេះគឺដើម្បីការពារសន្តិសុខ និងផលប្រយោជន៍ជាតិ ក៏ដូចជាបំពេញកាតព្វកិច្ចអន្តរជាតិក្នុងការទប់ស្កាត់ការរីកសាយភាយអាវុធ។
លើសពីនេះ ចិនក៏បានបន្ថែមក្រុមហ៊ុន និងអង្គភាពអាមេរិកចំនួន ១៦ ទៀតទៅក្នុងបញ្ជីត្រួតពិនិត្យការនាំចេញរបស់ខ្លួន ដែលហាមឃាត់ការនាំចេញទំនិញដែលអាចប្រើប្រាស់បានទាំងក្នុងវិស័យស៊ីវិល និងយោធា ទៅកាន់ក្រុមហ៊ុនទាំងនោះ។ ក្រុមហ៊ុនអាមេរិកចំនួន ១១ ផ្សេងទៀតត្រូវបានបញ្ចូលទៅក្នុងបញ្ជី «អង្គភាពដែលមិនគួរទុកចិត្ត» ដែលអនុញ្ញាតឱ្យទីក្រុងប៉េកាំងចាត់វិធានការដាក់ទណ្ឌកម្មបន្ថែមទៀត។ ក្រុមហ៊ុនដែលរងផលប៉ះពាល់រួមមាន Skydio Inc. និង BRINC Drones ដែលត្រូវបានចោទប្រកាន់ពីបទលក់អាវុធទៅឱ្យកោះតៃវ៉ាន់ ដែលចិនចាត់ទុកថាជាផ្នែកមួយនៃទឹកដីរបស់ខ្លួន។
ក្រសួងពាណិជ្ជកម្មចិនបានសង្កត់ធ្ងន់ថា ក្រុមហ៊ុនគោលដៅទាំងនេះបានធ្វើឱ្យប៉ះពាល់យ៉ាងធ្ងន់ធ្ងរដល់អធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍន៍របស់ចិន ហើយនឹងត្រូវហាមឃាត់ពីការវិនិយោគថ្មី ក៏ដូចជាសកម្មភាពនាំចូល និងនាំចេញនៅក្នុងប្រទេសចិន។ ក្រៅពីនេះ ចិនក៏បានចាប់ផ្តើមការស៊ើបអង្កេតពាក់ព័ន្ធនឹងការលក់ទំនិញក្នុងតម្លៃទាបជាងទីផ្សារ (anti-dumping) លើការនាំចូលបំពង់ CT វេជ្ជសាស្ត្រមួយចំនួនពីសហរដ្ឋអាមេរិក និងឥណ្ឌា ក៏ដូចជាការស៊ើបអង្កេតលើការប្រកួតប្រជែងក្នុងឧស្សាហកម្មកាន់តែទូលំទូលាយលើការនាំចូលបំពង់ CT វេជ្ជសាស្ត្រនេះផងដែរ៕