លោក ស ថេត បដិសេធចំពោះសារព័ត៌មាន ដែលចុះផ្សាយថាស្នងការក្រុង មានបំណងបង្កើតក្រុមកុម្ម៉ង់ដូថ្មី

ភ្នំពេញ៖ នៅថ្ងៃទី២២ឧសភានេះ ស្នងការដ្ឋាននគរបាលរាជធានីភ្នំពេញ សូមបដិសេធទាំងស្រុងចំពោះសារព័ត៌មានទាំងឡាយដែលចុះផ្សាយថាស្នងការក្រុង មានបំណងបង្កើតក្រុមកុម្ម៉ង់ដូថ្មី ជាព័ត៌មានមិនគ្រប់ជ្រុងជ្រោយឡេីយ​។ ស្នងការដ្ឋាននគរបាលរាជធានីភ្នំពេញ បានបញ្ជាក់ថា លោក ឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានស្នើភាគីវៀតណាម ជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ដែលលោកស្នងការ មានបំណងបង្កើតឡើង។

ស្នងការដ្ឋានគរបាលរាជធានីភ្នំពេញ មានបំណងកែសម្រួល និងបំប៉នក្រុមអន្តរគមន៍ដែលមានស្រាប់ ឱ្យទៅជាក្រុមអន្តរាគមន៍ពិសេស ដោយក្រុមនេះ នឹងត្រូវទទួលវគ្គបំប៉នជំនាញបន្ថែមទាំងក្នុង និងក្រៅប្រទេស។

ថ្មីៗនេះ ក្នុងឱកាសជួបជាមួយប្រតិភូវៀតណាម លោកឧត្តមសេនីយ៍ ស ថេត អគ្គស្នងការរង និងស្នងការនគរបាលរាជធានីភ្នំពេញ បានស្នើដល់ភាគីវៀតណាមជួយរៀបចំបើកវគ្គសិក្សាសំខាន់ៗសម្រាប់ក្រុមអន្តរាគមន៍ពិសេសមួយនេះផងដែរ។

លោក ឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានស្នើភាគីវៀតណាម ជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ ដែលឯកឧត្ដមស្នងការ មានបំណងបង្កើតឡើង។

ការស្នើនេះគ្រាដែលលោកឧត្ដមសេនីយ៍ឯក ស ថេត នាព្រឹកថ្ងៃទី២១ ខែឧសភា ឆ្នាំ២០១៩នេះ បានទទួលជួបគណ:ប្រតិភូវៀតណាម ដែលមកបំពេញទស្សនកិច្ច នៅស្នងការដ្ឋាននគរបាលរាជធានីភ្នំពេញ។

លោកស ថេត បានថ្លែង ថា លោកមកកាន់តំណែង ជាស្នងការនគរបាលរាជធានីភ្នំពេញ មិនទាន់បាន១ឆ្នាំនៅឡើយទេ ដោយឯកឧត្ដមមានបំណងបង្កើតក្រុមកុម៉ង់ដូ (ក្រុមអន្តរាគមន៍ដែលមានស្រាប់)​ របស់ស្នងការដ្ឋាននគរបាលរាជធានីភ្នំពេញ ដែលមានគ្នាប្រមាណជា៦០នាក់។

ក្រុមកុម៉ង់ដូនេះ គឺត្រូវចេះរបៀបបាញ់កាំភ្លើងវែង កាំភ្លើងខ្លី និងរបៀបការពារថ្នាក់ដឹកនាំផងដែរ។

នៅចំពោះមុខគណៈប្រតិភូវៀតណាម លោកស្នងការនគរបាល រាជធានីភ្នំពេញ បានស្នើឲ្យទទួលយកសំណើជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញនេះ រាយការណ៍ជូនថ្នាក់ដឹកនាំវៀតណាមផង ព្រោះធនធានមនុស្ស និងសម្ភារៈសម្រាប់បំពាក់នោះ គឺខាងស្នងការរាជធានីភ្នំពេញ បានជ្រើសរើស និងបញ្ជាទិញរួចរាល់ហើយ តែនៅខ្វះការបណ្ដុះបណ្ដាលលើជំនាញនេះប៉ុណ្ណោះ។

លោក ឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានឲ្យដឹងដែរ ថា ចាប់ពីពេលនេះតទៅ នៅប្រទេសកម្ពុជា នឹងមានកិច្ចប្រជុំធំៗជាច្រើន ហើយក្រុមកុម៉ង់ដូនេះទៀតសោត ក៏ជួយបន្ថែមទៀតទៅលើការការពារសន្តិសុខ សណ្ដាប់ធ្នាប់ប្រជាពលរដ្ឋ នៅក្នុងរាជធានីភ្នំពេញ ឲ្យបានកាន់តែល្អប្រសើរ ថែមទៀតផង។
គណ:ប្រតិភូវៀតណាម បានសន្យា ថា នឹងយកសំណើនេះទៅរាយការណ៍ ជូនថ្នាក់ដឹកនាំរបស់ខ្លួន ដើម្បីពិចារណា ទៅលើការជួយបណ្ដុះបណ្ដាល និងបំប៉នជំនាញដល់ក្រុមកុម៉ង់ដូ របស់ស្នងការដ្ឋាននគរបាលរាជធានីភ្នំពេញ៕