ឥទ្ធិពលគ្រឿងញៀន បុរសម្នាក់ យកសាំងចាក់ស្រោចលើខ្លួនដុតខ្លួនឯង

ភ្នំពេញ ៖ ដោយសារឥទ្ធិពលនៃកាប្រើប្រាស់គ្រឿងញៀនហួសកម្រិតបានធ្វើឲ្យបុរសម្នាក់ បាត់ម្ចាស់ការក្នុងគ្រប់គ្រងខ្លួនឯង បានយកសាំងចាក់ស្រោចលើខ្លួនដុតខ្លួនឯងទាំងរស់បណ្តាលអោយស្លាប់ភ្លាមៗនៅកន្លែងកើតហេតុកាលវេលាម៉ោង០១និង៥០នាទីរសៀល នាថ្ងៃទី២៧ ខែមិថុនា ឆ្នាំ២០១៩ ស្ថិតនៅក្នុងវាលដីឡូមួយកន្លែង តាមបណ្តោយផ្លូវលំ ក្រុម១៥ ភូមិស្ពានខ្ពស់ សង្កាត់គីឡូូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។

ជនអត្តឃាតមានឈ្មោះមុីន យូសុខ អាយុ២២ឆ្នាំ ជាជនជាតិខ្មែរឥស្លាម មុខរបរកម្មករសំណង់ ស្នាក់នៅក្នុងដីឡូជិតកន្លែងកើតហេតុ។ រៀងរាល់ថ្ងៃជនរងគ្រោះបានទៅធ្វើជាកម្មករសំណង់ដល់ពេលបានលុយយកទៅទិញថ្នាំញៀនមកប្រើប្រាស់ជាប្រចាំរហូតដល់វង្វេងវង្វាន់ស្មារតី និងធ្លាប់ប៉ុនប៉ងដុតខ្លួនឯងម្តងរួចមកហើយ តែមិនបានសម្រេចដោយសាត្រូវបានបងប្អូននិងប្រជាពលរដ្ឋឃើញជួយទាន់ លុះរហូតមកដល់វេលាកើតហេតុខាងលើជនរងគ្រោះបានព្យាយាមដុតខ្លួនម្តងទៀតរហូតបានសម្រេច ទម្រាំបងប្អូនដឹងភ្លើងបានឆាបឆេះយ៉ាងសន្ធោសន្ធៅ ធ្វើអោយជនរងគ្រោះស្លាប់បាត់បង់ជីវិតបាដោយសារឥទ្ធិពលគ្រឿងញៀន។

ក្រោយកើតហេតុសមត្ថកិច្ចមូលដ្ឋានចុះមកយកខ្សែហ៊ុមពទ្ធ័ជុំវិញកន្លែងកើតហេតុ និងធ្វើការស្រាវជ្រាវរកមូលហេតុរួចសន្និដ្ឋានថា ជនរងគ្រោះពិតជាប្រើប្រាស់គ្រឿងញៀនហួសកំរឹតឈានទៅដុតខ្លួនឯងស្លាប់ពិតប្រាកដមែន ៕