បុរសម្នាក ថតសម្ញែងកាំភ្លើង២ដើម លើFacebook ត្រូវឃុំខ្លួនដាក់ពន្ធនាគារ
កំពង់ចាម៖ បុរសម្នាក់មានមុខរបរទិញ-លក់រថយន្ដ និងបើកកន្លែងលាងរថយន្ដ ដែលថតសម្ញែងកាំភ្លើង២ដើមតាម Facebook ត្រូវចៅក្រមស៊ើបសួរនៃសាលាដំបូងខេត្តកំពង់ចាម លោក នៅ យ៉ារ័ត្ន បានសម្រេចឃុំខ្លួន ដាក់ពន្ធនាគារជាបណ្ដោះអាសន្នដើម្បីបន្ដនីតិវិធី នៅថ្ងៃទី២១ ខែធ្នូ ឆ្នាំ២០១៨ ដោយ ចោទប្រកាន់ចំនួន២បទល្មើស រួមមាន កាន់កាប់អាវុធដោយគ្មានការអនុញ្ញាត និងប្រើប្រាស់ដោយខុសច្បាប់នូវសារធាតុញៀន។
ស្នងការនគរបាលខេត្តកំពង់ចាម លោកឧត្តមសេនីយ៍ទោ ឯម កុសល បានប្រាប់ ឲ្យដឹងនៅរសៀលថ្ងៃទី២០ ខែធ្នូ ឆ្នាំ២០១៨ថា ឆ្លងតាមការស្រាវជ្រាវ និងសួរនាំយ៉ាងយកចិត្តទុកដាក់នោះ ជនសង្ស័យឈ្មោះ ឃ្លី វណ្ណៈ អាយុ២៧ឆ្នាំ បានសារភាពថា ខ្លួនមានមុខរបរទិញ-លក់រថយន្ដ និងបើកកន្លែងលាងរថយន្ដ នៅខណ្ឌចំការមន រាជធានីភ្នំពេញ ហើយចំពោះចម្លើយដែលប្រាប់សមត្ថកិច្ចថា ខ្លូនធ្វើការនៅក្រសួងមហាផ្ទៃ ផ្នែកស៊ីវិល ខាងស៊ើបអង្កេត ជាចម្លើយភូតកុហកសមត្ថកិច្ច។ សម្រាប់អាវុធទាំង២ដើម ជនសង្ស័យបានខ្ចីពីមិត្តភក្តិ មកដាក់ក្នុងរថយន្ដ ដើម្បីការពារខ្លួនពេលទៅការ បងប្អូនខាងប្រពន្ធ នៅថ្ងៃទី២០ ខែធ្នូ ឆ្នាំ២០១៨ នៅភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម។ ដោយអាវុធ AK ស្វាយវែង ខ្ចីពីឈ្មោះ លី គ័ងច្រឹង អាយុ២៩ឆ្នាំ មុខរបរធ្វើការកាស៊ីណូ នៅខេត្តព្រះសីហនុ និងអាវុធខ្លី ខ្ចីពីឈ្មោះ ឃេ វិនតាវ អាយុ៣០ឆ្នាំ មុខរបរបុគ្គលិកក្រុមហ៊ុន នៅរាជធានីភ្នំពេញ។
ជនសង្ស័យដែលមានគណនី Facebook ឈ្មោះ Kongkia VS ហើយបង្ហោះរូបភាពបង្អួតកាំភ្លើងច្រងេងច្រងាងលើតាប្លូរថយន្តនេះ ឈ្មោះ ឃី វណ្ណៈ អាយុ២៧ឆ្នាំ មានទីលំនៅនៅភូមិ១ ផ្លូវ១៤៣ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ។ នៅម៉ោង១០យប់ នៅថ្ងៃទី១៩ ខែធ្នូ ឆ្នាំ២០១៨ កម្លាំងនគរបាល នៃអធិការដ្ឋាននគរបាលស្រុកព្រៃឈរ បានស្វែងរកឃើញបុគ្គលរូបនេះ នៅមុខវត្តត្រពាំងព្រះ ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ហើយបាននាំមកអធិការដ្ឋាន និងត្រួតពិនិត្យឆែកឆេរ លើរថយន្តម៉ាកឡង់រ៉ូវ៉ែ ពណ៌ខ្មៅ ពាក់ស្លាកលេខ 2U-0199 ឃើញមានអាវុធ២ដើម អាកាស្វាយវែង០១ដើម លេខ៤៣៦២ បង់មួយគ្រាប់គ្មាន និងអាវុធខ្លី០១ដើម ម៉ាក Pak លេខ០៨១៦.០០១០៤៨ បង់០១ គ្រាប់០៦។
លោកឧត្តមសេនីយ៍ទោ ឯម កុសល បានបញ្ជាក់ទៀតថា ក្រោយសួរនាំរឿងអួតអាវុធទាំងពីរដើម និងរថយន្តមួយគ្រឿងខាងលើ និងជនសង្ស័យនេះ គ្មានអត្តសញ្ញាណសម្គាល់អ្វីទាំងអស់ ហើយជនសង្ស័យបានធ្វើតេស្តទឹកម៉ូត រកសារធាតុញៀនឃើញថា មានសារធាតុញៀន៕
