រដ្ឋបាលរាជធានី បាននឹងកំពុងសម្រុកការងារលាបគំនូស លាបខឿន ថែទាំសួនច្បារ ដាំស្មៅ ដាក់ បង្គោលភ្លើងបំភ្លឺផ្លូវថ្មីលើមហាវិថី ឈ្នះឈ្នះ ដើម្បីទទួលពិធីពិធីសម្ពោធវិមានឈ្នះឈ្នះ នៅថ្ងៃទី២៩ ធ្នូ មុខនេះ

   មន្ត្រីរដ្ឋបាលរាជធានីភ្នំពេញបានអោយដឹងថា នាប៉ុន្មានថ្ងៃជាប់គ្នានេះ ក្រុមការងារបាននឹងកំពុងធ្វើសកម្មភាព លាបគំនូស លាបខឿន និងថែទាំសួនច្បារ ការរៀបចំដាំស្មៅ និងការតំឡើងបង្គោលភ្លើងបំភ្លឺផ្លូវថ្មីនៅមហាវិថី ឈ្នះឈ្នះ ឬផ្លូវកប់ស្រូវចំនួន​ ២៦១បង្គោល​ លើចំនួនសរុប​ ២៩៨បង្គោល​ ហើយបង្គោលភ្លើងទាំងនោះត្រូវបានដាក់អោយដំណើរការបំភ្លឺហើយ។

អភិបាលរាជធានីភ្នំពេញលោក ឃួង ស្រេងកាលពីពេលថ្មីៗកន្លងមកនេះបានចុះពិនិត្យនិងជំរុញអោយ មន្ត្រីជំនាញពិសេសមន្ទីរសាធារណការនិងដឹកជញ្ជូនរាជធានីភ្នំពេញ អនុវត្តការងាររួមមាន ការតម្លើងបង្គោលភ្លើងសួនច្បារ តម្លើងបង្គោលភ្លើងហ្វា ដាក់បណ្តាញលូ បើកច្រកកាត់សួនច្បារនៅមហាវិថីឈ្នះឈ្នះនេះ ជាមួយនិងការតុបតែងលំអភ្លើង នៅតាមដើមច័ន្ទគីរីនៅមហាវិថីឈ្នះឈ្នះ ចាប់ពីស្ពានព្រែកព្នៅដល់ផ្លូវជាតិលេខ៦ ។

មន្ត្រីរដ្ឋបាលរាជធានីភ្នំពេញដដែរបានបញ្ជាក់ថា សម្រាប់ត្រៀមកម្មវិធីថ្ងៃទី២៩-៣០-៣១ខែធ្នូឆ្នាំ២០១៨ខាងមុខនេះ រដ្ឋបាលរាជធានីភ្នំពេញ ក៏បានតម្លើងផ្ទាំងសិលាចារឹកធ្វើអំពីថ្មភក់ចំនួន ៦ផ្ទាំងដាក់ស្លាកឈ្មោះមហាវិថី ចាប់ពីផ្លូវជាតិលេខ៤ ដល់ផ្លូវជាតិលេខ៦ លាបកំបោរគល់ឈើ និងលាបខឿនសួនច្បារផងដែរ។

គួរបញ្ជាក់ថា វិមានឈ្នះឈ្នះ ដែលមានទីតាំងស្ថិតនៅតំបន់អភិវឌ្ឍន៍លីយ៉ុងផាត់ ក្នុងសង្កាត់ព្រែកតាសេកខណ្ឌជ្រោយចង្វា គ្រោង នឹងសម្ពោធដាក់អោយប្រើប្រាស់នៅថ្ងៃទី២៩ ខែធ្នូឆ្នាំ២០១៨ខាងមុខនេះ ក្រោមវត្តមានដ៏ខ្ពង់ខ្ពស់ សម្តេចតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ។ ជាមួយគ្នានេះដែរក៏នឹងរៀបចំអោយកម្មវិធីពិពណ៌ចំនួនបីថ្ងៃផងដែរ ហើយដើម្បីអោយពិធីខាងលើប្រព្រឹត្តិទៅបានរលូននិងទទួលជោគជ័យ កាលពីពេលថ្មីៗនេះដែរ លោក ឃួង ស្រេងអភិបាលរាជធានីភ្នំពេញ ក៏បានដឹកនាំមន្ត្រីជំនាញមួយចំនួនចុះពិនិត្យ ទីតាំងនៅជុំវិញវិមានឈ្នះឈ្នះនេះ ដើម្បីត្រៀមរៀបចំសន្តិសុខសណ្តាប់ធ្នាប់ រួមនិងការឈូសឆាយព្រៃត្រែង កាយទឹកបង្ហូដាក់លូផងដែរ។  ការរៀបចំដូច្នេះ គឺដើម្បីជាសោភ័ណ្ឌភាព និងមានភាពងាយស្រួលក្នុងការរៀបចំសន្តិសុខសណ្តាប់ធ្នាប់ ជូនប្រជាពលរដ្ឋ ថ្នាក់ដឹកនាំជាន់ខ្ពស់ ក៏ដូចជាសន្តិសុខសុវត្ថិភាព ដល់សម្តេចតេជោផងដែរ។