រលំអគារកំពស់៧ជាន់ សាងសង់ដោយជនជាតិចិន សង់អំពីដែកធ្វើជាសសរ
ខេត្តព្រះសីហនុ៖ នៅវេលាម៉ោង៤:១០នាទី ព្រឹកថ្ងៃទី២២ខែមិថុនាឆ្នាំ២០១៩ ថ្មីៗនេះ អគារកំពស់៨ជាន់ ដែលសាងសង់ឡើងដោយជនជាតិចិន ជាប់ការ៉ាសលាងឡានអរុណរះ ក្រោយមន្ទីរពេទ្យកម្មករ សង្កាត់លេខ៤ក្រុងព្រះសីហនុ។
មានមនុស្សស្លាប់និងរបួសជាច្រើននាក់ នៅជាប់ក្នុងអគារ ពេលនេះសមត្ថកិច្ចគ្រប់ផ្នែក កំពុងជួយសង្គ្រោះជនរងគ្រោះ។
តាមសាក្សីជាកម្មករសំណង់ ដែលបានចេញរួចពីក្នុងអគារបានឲ្យដឹងថា៖ នៅក្នុងអគារមានកម្មករសំណង់ស្នាក់នៅតាមបន្ទប់នានា ចាប់ពីជាន់ទី២ រហូតដល់ជាន់ទី៦ រីឯជាន់ទី៧&៨មិនមានកម្មករស្នាក់នៅឡើយ។
លោកឧត្តមសេនីយ៍ត្រី ជិន វិទ្យា ស្នងការស្តីទី នៃស្នងការដ្ឋាននគរបាលខេត្តព្រះសីហនុ កំពុងដឹកនាំកងកម្លាំងចុះជួយសង្គ្រោះជនរងគ្រោះ។
មានជនរងគ្រោះខ្លះបានលូនចេញរួច ប្រហែលជាង១០នាក់ ក្រៅពីនោះ នៅជាប់ក្នុងអគារនៅឡើយ។
លោកយន្ត មីនអភិបាលខេត្តព្រះសីហនុដែលដឹកនាំកម្លាំងជួយសង្គ្រោះផ្ទាល់មានប្រសាសន៏ប្រាប់ជាបឋមថា គិតមកត្រឹមម៉ោងជិត៩ព្រឹកថ្ងៃដដែល នៅមានមនុស្ស៣នាក់បានស្លាប់និងជាង១០នាក់ទៀតរងរបួស ហើយជនរងគ្រោះភាគច្រើនជាកម្មករសំណង់។ បើតាមលោកអភិបាលខេត្តបញ្ជាក់ថា ចំនួនជនរងគ្រោះអាចនឹងកើនឡើងថែមទៀត ក្រោយគំនរបាក់បែកបានកាយរួច ក្នុងនោះសមត្ថកិច្ចចម្រុះនិងក្រុមសង្គ្រោះរាប់រយនាក់ត្រូវបានបញ្ជូនមកកាន់កន្លែងកើតហេតុ ដើម្បីអន្តរាគមន៍បន្ថែម៕
