ចាប់ប្ដី ដែលយកអង្រែ និងដងចប វាយសម្លាប់ប្រពន្ធ ព្រោះប្រច័ណ្ឌប្រពន្ធ ជាមួយអ្នកជិតខាង
ក្រចេះ៖ ប្ដីម្នាក់ ដែលជាមនុស្សប្រើប្រាស់ដោយខុសច្បាប់នូវសារធាតុញៀន ត្រូវបានសមត្ថកិច្ចឃាត់ខ្លួន ពាក់ព័ន្ធករណីអំពីហិង្សា ដោយសារតែភ្លើងប្រច័ណ្ឌវាយប្រពន្ធរហូតដល់ស្លាប់។
ជនសង្ស័យនេះ ឃាត់ខ្លួនបណ្តោះអាសន្ន នៅអធិការដ្ឋាននគរបាលស្រុកសំបូរនិងកំពុងកសាងសំណុំរឿង បញ្ជូនទៅកាន់ការិយាល័យជំនាញខេត្ត នៅរសៀលថ្ងៃទី១០ ខែកុម្ភៈ ឆ្នាំ២០១៩នេះ ដើម្បីបំពេញនីតិវិធីច្បាប់បន្ត។ ហេតុការណ៍នេះកើតឡើងនៅថ្ងៃទី៩ ខែកុម្ភៈ ឆ្នាំ២០១៩នេះ ស្ថិតក្នុងភូមិសំភិនឃុំកំពង់ចាម ស្រុកសំបូរ ខេត្តក្រចេះ។
មន្ត្រីនគរបាលស្រុកសំបូរ បានឲ្យដឹងថា ករណីហិង្សាដោយចេតនាបង្កឡើងដោយ ជនសង្ស័យឈ្មោះ ឈីន សុឃាប អាយុ៣៣ឆ្នាំ រស់នៅភូមិឃុំកើតហេតុខាងលើ បានឈ្លោះប្រកែកជាមួយប្រពន្ធឈ្មោះ អែប ពៅ អាយុ៥០ឆ្នាំ។ ជនសង្ស័យបានយកអង្រែ វាយប្រពន្ធចំក្បាលផ្នែកខាងក្រោយ។ ជនបង្កបានវាយប្រពន្ធរហូតបាក់អង្រែ ហើយជនសង្ស័យ បានទៅយកដងចប ទៅវាយប្រពន្ធបន្ថែមទៀត បណ្ដាលឲ្យប្រពន្ធបែកក្បាលស្លាប់ ភ្លាមៗ។ ក្រោយពេលកើតហេតុ កម្លាំងជំនាញអធិការដ្ឋាននគរបាលស្រុកសំបូរ សហការជាមួយកម្លាំងប៉ុស្តិ៍រដ្ឋបាលឃុំកំពង់ចាម ចុះទៅដល់កន្លែងកើតហេតុ បានធ្វើការឃាត់ខ្លួនជនសង្ស័យមកសួរនាំ នៅអធិការដ្ឋាននគរបាលស្រុកសំបូរ។
ជនសង្ស័យបានសារភាពថា មូលហេតុដែលខ្លួនឈ្លោះប្រកែកវាយប្រពន្ធ បណ្តាលឲ្យស្លាប់ គឺដោយសារប្រច័ណ្ឌប្រពន្ធរបស់ខ្លួន ជាមួយអ្នកជិតខាង។
អធិការនគរបាលស្រុកសំបូរលោកវរសេនីយ៍ឯក ប៊ុន ឈឿន បានថ្លែងប្រាប់ឲ្យដឹងថា ជនដៃដល់បានរករឿងទំនាស់ជាមួយស្រ្តីរងគ្រោះជាប្រពន្ឋ ដោយសាររូបគេប្រចណ្ឌប្រពន្ឋ ខ្លួនជាមួយនិងបងជីដូនមួយ ។ លោកអធិការបានបញ្ជាក់ថា ស្រ្តីរងគ្រោះត្រូវរងការវាយចំក្បាល និងរាងកាយជាមួយនិងអង្រែ ព្រមទាំងដងចប។លោកថា ក្រោយការទទួលព័ត៌មានពីប្រជាពលរដ្ឋភ្លាមៗ កម្លាំងនគរបាលបានចុះទៅដល់កន្លែងកើតហេតុ និងឃាត់ខ្លួនជនកំណាចម្នាក់នេះបាន៕
