ចាប់ខ្លួនមន្ដ្រីនគរបាលម្នាក់ ថតកាំភ្លើង២ដើម បង្ហោះក្នុងហ្វេសប៊ុក

ភ្នំពេញ៖ មន្ដ្រីនគរបាលម្នាក់ ដែលជិះរថយន្តទំនើប ហើយថតកាំភ្លើងវែង ខ្លី ២ដើម បង្ហោះសំញែងអួតគេក្នុងផេកហ្វេសប៊ុកខ្លួន ត្រូវកម្លាំងសមត្ថកិច្ចឃាត់ខ្លួន​។

មន្ដ្រីនគរបាលនៃអគ្គស្នងការដ្ឋាននគរបាល បានថ្លែងប្រាប់នៅថ្ងៃទី១៩ ខែធ្នូ ឆ្នាំ២០១៨នេះថា មន្រ្តីនគរបាលបានប្រើប្រាស់ផេកហ្វេសប៊ុកឈ្មោះ Kongkia VS ដែលថតសំញែងកាំភ្លើង AK និងកាំភ្លើងខ្លីទំនើប នៅក្នុងរថយន្ដម៉ាក ​RangRover ត្រូវកម្លាំងនគរបាលឃាត់ខ្លួនបាន នៅចំណុចស្រុកព្រៃឈរ ខេត្តកំពង់ចាម ដោយ កម្លាំងសមត្ថកិច្ចដកហូតបានកាំភ្លើង AK មួយដើម និងកាំភ្លើងខ្លីមួយដើម គ្រាប់ ៦គ្រាប់ ព្រមទាំងរថយន្ដមួយគ្រឿង ម៉ាក Rang Rover ពាក់ស្លាកលេខភ្នំពេញ2u-0199។

យ៉ាងណាក៏ដោយ ជុំវិញមូលហេតុ នៃការថតកាំភ្លើងបង្ហោះសំញែងតាមបណ្ដាញសង្គមហ្វេសប៊ុកនេះ សមត្ថកិច្ចជំនាញ មិនទាន់បង្ហាញពីអត្តសញ្ញាណមន្ដ្រីនគរបាលខាងលើ មូលហេតុនៅឡើយទេ៕