បើកបររថយន្តក្នុងល្បឿនលឿន ខ្វះការប្រុងប្រយ័ត្ន ស្លាប់ម្នាក់

កណ្តាល៖ នគរបាលស្រុកស្អាង បានឲ្យដឹងថា បើកបរក្នុងល្បឿនលឿន ខ្វះការប្រុងប្រយ័ត្ន មិនប្រកាន់ស្តាំ បង្កឲ្យមានគ្រោះថ្នាក់ចរាចរ (រវាងម៉ូតូនិងរថយន្ត) បណ្ដាលអោយស្លាប់១នាក់ និងរបួសធ្ងន់១នាក់ ក្នុង គ្រោះថ្នាក់ដ៏រន្ធត់នេះ កើតហេតុនៅ ថ្ងៃទី២២ ខែធ្នូ ឆ្នាំ២០១៨ វេលាម៉ោង២២,០៥នាទី នៅចំណុចផ្លូវលេខ២១ ភូមិត្រពាំងឈូក ឃុំព្រែកគយ ស្រុកស្អាង ខេត្តកណ្ដាល ។

មានរថយន្ត១គ្រឿង ម៉ាកហ៊ីយ៉ាងដាយ ពណ៌ស គ្មានផ្លាកលេខ អ្នកបើកបរមិនស្គាល់អត្តសញ្ញាណ (រត់គេចខ្លួនបាត់) បានធ្វើដំណើរពីជើងមកត្បូង ។
លុះពេលមកដល់ចំណុចកើតហេតុក៏បានបុកគ្នាជាមួយម៉ូតូហុងដា សេ១២៥ ពណ៌ខ្មៅ សេរី២០១៤ ពាក់ផ្លាកលេខ ភ្នំពេញ1CM-2063 បើកបរដោយឈ្មោះគង់ មិនា ភេទប្រុស អាយុ៣១ឆ្នាំ (ស្លាប់នៅនឹងកន្លែងកើតហេតុ) មុខរបរកសិករ មានទីលំនៅភូមិរកា ឃុំស្នោ ស្រុកព្រៃកប្បាស ខេត្តតាកែវ រួមដំណើរជាមួយឈ្មោះ ស្នា ភេទប្រុស អាយុ២៧ឆ្នាំ របួសធ្ងន់ ។
ចំណែកសាកសពបានប្រគល់អោយក្រុមគ្រួសារ យកទៅធ្វើបុណ្យតាមប្រពៃណី រីឯវត្ថុតាងទាំងពីរបានយកមករក្សាទុកនៅអធិការដ្ឋាន នគរបាលស្រុកស្អាង ដើម្បីកសាងសំណុំរឿងទៅតាមនីតិវិធីនៃច្បាប់ ៕