ការិយាល័យការដ្ឋាន សម្រាប់គម្រោងការពារទឹកជំនន់ និងកែលំអប្រព័ន្ធលូ ប្រឡាយក្នុងរាជធានីភ្នំពេញជំហានទី៤បាននិងកំពុងដំណើរការ នៅបរិវេណសួនច្បារឫស្សីកែវ
ភ្នំពេញ៖ ការិយាល័យការដ្ឋាន ឃ្លាំង និងទីធ្លា សម្រាប់គម្រោងការពារទឹកជំនន់ និងកែលំអប្រព័ន្ធលូ ប្រឡាយក្នុងរាជធានីភ្នំពេញ ជំហានទី ៤ ជាជំនួយឥតសំណងរបស់ប្រទេសជប៉ុន បាននិងកំពុងធ្វើសកម្មភាពតម្លើងចេញជារូបរៀងហើយនៅបរិវេណសួនច្បារឫស្សីកែវ ខណ្ឌឬស្សីកែវ រាជធានីភ្នំពេញ។
គួរបញ្ជាក់ថា គម្រោងការពារទឹកជំនន់ និងកែលម្អប្រព័ន្ធប្រឡាយលូ ជំហានទី៤ ដែលជាគម្រោងហិរញ្ញប្បទានរបស់ប្រទេសជប៉ុន តាមរយៈអង្កការចៃកាចាប់ផ្តើមនៅខែមករា២០១៩ ហើយគ្រោងបញ្ចប់នៅខែតុលា២០២១ ក្នុងទំហំទឹកប្រាក់ប្រមាណ៣០លានដុល្លារ ។ គម្រោងនេះមាន៦ ចំណុចសំខាន់ មានទាំងការដាក់បណ្តាញលូមេ សាងសង់អាងស្តុកទឹកក្រោមដី និងសាងសង់ស្ថានីយ៍បូមទឹក និងការតម្លើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៃស្ថានីយ៍បូមទឹកជាដើម។
គម្រោងទាំង៦ចំណុចខាងលើនេះ រួមមាន៖ ១. ជីកដាក់បណ្ដាញលូមេប្រវែង ៨.២០០ម៉ែត្រ ក្នុងសង្កាត់បឹងកក់១ និងបឹងកក់២ នៃខណ្ឌទួលគោក។ ២. ជីកដាក់បណ្ដាញលូមេប្រវែង ២.៨០០ម៉ែត្រ ក្នុងសង្កាត់វត្តភ្នំ និងសង្កាត់ស្រះចក ក្នុងខណ្ឌដូនពេញ។ ៣. សាងសង់អាងស្តុកទឹកក្រោមដី និងស្ថានីយបូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC ជាប់ដងទន្លេសាប ។ ៤. ជីកដាក់បណ្ដាញលូស្ទាក់ទឹកកខ្វក់ ប្រវែងប្រមាណ ១.៦០០ម៉ែត្រ តាមតីរវិថីព្រះស៊ីសុវត្ថិ ចាប់ពីអាងស្តុកទឹកក្រោមដី និងសាងសង់ស្ថានីយបូមទឹកក្រោមដី ដើម្បីបូមទឹកកខ្វក់បញ្ជូនទៅបណ្ដាញលូមេ នៅផ្លូវលេខ៧០។ ៥. បំពាក់របាមេកានិចស្វ័យប្រវត្តិ ដើម្បីត្រងសំរាមនៅស្ថានីយបូមទឹកចតុមុខ ស្ថានីយបូមទឹកព្រះគម្លង់ ស្ថានីយបូមទឹកផ្សារកណ្ដាល និងស្ថានីយបូមទឹកផ្សារចាស់ ដែលបានសាងសង់រួច នៅក្នុងគម្រោងជំហានទី២ ។ ៦. ផ្គត់ផ្គង់រថយន្តបំពាក់ម៉ាស៊ីនបូមទឹកចល័ត ចំនួន២គ្រឿង៕
