ទិវាវប្បធម៌ជាតិ ៣មីនា លើកទី២១ ដើម្បីរំលឹកដល់គុណូបការៈ និងស្នាដៃដ៏វិសេសវិសាល នៃបុព្វបុរសខ្មែរ
ភ្នំពេញ៖ ទិវាវប្បធម៌ជាតិ៣មីនា ជាទិវាដ៏សំខាន់មួយ របស់ប្រទេសជាតិ ដែលជានិច្ចកាល រាជរដ្ឋាភិបាល បានយកចិត្តទុកដាក់ រៀបចំប្រារព្ធពិធីនេះ ជារៀងរាល់ឆ្នាំ ដើម្បីរំលឹកដល់គុណូបការៈ និងស្នាដៃដ៏វិសេសវិសាល នៃបុព្វបុរសខ្មែរ ដែលបានបន្សល់ទុក នូវកេរមរតកវប្បធម៌ និងតម្លៃមិនអាចកាត់ថ្លៃបាន ដល់កូនចៅជំនាន់ក្រោយ។ នេះបើតាមការផ្សាយរបស់ ផេកហ្វេសប៊ុក របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា។
សម្តេចតេជោ បានថ្លែងថា ការប្រារព្ធទិវាវប្បធម៌ជាតិ ជាការជំរុញ និងផ្សព្វផ្សាយ ផ្ទេរចំណេះដឹង ចំណេះធ្វើ ជំនាញបច្ចេកទេស ហើយនិងទេពកោសល្យវប្បធម៌ ក៏ដូចជាការក្រើនរំលឹក បំផុសស្មារតីស្រឡាញ់វប្បធម៌ជាតិ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាងស្នងឬឫស្សី។ ជូនពរបងប្អូនជនរួមជាតិឲ្យជួបតែសេចក្តីសុខ សេចក្តីចម្រើនគ្រប់ៗគ្នា ជាពិសេសសូមឲ្យដំណើរកម្សាន្ត នាចុងសប្តាហ៍ ប្រកបដោយភាពរីករាយ៕
