ក្មេងប្រុស៥នាក់បានយកចេញពីរូងភ្នំថាំលួង នៅសល់៨នាក់ទៀត កំពុងរង់ចាំការសង្គ្រោះ បន្ត

ទីក្រុងបាងកក៖ គិតមកដល់ពេលនេះក្មេងប្រុស៥នាក់បានយកចេញពីរូងភ្នំថាំលួងនៅសល់៨នាក់ទៀត កំពុងរង់ចាំការសង្គ្រោះក្រោយប្រតិបត្តិការសង្គ្រោះបានចាប់ផ្តើមជាលើកទីពីរ តែប៉ុន្មានម៉ោងប៉ុណ្ណោះ។ក្មេងប្រុស ៥ក្នុងចំណោម១៣នាក់ ត្រូវបានយកចេញពីរូងភ្នំថាំលួង នៃខេត្តឈៀងរ៉ាយ ភាគខាងជើងប្រទេសថៃបានសម្រេចសង្គ្រោះយកចេញដោយសុវត្ថិភាព។
ពួកគេទាំងអស់ ១៣នាក់ បានជាប់ក្នុងនោះ គិតចាប់តាំងពីថ្ងៃទី២៣ ខែមិថុនា មកម្ល៉េះ។ នេះបើតាមការចេញផ្សាយដោយ CNN នាល្ងាចថ្ងៃចន្ទ ទី០៩ ខែកក្កដា ឆ្នាំ២០១៨។

បើតាមក្រុមជំនាញ ក្រុមសង្គ្រោះនឹងព្យាយាមយកមនុស្សទាំង ០៨នាក់ទៀត ដែលកំពុងបន្តជាប់ក្នុងរូងភ្នំនៅឡើយ ហើយបើមិនមានភ្លៀងធ្លាក់បន្ថែម ឬបញ្ហាបច្ចេកទេសអ្វីទេនោះ ក្រុមសង្គ្រោះនឹងបន្តប្រតិបត្តិការរហូតដល់យប់ជ្រៅតែម្តង ដើម្បីសង្គ្រោះមនុស្សរហូតទាល់តែអស់ចេញពីរូងភ្នំ។

គួរបញ្ជាក់ថា អាជ្ញាធរថៃមិនទាន់ផ្តល់ការបញ្ជាក់ ទៅលើឈ្មោះរបស់ក្មេងៗទាំង ៥នាក់ ដែលត្រូវបានសង្គ្រោះជាផ្លូវការនោះឡើយ ដែលប្រការនេះអាចនិយាយបានថា ត្រូវរង់ចាំពួកគេសង្គ្រោះមនុស្សឲ្យអស់គ្នាសិន និងប្រាកដថា គ្មានមនុស្សណាម្នាក់រងគ្រោះ ទើបសន្និសីទសារព័ត៌មានផ្លូវការមួយ ត្រូវរៀបចំជាក្រោយ៕