ជនសង្ស័យម្នាក់ បេីករថយន្ដបំបុកប៉ារ៉ាស់សមត្ថកិច្ចនគរបាលចរាចរាចរណ៍រត់ចែកជេីងគ្នា , រថយន្តមាន ស្ទីកគ័របិតលេីកញ្ចក់រថយន្ដ និងដាក់វាំងននបិតបាំងពីខាងក្នុង
ខេត្តកំពង់ស្ពឺ ÷ ករណីជនសង្ស័យបេីករថយន្ដបំបុកប៉ារ៉ាស់សមត្ថកិច្ចនគរបាលចរាចរណ៍(ជាន់សាជី)នៅគោលដៅអនុវត្តត្រួតពិនិត្យច្បាប់ចរាចរណ៍នៅមុខមន្ទីរសាធារណៈការខេត្តកំពង់ស្ពឺ លេីផ្លូវជាតិលេខ៤ ត្រូវបានឃាត់ខ្លួន កសាងសំណុំរឿងចាត់ការតាមនីតិវិធីច្បាប់។
ស្នងការនគរបាលខេត្តកំពង់ស្ពឺ បានឲ្យដឹងថា នៅគោលដៅត្រួតពិនិត្យពង្រឹងការ អនុវត្ដន៍ច្បាប់ចរាចរណ៍ផ្លូវគោក លេីផ្លូវជាតិលេខ៤ មុខមន្ទីរសាធារណៈការនិងដឹកជញ្ជូនខេត្ដ កាលពីថ្ងៃទី៣០ ខែមីនា ឆ្នាំ២០១៩ វេលាម៉ោង៧.៤០នាទី មានជនបង្កបេីករថយន្ត មួយគ្រឿងម៉ាក Nissan ប្រភេទរថយន្តកែឆ្នៃដឹកដី ពណ៌ស ពាក់ផ្លាកលេខ ចង្កូតស្តាំKPS.0536 សណ្ដោងរឺម៉ក ដឹកគ្រឿងចក្រ ជនបង្កមានឈ្មោះម៉ៅ សំរិទ្ធ អាយុ ២៧ឆ្នាំ រស់នៅភូមិរំលោង សង្កាត់កណ្ដោលដុំ ក្រុងច្បារមន ខេត្តកំពង់ស្ពឺ បើកបរពីទិសខាងលិចទៅទិសខាងកើត លុះមកដល់ចំណុចគោលដៅត្រួតពិនិត្យចរាចរណ៍បានបេីកបំបុក”សាជី” ដែលដាក់ជាសញ្ញាសំគាល់ធ្វេីចរាចរណ៍ ធ្វើឲ្យនគរបាលរត់ចែកជេីងសឹងតែមិនទាន់ ក្រោយមានសកម្មភាពហេតុការណ៍ខាងលេី ជនបង្កបានព្យាយាមបេីករថយន្ដរត់ទៅមុខបន្ដ មិនឈប់នៅកន្លែងកើតហេតុនោះទេ សមត្ថកិច្ចនគរបាលបានធ្វើអន្ដរាគមន៍ភ្លាមៗចាប់ឃាត់រថយន្ដនិងជនបង្កបាននៅចំណុចមុខធនាគារវឌ្ឍនៈចំងាយប្រមាណ ១ គីឡូម៉ែត្រពីកន្លែងគោលដៅត្រួតពិនិត្យ។
តាមការបញ្ជាក់ឲ្យដឹងពីមន្រ្ដីនគរបាលចរាចរណ៍ដែល នៅបញ្ជាចរាចរណ៍ត្រួតពិនិត្យការអនុវត្ដន៍ច្បាប់ចរាចរណ៍ផ្លូវគោក រឿងហេតុដំបូង កំលាំងបានធ្វើសញ្ញាបញ្ជាអោយរថយន្ដចូលអមខាងស្ដាំដៃដេីម្បីត្រួតពិនិត្យឯកសារមួយ ចំនួននិងពិនិត្យស្ទីកគ័របិតលេីកញ្ចក់រថយន្ដ និងដាក់វាំងននបិតបាំងពីខាងក្នុង ស្រាប់តែរថយន្ដមិនព្រមបន្ថយល្បឿនតាមការបញ្ជារបស់មន្រ្ដីនគរបាលចរាចរណ៍ទេ រួចបេីកសំដៅមករកនគរបាលតែម្ដង ធ្វើអោយមានការភិតភ័យរត់ចែកជេីងគ្នាសឹងតែមិនទាន់ ស្របពេលនោះក៏បេីកជាន់សាជីដែលដាក់ជាសញ្ញានៅគោលដៅតែម្ដងបណ្ដាលឲ្យខូចខាតសាជីចំនួន ២ ។
ករណីនេះសមត្ថកិច្ចនគរបាលចរាចរណ៍បានធ្វេីការ ឃាត់ ខ្លួនជនបង្ក(អ្នកបើកបរ)នឹងរថយន្តមករក្សាទុកនៅការិយាល័យចរាចរណ៍ផ្លូវគោកដើម្បីកសាងសំណុំរឿងបញ្ជូនទៅស្ថាប័នអយ្យការចាត់ការតាមនីតិវិធីច្បាប់៕
