ក្រុមមន្ត្រីឧទ្យានុក្ស ប្រមូលអន្ទាក់ចាប់សត្វព្រៃ រាប់ពាន់អន្ទាក់
ភ្នំពេញ៖ អង្គការ Wildlife Alliance Cambodia បានផ្សាយថា ក្រុមមន្ត្រីឧទ្យានុក្ស របស់អង្គការសម្ព័ន្ធមិត្តសត្វព្រៃ កំពុងប្រមូលអន្ទាក់ចាប់សត្វព្រៃ រាប់ពាន់អន្ទាក់ ជារៀងរាល់ឆ្នាំ។ ពួកគាត់ត្រូវចូលទៅក្នុងព្រៃជ្រៅៗ ហើយពេលខ្លះពួកគាត់ត្រូវល្បាតពេញមួយសប្តាហ៍។
សូមបញ្ជាក់ថា កន្លងមកសត្វព្រៃ ក្នុងដែនជម្រកសត្វព្រៃមួយចំនួននេះ តែងរងនូវការបាញ់សម្លាប់ដាក់អន្ទាក់ ពីសំណាក់ក្រុមព្រានព្រៃ ដើម្បីយកបំណែកសាច់ ឬឆ្អឹង ទៅលក់តាមទីផ្សារងងឹត និងសត្វព្រៃខ្លះ ត្រូវបានក្រុមឈ្មួញ លួចលាក់ដឹកជញ្ជូន ទៅលក់នៅតាមបណ្តាហាង ភោជនីយដ្ឋាន អាហារដ្ឋាន សណ្ឋាគារទំនើបៗ និងបញ្ជូនដោយលួចលាក់ទៅបរទេសផងដែរ។
បច្ចុប្បន្នសត្វព្រៃប្រភេទមានដោយកម្រ និងជិតផុតពូជ បានបាត់បង់គួរឲ្យកត់សម្គាល់ ដោយសារការបរបាញ់ និងការដាក់អន្ទាក់ ពីសំណាក់ព្រានព្រៃ។ កត្តាប្រឈម នៃការបាត់បង់សត្វព្រៃនេះ មន្ត្រីឧទ្យានុរក្សបានដើរតួនាទីយ៉ាងសំខាន់ ក្នុងការដើរល្បាត ដើម្បីដោះអន្ទាក់ និងទប់ស្កាត់ការបរបាញ់សត្វព្រៃ នៅក្នុងតំបន់ការពារធនធានធម្មជាតិ ក្នុងភូមិសាស្ត្រខេត្តមណ្ឌលគិរី។
ជាទិសដៅរបស់ក្រុមការងារ ក្រុមមន្ត្រីឧទ្យានុក្ស នឹងបន្តការងារអប់រំ និងផ្សព្វផ្សាយនេះ ទៅកាន់គោលដៅនៃភូមិមួយចំនួនទៀត ដែលទទួលរងនូវការបរបាញ់ និងការដាក់អន្ទាក់សត្វព្រៃ ដើម្បីរួមចំណែកការពារនិងអភិរក្សសត្វព្រៃ ដែលនៅសេសសល់ នាពេលបច្ចុប្បន្ននេះ បន្តទៀត។
អាជ្ញាធរ បានស្នើដល់ប្រជាពលរដ្ឋ ឲ្យបានយល់ដឹងអំពីអត្ថប្រយោជន៍សត្វព្រៃ និងការបញ្ឈប់សកម្មភាពបរបាញ់ ឬដាក់អន្ទាក់សត្វព្រៃ ការបំពុល ព្រមទាំងការបញ្ឈប់បរិភោគសាច់សត្វព្រៃជាអាហារជាដើម៕
