បងប្អូននារីបំរើការងារនៅក្នុងមូលដ្ឋានខណ្ឌទួលគោក ៤០០នាក់ទទួលបានកាដូអនុស្សាវរីយ៍ក្នុងពិធីសំណេះសំណាលអបអរសាទរខួបលើកទី១០៨ទិវាអន្តរជាតិនារី៨មិនា

   ពិធីនេះធ្វើឡើងក្រោមអធិបតីភាពលោកលី ណារុណ អនុប្រធានក្រុមការងារថ្នាក់ជាតិចុះជួយខណ្ឌទួលគោក និងលោកឯក ឃុនដឿនអភិបាលខណ្ឌទួលគោក និងមានការចូលរួមពីបងប្អូនជាស្ត្រីចំនួន៤០០នាក់។

   លោកលី ណារុណ បានលើកឡើងថា ក្នុងរបបប៉ុល

ពត៣ឆ្នាំ ៨ខែនិង២០ថ្ងៃ កុំថាឡើយស្ត្រី បុរសក៏ត្រូវពួកវាបំបិទសិទ្ធិសេរីភាពអស់ដែរ សូម្បីតែសិទ្ធិរស់រានមានជីរិត។ ប៉ុន្តែក្រោយថ្ងៃរំដោះ៧មករាឆ្នាំ១៩៧៩ សិទ្ធិសេរីភាពនិងអ្វីៗទាំងអស់ត្រូវបានកើតឡើងវិញក្រោមការដឹកនាំរបស់សម្ដេចអគ្គមហាសេនាបតីតេជោហ៊ុន សែន ដោយយើងមានអ្វីៗទាំងអស់។ ដោយឡែកស្ត្រីត្រូវបានការពារដោយច្បាប់ មានតួនាទី មានឋានៈនៅក្នុងសង្គមនិងមានការការពារនូវអំពើហិង្សាផងដែរ។

    លោកបន្តថា តាមការវាយតម្លៃរបស់សេដ្ឋកិច្ចពិភពលោកនៅឆ្នាំ២០១៨ បានបង្ហាញឲ្យឃើញពីការរីកចម្រើនរបស់បងប្អូនស្ត្រីទាំងវិស័យសេដ្ឋកិច្ចនិងអប់រំដោយស្ត្រីកម្ពុជាទទួលបានលទ្ធផលល្អប្រសើរ ពោលគឺ ទទួលបានចំណាត់ថ្នាក់លេខ  ១១២នៅឆ្នាំ ២០១៦ និងលេខ ៩៣នៅឆ្នាំ ២០១៨។ ទន្ទឹមនឹងនេះស្ត្រីកម្ពុជាក៏បានចូលរួមកម្លាំងពលកម្មនៅក្នុងសង្គមប្រមាណ៧៩% ជាម្ចាស់អាជីវកម្មខ្នាតតូចនៅកម្ពុជាមាន៦៥ភាគរយជាស្ត្រី។ ចំពោះថ្នាក់ដឹកនាំក្រោមជាតិ ទៅថ្នាក់ដឹកនាំជាតិមានស្ត្រីចូលរួមដឹកនាំដូចបុរសដែរ។ ជាក់ស្ដែងនៅក្នុងខណ្ឌទួលគោកនេះមានបងប្អូនស្ត្រីជាច្រើនបានបម្រើការងារពីថ្នាក់ភូមិរហូតដល់ថ្នាក់ខណ្ឌដែលជាអត្រាមួយដែលរាជរដ្ឋាភិបាលចង់បាន។

   គួរបញ្ជាក់ផងដែរថានៅក្នុងឱកាសនៃការសំណេះសំណាលក្នុងពិធីនោះដែរបងប្អូនស្ត្រីទាំង ៤០០នាក់ទទួលបានថវិកាម្នាក់ម្នាក់ចំនួន២ម៉ឺនរៀលនិងសារុងមួយផងដែរ៕