នឹងមានទីលានប្រណាំងរថយន្តលំដាប់ពិភពលោក
ភ្នំពេញ៖
នៅប្រទេសកម្ពុជា ពុំទាន់មានទីលានប្រណាំងរថយន្តនៅឡើយទេ ប៉ុន្តែនៅពេលខាងមុខនេះ ប្រទេសកម្ពុជា នឹងមានទីលានប្រណាំងរថយន្តលំដាប់លេខ២ នៅលើពិភពលោក ដែលជាការវិនិយោគរួមគ្នារវាងក្រុមហ៊ុនចំនួន២ គឺក្រុមហ៊ុនម៉ុងឫទ្ធីគ្រុប ជាមួយនឹងក្រុមហ៊ុន YAMAMOTO ROCK PRODOUCTS Coltd ដែលមានទីតាំងនៅ ឃុំសែនដី ស្រុកសំរោងទង ខេត្តកំពង់ស្ពឺ ។
បើយោងតាមគណនីហ្វេសប៊ុករបស់ឯកឧត្ដមបណ្ឌិត ម៉ុង ឫទ្ធី H.E Oknha Mong Reththy ដែលបានផ្សព្វផ្សាយកាលពីថ្ងៃទី៨ខែមករាឆ្នាំ២០១៩ បានឱ្យដឹងថា នៅវេលាម៉ោង៥ល្ងាចថ្ងៃទី៧ ខែមករា ឆ្នាំ ២០១៩ ពិធីចុះហត្ថលេខាលើកិច្ចព្រមព្រៀងស្តីអំពីគម្រោង សហប្រតិបត្តិការអាជីវកម្មសាងសង់ទីលានប្រណាំងរថយន្តលំដាប់ថ្នាក់លេខពីរលើពិភពលោក ជាលើកដំបូងបំផុតនៅលើទឹកដីឃុំសែនដី ស្រុកសំរោងទង ខេត្តកំពង់ស្ពឺ រវាងក្រុមហ៊ុនម៉ុង ឫទ្ធីគ្រុប ជាមួយនឹងក្រុមហ៊ុន YAMAMOTO ROCK PRODOUCTS Coltd គម្រោងកីឡាយានយន្តនេះមិនសូវទទួលបានប្រាក់ចំណេញច្រើននោះទេ តែវានឹងអាចធ្វើជាស្ពានចម្លងឱ្យមានការផ្សាផ្ជាប់ការទំនាក់ទំនងរវាងក្រុមកីឡាករប្រទេសទាំងពីរកម្ពុជា-ជប៉ុនរួមជាមួយនឹងបណ្ដាប្រទេសជាច្រើនទៀត នៅលើពិភពលោក ដែលប្រជាជនស្រឡាញ់ចូលចិត្តកីឡាយានយន្តនេះផងដែរ ។
ក្រុមហ៊ុននេះ មានទីលានប្រណាំងរថយន្តដូចខាងលើនេះមួយកន្លែង នៅប្រទេសជប៉ុន មានអាយុកាល១៦ឆ្នាំ រួចមកហើយ យោងតាមបទពិសោធន៍នេះ ក្រុមហ៊ុនយើងទាំងពីរបានឯកភាពគ្នា ចាប់ផ្តើមសាងសង់ទីលានប្រណាំងរថយន្តនេះ អស់រយៈពេល៧ខែកន្លងផុតទៅហើយ ទើបតែបានរៀបចំកិច្ចព្រមព្រៀងដើម្បីចុះហត្ថលេខានៅថ្ងៃនេះ។ ដោយសារតែយើងទាំងពីរ បានផ្លាស់ប្ដូរទស្សនកិច្ចគ្នាទៅវិញទៅមក ធ្វើឱ្យភាគីយើងទាំងពីរ កាន់តែមានទំនុកចិត្តគ្នាទៅវិញទៅមក ៕
