ផ្អាកចរាចរឆ្លងកាត់ស្ពានបេឡេ ឆ្លងកាត់ទន្លេសាប រយៈពេល១៥ថ្ងៃ

ភ្នំពេញ៖នៅថ្ងៃទី២៨មិថុនា២០១៩នេះ រដ្ឋបាលរាជធានីភ្នំពេញ បានចេញសេចក្តីជូនដំណឹងស្តីពី ការផ្អាកជាបណ្តោះអាសន្ន ការធ្វើចរាចរឆ្លងកាត់ស្ពានដែកបេឡេ ឆ្លងកាត់ទន្លេសាប ស្ថិតនៅខណ្ឌប្ញស្សីកែវ និងខណ្ឌជ្រោយចង្វារ រាជធានីភ្នំពេញ រយៈពេល ១៥ថ្ងៃសិន ដោយសារត្រូវថែទាំ និងត្រួតលក្ខណៈបច្ចេកទេសសិន។

តាមគម្រោងអាជ្ញាធររាជធានី នឹងផ្អាកជាបណ្តោះអាសន្ននូវ ការធ្វើចរាចរឆ្លងកាត់ស្ពានដែកបេឡេ រយៈពេល១៥ថ្ងៃ គិតចាប់ពីថ្ងៃទី២៨ ខែមិថុនា ឆ្នាំ២០១៥តទៅ។

ក្នុងសេចក្តីជូនដំណឹងនេះ រដ្ឋបាលរាជធានីភ្នំពេញញ បានបញ្ជាក់ថា «ស្ពានដែកបេឡេតភ្ជាប់ពីផ្លូវជាតិលេខ៥ ស្ថិតនៅខណ្ឌឬស្សីកែវ នៅតំបន់អភិវឌ្ឍជ្រោយចង្វារ
ស្ថិតនៅខណ្ឌជ្រោយចង្វារ រាជធានីភ្នំពេញ ត្រូវបានដាក់ឲ្យដំណើរការអស់រយៈពេល ប្រមាណ០១ឆ្នាំមកហើយ។ ដើម្បីធានាបាននូវគុណភាព និងសុវត្ថិភាពជូនប្រជាពលរដ្ឋ ដែលជាអ្នកធ្វើដំណើរឆ្លងកាត់ស្ពានដែកបេឡេ ឱ្យស្របតាមបទដ្ឋានបច្ចេកទេសនោះ រដ្ឋបាលរាជធានីភ្នំពេញ នឹងថែទាំ និងត្រួតពិនិត្យលក្ខណៈបច្ចេកទេស របស់ស្ពានដែកបេឡេរួមមានគ្រឿងបង្គុំស្ពាន ផ្នែកខាងលើ និងផ្នែកសសរទម្រស្ពាន»។

ក្នុងអំឡុងពេលនោះ រដ្ឋបាលរាជធានីភ្នំពេញ នឹងផ្អាកជាបណ្តោះអាសន្ននូវ ការធ្វើចរាចរឆ្លងកាត់ស្ពានដែកបេឡេ រយៈពេល១៥ថ្ងៃ គិតចាប់ពីថ្ងៃទី២៨ ខែមិថុនា ឆ្នាំ២០១៥តទៅ។ ផុតរយៈពេលកំណត់ខាងលើ ស្ពានដែកបេឡេ នឹងដាក់ដំណើរការជាធម្មតាឡើងវិញ។
ដូច្នេះសូមប្រជាពលរដ្ឋទាំងអស់ មេត្តាយោគយល់អធ្យាស្រ័យ និងពង្វាងការធ្វើចរាចរណ៍ ដោយធ្វើដំណើរតាមស្ពានមិត្តភាពកម្ពុជា-ជប៉ុន ស្ពានជ្រោយចង្វារទី១, ស្ពានមិត្តភាពកម្ពុជា-ចិន (ស្ពានជ្រោយចង្វារទី២) និងស្ពានព្រែកព្នៅ ក្នុងរយៈពេលនៃការផ្អាកជាបណ្តោះអាសន្ន នូវការធ្វើចរាចរឆ្លងកាត់ស្ពានដែកបេឡេ៕