លួចម៉ូតូបានសម្រេច ជិះបានរត់បានបន្តិច ត្រូវសមត្ថកិច្ចខណ្ឌទួលគោក ចាប់វាយខ្នោះ
(ភ្នំពេញ)៖ យុវជនម្នាក់ជាជាងជួសជុលរថយន្តបានជិះម៉ូតូ មួយគ្រឿងទៅទិញគ្រឿងបន្លាស់រថយន្ត ហើយក៏ចតម៉ូតទុកដោយមិនបានដកសោចេញ រួចក៏ដើរចូលទៅក្នុង ភ្លាមៗនោះ ក៏មានយុវជនអនាថាម្នាក់ដើរមកដល់ ក៏ជិះម៉ូតូយកទៅបាត់បង្កឲ្យមានការភ្ញាក់ផ្អើលដល់ប្រជាពលរដ្ឋ ហេីយក៏នាំគ្នាដេញតាមចាប់ជាមួយសមត្ថកិច្ច។
ហេតុការណ៍ខាងលើនេះ បានកើតឡើងកាលពីវេលាម៉ោង ១១និង៣០នាទីព្រឹក ថ្ងៃទី២៣ ខែមករា ឆ្នាំ២០១៩ នៅចំណុចផ្ទះលេខ២៥ ផ្លូវ២៣៧ ក្រុម៣១ ភូមិ៧ សង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។
ជនសង្ស័យខាងលើដែលកម្លាំងសម្ថតកិច្ចឃាត់ខ្លួនមានឈ្មោះ តាំង រតនៈ ភេទប្រុស អាយុ ២០ឆ្នាំ ជាជនអនាថា ស្នាក់មិនពិតប្រាកដ។ ចំណែកឯជនរងគ្រោះមានឈ្មោះ ដេ វិត ភេទប្រុស អាយុ ១៦ឆ្នាំ មុខរបរ ជាងជួសជុលរថយន្ត ស្នាក់នៅក្នុងសង្កាត់បឹងកក់២ ខណ្ឌទួលគោក។
តាមសំដីរបស់ជនរងគ្រោះបានប្រាប់ឲ្យដឹងថា នៅមុនពេលកើតខ្លួនបានជិះម៉ូតូ មួយគ្រឿង ម៉ាកធូដេ ពណ៌ទឹកប៊ិច ពាក់ស្លាកលេខភ្នំពេញ 1DB-7317 ដោយជិះចេញពីកន្លែងធ្វើរថយន្ត ដើម្បីទៅទិញគ្រឿងបន្លាស់នៅម្ដុំផ្លូវ២៣៧ ពេលទៅដល់ក៏បានឈប់ម៉ូតូ ដោយមិនបានដកសោរចេញពីលេីម៉ូតូឡើយ រួចក៏បានដើរចូលទៅក្នុង។ ក្រោយមកស្រាប់តែមានជនអនាថាម្នាក់បានដើរមកដល់ហើយក៏ឡើងលើម៉ូតូជិះចេញទៅបាត់។ ភ្លាមៗនោះ ជនរងគ្រោះបានឃេីញ ក៏ស្រែកផ្អេីលឆោឡោថាមានចោរលួចម៉ូតូ ក៏រត់ដេញតាមពីក្រោយ ខណៈនោះ ក៏មានកម្លាំងសមត្ថកិច្ចខណ្ឌទួលគោកជិះល្បាត ក៏ធ្វេីការដេញតាមឃាត់ខ្លួនជនសង្ស័យខាងលេីបាននៅចំណុចផ្លូវ២៣០ ហេីយក៏យកមកអធិការខណ្ឌ ដេីម្បីធ្វេីការសាកសួរ។
សម្ថតកិច្ចបានប្រាប់ថា ជនសង្ស័យខាងលើជាជនអនាថាដែលដើរដេកតាមសំយ៉ាបផ្ទះគេ ហើយពេលដើរទៅណាម្ដងៗប៉ះស្អីលួចនឹង ដើម្បីបានលុយទិញថ្នាំជក់។
បច្ចុប្បន្នជនសង្ស័យខាងលើ ត្រូវកម្លាំងសមត្ថកិច្ចឃុំខ្លួនបណ្ដាះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងចាត់ការតាមនិតិវិធីច្បាប់។ ចំណែកឯម៉ូតូជនរងគ្រោះ ត្រូវសមត្ថកិច្ចប្រគល់ជូនទៅវិញ៕
