រថយន្តកាម៉ារី បុកអ្នកបើកម៉ូតូ ស្លាប់ម្នាក់

ខេត្តបន្ទាយមានជ័យ ៖ បុរសវ័យចំណាស់ម្នាក់ ត្រូវបានរថយន្តបុកបណ្តាលឲ្យស្លាប់ ពេលជិះម៉ូតូប្តូរគន្លងផ្លូវមិនបានប្រយ័ត្ន នៅវេលាម៉ោង ១០ព្រឹក ថ្ងៃសៅរ៍ ថ្ងៃទី០៩ ខែកុម្ភៈ ឆ្នាំ២០១៩ នៅលើកំណាត់ផ្លូវជាតិលេខ៦ ស្ថិតក្នុងភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ទោ សួន នីប៉ូ នាយរងការិយាល័យ នគរបាលចរាចរណ៍ផ្លូវគោកខេត្ត បានឲ្យដឹងថា៖ជនរងគ្រោះអ្នកបើកបរម៉ូតូឈ្មោះ ឃួន សាវៀន ភេទប្រុស អាយុ៧២ឆ្នាំ នៅភូមិបុស្បូវ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ។ ចំណែករថយន្តម៉ាកកាម៉ារី ពណ៌ខ្មៅ សេរី១៩៩៣ ពាក់ស្លាកលេខ បន្ទាយមានជ័យ ២A .២៨២២ អ្នកបើកបរឈ្មោះ ពេជ្រ វណ្ណដារ៉ា ភេទប្រុស អាយុ៣៥ឆ្នាំ នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។

លោកនាយរងការិយាល័យ បានឲ្យដឹងទៀតថា ៖ មុនពេលកើតហេតុ ជនរងគ្រោះបានបើកម៉ូតូ ពីកើតទៅលិច ប្តូរគន្លងទិសមិនប្រយ័ត្ន ចំណែករថយន្តធ្វើដំណើរទិសដៅ ពីលិចទៅកើត ក្នុងល្បឿនលឿន កន្លែងទីប្រជុំជន ទើបបណ្តាលឲ្យកើតមានគ្រោះថ្នាក់ចរាចរណ៍ធ្ងន់ធ្ងរ រហូតដល់ស្លាប់បែបនេះ ។ ក្រោយពីកើតហេតុ កម្លាំងនគរបាលជំនាញចរាចរណ៍ជើងគោកខេត្ត បាននាំយកអ្នកបើកបររថយន្តនិងវត្ថុតាង ទៅការិយាល័យជំនាញ ដើម្បីរក្សាទុក និងរៀបចំសំណុំរឿងតាមនិតិវធីច្បាប់៕