សម្ដេចក្រឡាហោម: គ្រឿងញៀន គឺជាបញ្ហាស្មុគស្មាញ ដែលពិភពលោកកំពុងទទួលរងការគំរាមកំហែង
ភ្នំពេញ៖ សម្ដេចក្រឡាហោម បានគូសបញ្ជាក់ថា គ្រឿងញៀន គឺជាបញ្ហាស្មុគស្មាញមួយ ដែលពិភពលោកកំពុងទទួលរងការគំរាមកំហែង ហើយស្ថានភាពកំណើននៃការផលិត ការចរាចរ និងការប្រើប្រាស់គ្រឿងញៀន កំពុងតែវិវត្តន៍ទៅតាមចរន្តនៃភាពរីកចំរើនផ្នែកបច្ចេកវិទ្យា វិទ្យាសាស្ត្រ សេដ្ឋកិច្ច និងសង្គម ដែលនិន្នាការនេះ គឺជាការប្រឈមដ៏លំបាកទាំងការអនុវត្តច្បាប់ និងការដាក់ចេញវិធានការដោះស្រាយសម្រាប់ប្រទេសដែលកំពុងរងគ្រោះ។
នៅរសៀលថ្ងៃ ទី២១ ខែមីនា ឆ្នាំ២០១៩ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីពិធីបិទសន្និបាតបូកសរុបការងារត្រួតពិនិត្យគ្រឿងញៀនឆ្នាំ២០១៨ និងលើកទិសដៅការងារឆ្នាំ២០១៩និងពិធីបិទកិច្ចប្រជុំបូកសរុបលទ្ធផលការងារអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣។
លោកនាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអានរបាយការណ៍សង្ខេបជូនអង្គសន្និបាត ហើយជាការកត់សំគាល់ ក្នុងឆ្នាំ២០១៨កន្លងទៅ បទល្មើសគ្រឿងញៀនដែលសមត្ថកិច្ចបង្ក្រាបបានមានសរុបចំនួន៨០០២ករណី ឃាត់ខ្លួនអ្នកជាប់ពាក់ព័ន្ធចំនួន១៦២១៦នាក់ និងគ្រឿងញៀនសរុបចំនួន៥៣៦គីឡូក្រាម។
បន្ទាប់មកសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថា កន្លងមក មជ្ឈដ្ឋានខ្លះបានរិះគន់រាជរដ្ឋាភិបាលកម្ពុជាថា បានបរាជ័យក្នុងការងារប្រយុទ្ធប្រឆាំងគ្រឿងញៀន ដោដោយសដោយសម្ដេចបានឆ្លើយតបថា រាជរដ្ឋាភិបាលមិនមានគំនិតខឹងសម្បារចំពោះការរិះគន់នេះទេ ព្រោះនៅលើពិភពលោក គ្មានប្រទេសណាមួយធ្វើបានជោគជ័យនោះទ ប៉ុន្តែសម្រាប់កម្ពុជា សូមមជ្ឈដ្ឋានរិះគន់ទាំងនោះ មានការពិចារណាចំពោះកិច្ចខិតខំប្រឹងប្រែង និងលទ្ធផលជាបន្តបន្ទាប់ផង។
ក្រឡាហោម ស ខេង បានមានប្រសាសន៍ថា មន្ត្រីនគរបាលដែលជាប់ពាក់ព័ន្ធបទល្មើសគ្រឿងញៀននៅមជ្ឈមណ្ឌលកម្សាន្ត រ៉ក់ ហើយដែលកំពុងរត់គេចខ្លួននោះ គួរតែចូលមកសារភាពកំហុស ពីព្រោះសម្ដេចអះអាងថា ជននោះនឹងមិនអាចរត់ទៅណារួចឡើយ ហើយសមត្ថកិច្ចត្រូវកំណត់យកទីកំសាន្ត និងកាស៊ីណូ ជាមុខសញ្ញាស្រាវជ្រាវ និងបង្ក្រាបគ្រឿងញៀន។
សម្ដេចក៏បានណែនាំស្នងការនគរបាលខេត្តទាំងអស់ត្រូវក្ដាប់ក្ដីកង្វល់ប្រជាពលរដ្ឋពាក់ព័ន្ធនឹងករណីគ្រឿងញៀន និងការរំខានសេចក្ដីសុខរបស់ពួកគាត់ នៅតាមមូលដ្ឋានឲ្យបាន ហើយត្រូវមានវិធានការទប់ស្កាត់បញ្ហាគ្រឿងញៀន ដែលកំពុងហូរទៅតំបន់ជនបទ និងដាច់ខាតមិនត្រូវបណ្ដោយឲ្យគ្រឿងញៀនមាននៅក្នុងសាលារៀនឡើយ។
សម្ដេចក៏បានក្រើនរំលឹកមន្ត្រីនគរបាលទាំងអស់ មិនត្រូវពាក់ព័ន្ធនឹងបទល្មើសគ្រឿងញៀននោះទេ ហើយរឹតតែមិនត្រូវពាក់ព័ន្ធជាដាច់ខាតការប្រើវប្បធម៌អន្តរាគមន៍ នៅក្នុងបញ្ហាគ្រឿងញៀន ដោយសម្ដេចបានបញ្ជាក់វប្បធម៌អន្តរាគមន៍នេះ មិនថាតែបញ្ហាគ្រឿងញៀនទេ វានឹងធ្វើឲ្យប៉ះពាល់ដល់ប្រព័ន្ធយុត្តិធម៌ទាំងមូលតែម្ដង ហើយថ្នាក់ដឹកនាំនគរបាលត្រូវតាមដានសកម្មភាពមន្ត្រីរបស់ខ្លួន និងមានវិធានការភ្លាមប្រសិនបើសង្ស័យជាប់ពាក់ព័ន្ធគ្រឿងញៀន។
ចំពោះសំណូមពររបស់ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដែលបានស្នើធ្វើវិសោធនកម្មច្បាប់ស្ដីពីការប្រយុទ្ធប្រឆាំងគ្រឿងញៀន ពាក់ព័ន្ធនឹងការគ្រប់គ្រងទ្រព្យសម្បត្តិជនពាក់ព័ន្ធបទល្មើសគ្រឿងញៀននោះ សម្ដេចបានណែនាំឲ្យភាគីពាក់ព័ន្ធត្រូវរៀបចំធ្វើសេចក្ដីព្រាងសេចក្ដីស្នើវិសោធនកម្មច្បាប់នេះឲ្យបានក្នុងឆមាសទី២ឆ្នាំ២០១៩។
សម្រាប់ការងារប្រយុទ្ធប្រឆាំងគ្រឿងញៀន ពិសេសការអនុវត្តទិសដៅការងារសម្រាប់ឆ្នាំ២០១៩ និងការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ សម្ដេចក្រឡាហោម បានអំពាវនាវសប្បុរសជន អង្គការ សមាគម វិស័យឯកជន និងដៃគូអភិវឌ្ឍន៍ជាតិ និងអន្តរជាតិ សូមចូលរួម និងផ្ដល់ការគាំទ្រតាមគ្រប់លទ្ធភាព ជាមធ្យោបាយ សម្ភារៈ បច្ចេកទេស និងថវិកា ដើម្បីដោះស្រាយបញ្ហាគ្រឿងញៀន។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបង្ហាញជំនឿចិត្តយ៉ាងមុតមាំលើឆន្ទៈ និងការប្ដេជ្ញាចិត្ត របស់ថ្នាក់ដឹកនាំ និងមន្ត្រីពាក់ព័ន្ធ ថានឹងពិតជាខិតខំប្រឹងប្រែងអនុវត្តឲ្យបានជោគជ័យ ប្រកបដោយលទ្ធផលត្រចះត្រចង់នូវរាល់ទិសដៅការងារ ដែលបានកំណត់សម្រាប់ឆ្នាំខាងមុខជាបន្តបន្ទាប់ទៀត ពិសេសផែនការសម្រាប់ឆ្នាំ២០១៩នេះ៕
