សម្លាប់ស្ត្រីម្នាក់ ដោយសារ ខឹងជេរដៀល ហើយឃាតរត្រូវចាប់ខ្លួន
ស្វាយរៀង៖ ជនសង្ស័យម្នាក់ជាឃាតករដែលអារកសម្លាប់ស្រ្តីម្នាក់ ត្រូវបានកម្លាំងនគរបាល ព្រហ្មទណ្ឌកម្រិតធ្ងន់ ខេត្តស្វាយរៀង ឃាត់ខ្លួនកាលពីវេលាម៉ោង១៤និង៣០នាទី ថ្ងៃទី២២ ខែធ្នូ ឆ្នាំ២០១៨។
សមត្ថកិច្ចខេត្តស្វាយរៀង បានឲ្យដឹងថា កម្លាំងប៉ុស្តិ៍នគរបាលរដ្ឋបាលឃុំសំយ៉ោង បានទទួលព័ត៌មានពីប្រជាពលរដ្ឋថា នៅភូមិឫស្សីលៀប ឃុំសំយ៉ោង ស្រុកកំពង់រោទិ៍ មានមនុស្សស្លាប់ម្នាក់ឈ្មោះ ចាប ប៉ាក ស្រី អាយុ ៦៣ឆ្នាំ មុខរបរនៅផ្ទះ។ កម្លាំងការិយាល័យជំនាញខេត្ត សហការជាមួយកម្លាំងជំនាញស្រុក និងលោកគ្រូពេទ្យ បានចុះពិនិត្យនិងធ្វើកោសល្យវិច័យសាកសព ឃើញថាមានស្លាកស្នាមអារកនឹងកាំបិត ព្រមទាំងរកឃើញសម្ភារៈរបស់ជនរងគ្រោះ មួយចំនួន គឺលុយចំនួន២៣៤.០០០ រៀល លុយដុល្លារ៦៥, លុយដុង ១លាន៤សែនដុង និងទូរស័ព្ទ១គ្រឿង។ ក្រោយពីការពិនិត្យសមត្ថកិច្ចជំនាញនិងគ្រូពេទ្យសន្និដ្ឋានថា សាកសពនេះស្លាប់ដោយអំពើឃាតកម្ម។
តាមលទ្ធផលនៃការស្រាវជ្រាវ រហូតមកដល់ម៉ោង១៦និង៣០នាទីក្នុងថ្ងៃដដែល សមត្ថកិច្ចបាននាំខ្លួនឈ្មោះ ទួច នួច ភេទប្រុស អាយុ៣៣ឆ្នាំ មានទីលំនៅភូមិឫស្សីលៀប ឃុំសំយ៉ោង ដែលជាមុខសញ្ញាមានការសង្ស័យ យកមកសាកសួរ នៅការិយាល័យជំនាញខេត្ត។ ឆ្លងកាត់តាមការសាកសួរអស់រយៈពេលមួយម៉ោងក្រោយមក ជនសង្ស័យឈ្មោះ ទូច នួច បានឆ្លើយសារភាពថា ខ្លួនពិតជាបានធ្វើសកម្មភាព ដោយយកកាំបិតអារកសម្លាប់ជនរងគ្រោះ ប្រាកដមែន ដោយមូលហេតុ ខឹងនឹងឈ្មោះ ចាប ប៉ាក ជេរដៀលខ្លួនកន្លងមក តែខ្លួនពុំបានយកសម្ភារៈ ឬទ្រព្យសម្បត្តិអ្វីទេ។ រីឯកាំបិតដែលធ្វើសកម្មភាពនោះ ខ្លួនយកទៅបោះចោលនៅក្នុងទឹកស្រះក្រោយផ្ទះរបស់ខ្លួន។
បច្ចុប្បន្នជនសង្ស័យ កំពុងឃាត់ខ្លួន នៅការិយាល័យនគរបាលព្រហ្មទណ្ឌកម្រិតធ្ងន់ ដើម្បីកសាងសំណុំរឿង ចាត់ការតាមច្បាប់ ៕
