ចំណតរថយន្តក្រុងដែលសាងសង់លើផ្ទៃដី៤ហិកតានិងអាចចតរថយន្តក្រុងបានជាង២០០គ្រឿងបានបញ្ចប់ ការសាងសង់ហើយ

     មន្ត្រីនៃរដ្ឋាករស្វយ័តដឹកជញ្ជូនសាធារណៈរថយន្តក្រុង បានបញ្ជាក់អោយដឹងថា ចំណតរថយន្តនិងអគាររដ្ឋាបាលរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង បានសាង់ឡើងលើផ្ទៃដីទំហំ៤ហិកតា មានអគាររដ្ឋាបាលមួយខ្នង ទំហំ២៥ម៉ែត្រគុណនិង៤០ម៉ែត្រមានកំពស់២ជាន់ និងអាចចតរថយន្តក្រុងបានចំនួន២៥០គ្រឿង។ ចំណតរថយន្តនិងអគាររដ្ឋាបាលរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង បានចាប់ផ្តើមសាងសង់ឡើងកាលពីថ្ងៃទី៣០ មករាឆ្នាំ២០១៨ ដោយគ្រោងនឹងបញ្ចប់ការស្ថាបនានៅ ដើមខែមករា២០១៩នេះ ។

    មន្ត្រីដដែរបានបញ្ជាក់ថា រដ្ឋាករស្វយ័តដឹកជញ្ជូនសាធារណៈ ក្រោមជំនួយរបស់ប្រទេសចិន និងជប៉ុនមានរថយន្តសម្រាប់ដឹកអ្នកដំណើរចំនួន២១៥គ្រឿង ហើយនៅពេលដ៏ខ្លីខាងមុខនេះ នឹងមានការផ្តល់រថយន្តក្រុងនេះ មកឱ្យរដ្ឋបាលរាជធានីភ្នំពេញជាបន្តបន្ទាប់ទៀត សំដៅធ្វើយ៉ាងណាឱ្យការបំរើលើសេវាដឹកជញ្ជូនតាមរថយន្តក្រុងនេះកាន់តែមានភាពល្អប្រសើរនិងកាន់តែទទួលការពេញនិយមពីប្រជាពលរដ្ឋ។

     គួររំលឹកថា បើតាមការលើកឡើងរបស់តំណាំងអង្គកាចៃកា ក្នុងពិធីផ្សព្វផ្សាយពីសេវាដឹកជញ្ជូនសាធារណៈរថយន្តក្រុង កាលពីខែឧសភា ២០១៨កន្លងមកនេះនៅសាលាខណ្ឌទួលគោក បានបញ្ជាក់ ថា សេវាដឹកជញ្ជូនអ្នកដំណើរតាមរថយន្តក្រុងក្នុងមួយឆ្នាំ ដឹកជញ្ជូនអ្នកដំណើរបានប្រមាណ៣លាននាក់ ក្នុងនោះមានទាំងអ្នកដំណើរដែលបង់សេវា និងអ្នកមិនបង់សេវា ដូចជាមនុស្សចាស់ជរា ជនពិកា កម្មករ កម្មការិនីរោងចក្រនិងសិស្សានុសិស្សជាដើម ៕