យ៉ាងហោចណាស់ស្លាប់៣៧៣នាក់ និង១.៤៥៩នាក់រងរបួស ដោយរលកយក្សស៊ូណាមិ
អាជ្ញាធរឥណ្ឌូណេស៊ី នៅថ្ងៃចន្ទនេះ បានឱ្យដឹងថា ចំនួនអ្នកស្លាប់ នៅក្នុងគ្រោះមហន្តរាយរលកយក្សស៊ូណាមិ កាលពីថ្ងៃសៅរ៍ បានសម្លាប់មនុស្សយ៉ាងហោចណាស់ ៣៧៣នាក់ និងប្រមាណ១,៤៥៩នាក់ផ្សេងទៀតរងរបួស និង១២៨នាក់ បាត់ខ្លួន។
បើតាមការចេញផ្សាយដោយទីភ្នាក់ងារសារព័ត៌មាន Bloomberg នៅថ្ងៃចន្ទ ទី២៤ ខែធ្នូ ឆ្នាំ២០១៨ អាជ្ញាធរឥណ្ឌូណេស៊ី ក៏បានព្រមានផងដែរ ដល់ប្រជាជនរស់នៅតាមតំបន់ឆ្នេរស្ថិតក្បែរភ្នំភ្លើង Anak Krakatau ត្រូវនៅឱ្យឆ្ងាយពីភ្នំភ្លើងមួយនេះ ខណៈមានការព្រួយបារម្ភថារលកយក្សស៊ូណាមិអាចនឹងកើតឡើងជាថ្មី។ រលកយក្សស៊ូណាមិ បានវាយលុកយ៉ាងកក្រើកនៅតាមតំបន់ឆ្នេរនៃច្រកសមុទ្រ Sunda កាលពីសៅរ៍ និងថ្ងៃអាទិត្យ ហើយវាត្រូវបានគេរាយការណ៍ថា កើតឡើងមកពីបាតុភូតបំណាក់ដីនៅបាតសមុទ្រ បន្ទាប់ពីភ្នំភ្លើង Anak Krakatoa បានផ្ទុះឡើង៕
