ក្រុមស្រ្តី ប្រារព្វទិវាសិទ្ធិនារីខួបលេីកទី១០៨, ៨ មីនា មានការហាមឃាត់ មិនឲ្យ មានការដេីរហែរក្បួន
ក្រុមសហជីព សមាគម និង អង្គការសង្គមស៊ីវិលដែលកំពុងបំពេញ ការងារដើម្បីចូលរួមលើកកម្ពស់ សិទ្ធិស្រ្តី និងសមភាពយេនឌ័រ និងជាពលរដ្ឋនៅក្នុងព្រះរាជាណាចក្រកម្ពុជា បាននាំគ្នា ប្រារព្វទិវាសិទ្ធនារីខួបលេីកទី១០៨, ៨ មីនា មានការហាមឃាត់ ពីអជ្ញាធរមិនឲ្យ មានការដេីរហែរក្បួន នៅព្រឹកថ្ងៃទី 8 ខែមីនាឆ្នាំ 2019 នេះ នៅទីតាំងស្តាតអូឡាំពិក។
ពិធីនេះ ក្រោមប្រធានបទ«រួមគ្នាបញ្ឈប់អំពើហិង្សាលើស្ត្រីគ្រប់រូបភាព» ។
លោកអភិបាលរងរាជធានីភ្នំពេញ ពីររូប គឺលោកកើត ឆែ និងមាន ចាន់យ៉ាដា បានទៅចូលរួមប្រារព្ធទិវានារីអន្តរជាតិ៨ មីនា នៅព្រឹកនេះ ដោយបានស្ដាប់នូវការរាយការណ៍ និងអានញត្តិពីក្រុមស្ត្រី ផងដែរ។
ក្រុមស្ត្រីទាំងនោះ សូមស្នើដល់រាជរដ្ឋាភិបាលកម្ពុជា ជាពិសេស ក្រសួងកិច្ចការនារី ក្រសួងការងារនិងបណ្តុះបណ្តាលវិជ្ជាជីវៈ ក្រសួងមហាផ្ទៃ និងក្រសួងការបរទេស គណៈកម្មការទប់ស្កាត់ការជួញដូរមនុស្ស ទីស្តីការគណៈរដ្ឋមន្រ្តី និងវិស័យឯកជន បន្តខិតខំប្រឹងប្រែងបន្ថែមទៀត ក្នុងការឆ្លើយតបចំពោះតម្រូវការចាំបាច់ និងបន្ទាន់របស់ស្រ្តី ដើម្បីលុបបំបាត់អំពើហិង្សាលើស្រ្តីគ្រប់ទម្រង់ និងសម្រេចបាននូវគោលនយោបាយ និងផែនការយុទ្ធសាស្ត្រជាតិ ក្នុងការកាត់បន្ថយវិសមភាពយេនឌ័រនិងភាពក្រីក្រនៅកម្ពុជា។
សាលារាជធានីភ្នំពេញ មិនអនុញ្ញាតឱ្យក្រុមអង្គការ-សមាគមជួបជុំ ដង្ហែក្បួនតាមផ្លូវសាធារណៈឡើយ ខណៈដែលអង្គការ-សមាគម ១២ស្ថាប័ន ដឹកនាំក្រុមស្ត្រីដែលធ្វើការតាមវិស័យនានា ដង្ហែក្បួនដាក់ញត្តិជូនស្ថាប័នរដ្ឋាភិបាល ដើម្បីដោះស្រាយបញ្ហាអាទិភាពរបស់ស្ត្រីនៅ ៨ ខែមីនា។
រដ្ឋបាលរាជធានីភ្នំពេញ អនុញ្ញាតឱ្យក្រុមអង្គការ-សមាគម១២ស្ថាប័ន ជួបជុំនៅទីតាំងឯកជនឬទីស្នាក់ការរបស់ខ្លួន ប៉ុន្តែមិនអនុញ្ញាតឱ្យជួបជុំ និងដង្ហែក្បួនចាប់ពីស្តាតអូឡាំពិក ឆ្ពោះទៅទីស្ដីការគណៈរដ្ឋមន្ត្រីឡើយ ក្រោមហេតុផលថា ប៉ះពាល់សណ្ដាប់ធ្នាប់សាធារណៈ។ ការបញ្ជាក់នេះ ធ្វើឡើងក្នុងជំនួបជាមួយតំណាងអង្គការ-សមាគមនៅព្រឹកថ្ងៃទី៥ ខែមីនា។
សាលាក្រុងភ្នំពេញ បញ្ជាក់ថា ក្នុងករណីនៅតែធ្វើការជួបជុំ និងហែក្បួនតាមផ្លូវសាធារណៈ ដែលបណ្ដាលឱ្យប៉ះពាល់ដល់សន្តិសុខ សុវត្ថិភាព សណ្ដាប់ធ្នាប់ និងរបៀប រៀបរយសាធារណៈនោះ អ្នករៀបចំត្រូវទទួលខុសត្រូវទាំងស្រុង។
បម្រាមរបស់សាលាក្រុងនេះ ធ្វើឡើងបន្ទាប់ពីក្រុមអង្គការ-សមាគមនិងសហជីពចំនួន ១២ ស្ស្ថាប័ន ដឹកនាំមនុស្សប្រមាណ ៥រយនាក់ ភាគច្រើន ជាស្ត្រីដែលធ្វើការក្នុងវិស័យផ្សេងៗដើម្បីជួបជុំប្រារព្ធទិវានារីអន្តរជាតិលើក ទី១០៨ នៅថ្ងៃទី៨ ខែមីនា នៅស្តាតអូឡាំពិក និងបន្ទាប់មកនាំគ្នា ដង្ហែក្បូន ទៅដាក់ញត្តិនៅទីស្ដីការគណៈរដ្ឋមន្ត្រី។ ខ្លឹមសារនៃញតិ្តនោះ គឺស្នើសុំឱ្យរដ្ឋាភិបាលដោះស្រាយបញ្ហាអាទិភាព ៧ចំណុចរបស់ស្ត្រី។ ទី១៖ បង្កើត មត្តេយ្យសហគមន៍ និងទារកដ្ឋាននៅតាមកន្លែងការងារ ទី២៖ ជម្រកសុវត្ថិភាពសម្រាប់ស្ត្រីដែលជួបបញ្ហាអំពើហិង្សាក្នុងគ្រួសារ និងសម្រាប់កម្មករស្ត្រី ដែលធ្វើការងារតាមផ្ទះ ទី៣៖ បញ្ឈប់ការបៀតបៀននិងហិង្សាផ្លូវភេទ លើស្ត្រីនៅកន្លែងការងារដោយគ្មានការលើកលែង ទី៤៖ បញ្ឈប់ការប្រើប្រាស់អំពើហិង្សាលើស្ត្រីអ្នកការពារសិទ្ធិមនុស្ស ទី៥៖ កំណែទម្រង់មធ្យោបាយដឹកជញ្ជូនកម្មករក្នុងវិស័យវាយនភណ្ឌកាត់ដេរ និងដេរស្បែកជើង ទី៦៖ កែលម្អលក្ខខណ្ឌការងារ និងពង្រឹងយន្តការការពារអ្នកធ្វើការងារតាមផ្ទះ និងទី៧៖ ពង្រឹងយន្តការការពារសិទ្ធិពលករចំណាកស្រុក ពីការកេងប្រវ័ញ្ចការងារ ការជួញដូរមនុស្ស និងទាសភាពសម័យទំនើប៕
