ចាប់ចោរម្នាក់ ឆក់កាបូបពីស្រ្តីម្នាក់
បាត់ដំបង៖ នារីម្នាក់បានរងគ្រោះ របួសធ្ងន់ធ្ងរបែកមុខមាត់ ដោយសារតែចោរឆក់កាបូបហើយគេចខ្លួនបាត់។ នគរបាលខេត្តបាត់ដំបង បានឲ្យដឹងថា បន្ទាប់ពីមានហេតុការណ៍ចោរឆក់កាបូបនេះ ក្នុងរយៈពេលថ្ងៃក្រោយមក សមត្ថកិច្ចបានស្រាវជ្រាវ ឈានរហូតទៅចាប់ខ្លួនជនសង្ស័យម្នាក់ ហើយកសាងសំណុំរឿងបញ្ជូនទៅតុលាការខេត្ត។
ស្នងការដ្ឋាននគរបាលខេត្តបាត់ដំបង បានឲ្យដឹងថា នៅថ្ងៃទី ៧ ខែ មករា ឆ្នាំ ២០១៩ ដោយអនុវត្តតាមបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ត្រី ជេត វណ្ណនី ស្នងការរងទទួលផែនការងារព្រហ្មទណ្ឌ បានដឹកនាំកម្លាំងនគរបាលជំនាញ ក្នុងផែនធ្វើការស្រាវជ្រាវនិងបង្រ្កាបករណី លួចមានស្ថានទម្ងន់ទោស ឆក់កាបូប មួយករណី ដែលបានកើតឡើង កាលពីថ្ងៃទី៥ ខែមករា ឆ្នាំ ២០១៩ នៅចំណុចភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង ក្នុងនោះបានធ្វើការឃាត់ខ្លួនជនសង្ស័យចំនួន១នាក់ ឈ្មោះ ឆុច វិន ភេទប្រុស អាយុ ២៧ ឆ្នាំ រស់នៅភូមិវត្តលៀប សង្កាត់ចំការសំរោង ក្រុងបាត់ដំបង ក្នុងនោះស្រាវជ្រាវដកហូតបាន៖ ទូរស័ព្ទដៃចំនួន២គ្រឿង កាបូបចំនួន១ ដែលជារបស់ជនរងគ្រោះ ម៉ូតូសង់កូរ៉េចំនួន១គ្រឿង ជាមធ្យោបាយជិះធ្វើសកម្មភាព។ រីឯជនរងគ្រោះឈ្មោះ សារី អាយុ ៣៦ឆ្នាំ រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដបង បានរងរបួសដួលបែកមុខមាត់ ត្រូវបាននគរបាលប្រគល់សម្ភារៈជូនវិញ។
ចំណែកជនស័ង្សយ និងវត្ថុតាង ពាក់ព័ន្ធផ្សេងទៀត បានរៀបសំណុំរឿង បញ្ជូនទៅសាលាដំបូងខេត្តបាត់ដំបង៕
