អប់រំនាយប៉ុស្តិ៍អន្តោប្រវេសន៍ ច្រកទ្វារអន្តរជាតិប៉ោយប៉ែត ពីភាពអសកម្ម
រាជធានីភ្នំពេញ៖ពាក់ព័ន្ធ ភាពអសកម្ម របស់មន្ត្រីនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតនៅពេលមានអ្នកដំណើរ ឆ្លងកាត់ព្រំដែនកម្ពុជា-ថៃ អគ្គនាយកដ្ឋានអន្តោប្រវេសន៍ បានធ្វើការណែនាំអប់រំលោកនាយប៉ុស្តិ៍ ឲ្យយកចិត្តទុកដាក់អនុវត្តឲ្យបានត្រឹមត្រូវ តាមតួនាទីភារកិច្ច និង ការប៉ះពាល់ដល់ប្រជាពលរដ្ឋ ដោយក្នុងនោះត្រូវយកចិត្តទុកដាក់ ត្រូវដាក់ស្លាកអក្សរសម្គាល់សម្រាប់សាធារណជនឲ្យបានជ្រាបថា ការបម្រើសេវានេះ មិនតម្រូវឲ្យមានការបង់ប្រាក់ទេ ។
អគ្គនាយកដ្ឋានអន្តោប្រវេសន៍បានចេញ
សេចក្ដីជូនដំណឹងថា
ក្នុងរយៈពេលប៉ុន្មានថ្ងៃកន្លងមកនេះ មាន បណ្ដាញសារព័ត៌មាន និង បណ្ដាញទំនាក់ទំនងសង្គម បានលើកឡើងអំពីបញ្ហាមិនប្រក្រតីរបស់មន្រ្តីនគរបាលនៅច្រកទ្វារអន្តរជាតិប៉ោយប៉ែត ដោយមានការអះអាងថា មន្រ្តីមួយចំនួនបានទាមទារប្រាក់ក្រៅផ្លូវការ ជាថ្នូរនឹងការបំពេញឯកសារលើលិខិតឆ្លងដែនចេញចូលប្រទេសថៃ។
អគ្គនាយកដ្ឋានអន្តោប្រវេសន៍ សូមជម្រាបជូនដល់សាធារណជនឲ្យបានជ្រាបថា ក្រោយពីបានទទួលព័ត៌មានទាំងនេះ អគ្គនាយកដ្ឋានអន្តោប្រវេសន៍ បានធ្វេីការកោះហៅមន្រ្តីទទួលខុសត្រូវច្រកទ្វារព្រំដែនមកសាកសួរ និងកំពុងចាត់វិធានការស្រាវជ្រាវចំពោះករណីនេះ យ៉ាងយកចិត្តទុកដាក់បំផុត។
អគ្គនាយដ្ឋានអន្តោប្រវេសន៍ សូមប្រកាសជម្រាបជូនសាធារណជន ឲ្យបានជ្រាបថា ក្នុងរយៈពេលកន្លងមកថ្មីៗនេះ មានការលើកឡើងចោទប្រកាន់ក្នុងបណ្តាញសង្គម និងសារព័ត៌មានមួយចំនួនស្តីពីភាពអសកម្ម របស់មន្ត្រីនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ។ ទោះបីការចោទប្រកាន់ទាំងនោះ មិនមានការបង្ហាញ ភស្តុតាងជាក់លាក់ក៏ដោយចុះ ប៉ុន្តែក្រុមប្រឹក្សាវិន័យ នៃអគ្គនាយកដ្ឋានអន្តោប្រវេសន៍ ក៏បានកោះអញ្ជើញថ្នាក់ដឹកនាំ និងមន្ត្រីមួយចំនួន នៃប៉ុស្តិ៍ច្រកទ្វារអន្តរជាតិប៉ោយប៉ែត ស្រាយបំភ្លឺ និងបានចាត់វិធានការដើម្បីបំបាត់ភាពអសកម្មទាំងឡាយ ។
ដើម្បីចៀសវាងភាពអសកម្ម ប៉ះពាល់ដល់ប្រជាពលរដ្ឋ ដែលធ្វើដំណើរឆ្លងកាត់ព្រំដែន ក៏ដូចជាការរក្សា សណ្តាប់ធ្នាប់ និងការសម្រួលដល់ប្រជាពលរដ្ឋខ្មែរ និងជនបរទេសទាំងអស់ ដែលធ្វើដំណើរឆ្លងកាត់ព្រំដែនកម្ពុជា-ថៃ អគ្គនាយកដ្ឋានអន្តោប្រវេសន៍ បានធ្វើការណែនាំអប់រំលោកនាយប៉ុស្តិ៍ ឲ្យយកចិត្តទុកដាក់អនុវត្តឲ្យបានត្រឹមត្រូវ តាមតួនាទីភារៈកិច្ច និង ការប៉ះពាល់ដល់ប្រជាពលរដ្ឋ ដោយក្នុងនោះត្រូវយកចិត្តទុកដាក់៖
– ត្រូវដាក់ស្លាកអក្សរសម្គាល់សម្រាប់សាធារណជនឲ្យបានជ្រាបថា ការបម្រើសេវានេះមិនតម្រូវឲ្យមានការបង់ប្រាក់ទេ ។
– រៀបចំកែលម្អរបញ្ជរបំពេញ បែបបទចេញ ចូល ឲ្យបានសមស្របនិងរៀបចំលំហូរអ្នកដំណើរ ឲ្យមានការតម្រង់ជួរត្រឹមត្រូវ តាមលំដាប់មុនក្រោយ ដើម្បីកុំឲ្យមានការឆ្លៀតឱកាសជួយសម្រួល លឿន រហ័ស រកផលប្រយោជន៍ខុសច្បាប់ ។
– ហាមយកប្រាក់ដើម្បីអនុញ្ញាត ឲ្យយានយន្ត រ៉ឺម៉ក ម៉ូតូកង់បី ម៉ូតូឌុប ដែលធ្វើឲ្យបាត់សណ្តាប់ធ្នាប់នៅបរិវេណច្រកទ្វាអន្តជាតិប៉ោយប៉ែត ។
– មន្ត្រីនគរបាលគ្រប់ច្រកទ្វារព្រំដែនទាំងអស់ (រួមទាំងក្រៅពីច្រកទ្វារអន្តរជាតិប៉ោយប៉ែត) ត្រូវយកចិត្តទុកដាក់ និង បង្កលក្ខណៈងាយស្រួលដល់ពលរដ្ឋខ្មែរ និងបរទេសដែលធ្វើដំណើរឆ្លងកាត់ព្រំដែន ជាពិសេសពលករដែលធ្វើការនៅប្រទេសថៃ ក្នុងរដូវចូលឆ្នាំខ្មែរខាងមុខឆាប់ៗនេះ ដោយមិនត្រូវទទួលប្រាក់កាសឡើយ ។
– ត្រូវពង្រឹងការគោរពបទបញ្ជា វិន័យរបស់កងកម្លាំងនគរបាលជាតិ អប់រំសីលធម៌ ឥរិយាបថ និង អកប្ប-កិរិយា បំពេញការងាររបស់មន្ត្រី យកចិត្តទុកដាក់លើមុខជំនាញវិជ្ជាជីវៈរបស់ខ្លួន និង ធ្វើការដាក់វិន័យយ៉ាងតឹងរឹងបំផុត ចំពោះមន្ត្រីដែលបានប្រព្រឹត្តខុសឆ្គង ។
អាស្រ័យហេតុនេះសូមសាធារណជនមេត្តាជ្រាបជាព័ត៌មាន និង ជួយចូលរួមផ្តល់យោបល់ក្នុងន័យស្ថាបនា ដើម្បីផ្តល់ឱកាសឲ្យមន្ត្រីនគរបាលយើងកែលម្អរសកម្មភាពការងារក្នុងការផ្តល់សេវាដល់ពលរដ្ឋកាន់តែល្អប្រសើរថែមទៀត ។
សូមបញ្ជាក់ថា តាមសេចក្តីរាយការណ៍ថ្មីៗនេះ ពីប្រជាពលរដ្ឋនៅក្រុងប៉ោយប៉ែត និងពលករខ្មែរចូលទៅធ្វើការនៅប្រទេសថៃ នឹកសង្ឃឹមស្មានថា ការផ្លាស់ប្តូរមេប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែត គួរណាស់ថា បានធូរស្បើយមួយកម្រិតពីការគាបសង្កត់យកលុយរបស់មន្ត្រីនគរបាល ប្រចាំច្រកនេះ ប៉ុន្តែមិននឹកស្មានថាលោកប្រធានថ្មីស៊ីលុយធំជាងលោកប្រធានចាស់ គឺចាប់តាំងពីលោក ខឹម ចិត្រា បានមកឡើងកាន់តំណែង ជាប្រធាននគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ជំនួសលោក ស៊ឹម សំអាត ដែលល្បីខាងប្រព្រឹត្អំពើពុករ លួយហើយថែម ទាំងសូកប៉ាន់ពន្យាកំណើត ដើម្បីបានកាន់ តំណែង ធ្វើជាអនុប្រធាននាយកដ្ឋានទទួលទិសទី១ កំពុងពង្រឹងអំណាចជាបន្តទៀត។ ចំណែកឯលោក ខឹម ចិត្រា វិញមិនត្រឹមតែបន្តដើរតាមគំរូអាក្រក់របស់លោក ស៊ឹម សំអាត ប៉ុណ្ណោះទេ គឺថែមទាំងបង្កើនអំពើពុករលួយកាន់តែខ្លាំងទ្វេរឡើង។ ប្រភពពីមន្ត្រីនគរបាលនៅក្នុងអគ្គនាយកដ្ឋានអន្តោប្រវេសន៍ក្រសួងមហាផ្ទៃ មួយចំនួនបានបង្ហើបឲ្យដឹងថា ការដែលលោក ខឹម ចិត្រា ហ៊ានធ្វើអ្វីៗតាមអំពើចិត្ត គឺដោយសារអាងមាននាយឧត្តមសេនីយ៍ គៀត ច័ន្ទថារិទ្ធអគ្គនាយកនៃអគ្គនាយកដ្ឋានអន្តោប្រវេសន៍ ជាបង្អែកដ៏រឹងមាំ។ ប្រសិនបើគ្មាននាយឧត្តមសេនីយ៍ គៀត ច័ន្ទថារិទ្ធ ជាបង្អែករឹងមាំទេនោះ គឺលោក ខឹម ចិត្រា នាយប៉ុស្ដិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត មិនហ៊ានប្រើតួនាទីនិងអំណាចរបស់ខ្លួនប្រព្រឹត្តអំពើពុករលួយយ៉ាងកំរោលដូចសព្វថ្ងៃនេះឡើយ។ មានការអំពាវនាវឲ្យសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចាត់វិធានការទប់ស្កាត់ទង្វើមិនប្រក្រតីនិងអំពើពុករលួយរបស់លោក ខឹម ចិត្រា ជាបន្ទាន់បំផុត។ គួររំលឹកដែរថា ថ្មីៗកន្លងទៅនេះថ្នាក់ដឹកនាំក្នុងអគ្គនាយកដ្ឋានអន្តោប្រវេសន៍ បានកោះហៅលោក ខឹម ចិត្រា មកសាកសួរជុំវិញរឿងអាស្រូវពុករលួយដែលបណ្ដាញព័ត៌មាននានាបានចុះផ្សាយនិងផ្សព្វផ្សាយជាបន្តបន្ទាប់។ ក៏ប៉ុន្តែក្រោយថ្នាក់ដឹកនាំអគ្គនាយកដ្ឋានអន្តោប្រវេសន៍ កោះហៅលោក ខឹម ចិត្រា គឺលទ្ធផលជាក់ស្ដែងលោក ខឹម ចិត្រា ហ៊ានប្រព្រឹត្តអំពើពុករលួយកាន់តែខ្លាំងក្លាថែមទៀត ហើយលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ កំពុងរក្សាភាពស្ងៀមស្ងាត់។ ទន្ទឹមនឹងនេះលោក ខឹម ចិត្រា តែងប្រើប្រាស់ឈ្មោះនាយឧត្តមសេនីយ៍ គៀត ច័ន្ទថារិទ្ធ ដើម្បីបិទបាំងទង្វើមិនប្រក្រតីនិងរឿងអាស្រូវពុករលួយរបស់ខ្លួនយ៉ាងក្រអឺតក្រទម។ បើតាមការបង្ហើបពីសំណាក់សមត្ថកិច្ចពាក់ព័ន្ធនៅច្រកទ្វារអន្តរជាតិប៉ោយប៉ែត បានឲ្យដឹងថា ទំនងជាលោក ខឹម ចិត្រា ចំណាយដើមទុនយ៉ាងច្រើនក្នុងការទទួលបានតំណែងជាមេនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ទើបខំប្រឹងប្រព្រឹត្តអំពើពុករលួយស្រង់ដើមយ៉ាងតក់ក្រហល់។ ប្រភពបានឲ្យដឹងទៀតថាលោក ខឹម ចិត្រា តែងប្រើឈ្មោះនាយឧត្តមសេនីយ៍ គៀត ច័ន្ទថារិទ្ធ ដើម្បីការពារទង្វើរបស់ខ្លួនក្នុងខណៈដែលថ្នាក់ដឹកនាំក្រសួងមហាផ្ទៃ កំពុងរក្សាភាពស្ងៀមស្ងាត់នៅឡើយ។ ហេតុនេះហើយទើបលោក ខឹម ចិត្រា នាយប៉ុស្ដិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត និងបក្ខពួកកំពុងបង្កើនសកម្មភាពនៃអំពើពុករលួយយ៉ាងកំរោលដោយគ្មានញញើតអ្វីទាំងអស់៕
