ការវិនិយោគ កាស៊ីណូ សណ្ឋាគារ ផ្ទះសំណាក់ ភោជនីយដ្ឋាន ព្រមទាំងមុខរបរផ្សេងៗ នៅខេត្តព្រះសីហនុ ភាគច្រើន គ្រប់គ្រង ដោយជនជាតិចិន ៩៥ភាគរយ
ខេត្តព្រះសីហនុ៖ លោកឧត្តមសេនីយ៍ទោ ជួន ណារិន្ទ បានអះអាងថា ស្ថានភាព នៅខេត្តព្រះសីហនុ ដោយមានការវិនិយោគច្រើន ពីជនបរទេស ជនជាតិចិន ធ្វើឲ្យខេត្តព្រះសីហនុ មានការរីកចម្រើន យ៉ាងឆាប់រហ័ស លើគ្រប់វិស័យ ដូចជា កាស៊ីណូ សណ្ឋាគារ ផ្ទះសំណាក់ ភោជនីយដ្ឋាន ព្រមទាំងមុខរបរផ្សេងៗ ជាច្រើនទៀត ភាគច្រើន គ្រប់គ្រង ដោយជនជាតិចិន ៩៥ភាគរយ។
លោកនាយឧត្តមសេនីយ៍ ថោង លីម អគ្គស្នងការរងនគរបាលជាតិ ជាប្រធានក្រុមការងារ ចុះពង្រឹងសន្តិសុខ សណ្តាប់ធ្នាប់ របៀបរៀបរយ សង្គម នៅខេត្តព្រះសីហនុ បានដឹកនាំ បើកកិច្ចប្រជុំបន្ទាន់មួយ ដើម្បីបន្តនិរន្តរភាពការងារ ពង្រឹងសន្តិសុខសណ្តាប់ធ្នាប់ រក្សារបៀបរៀបរយ ក្នុងខេត្តព្រះសីហនុ ឲ្យកាន់តែប្រសើរឡើង និងស្នងការនគរបាល៤ខេត្ត តាមតំបន់សមុទ្រ នៅព្រឹក ថ្ងៃទី១ ខែកក្កដា ឆ្នាំ២០១៩ នេះ នៅស្នងការដ្ឋាន នគរបាលខេត្តព្រះសីហនុ។
ក្នុងកិច្ចប្រជុំនេះ មានថ្នាក់ដឹកនាំ នគរបាលខេត្ត តាមតំបន់សមុទ្រ បានមកចូលរួមមាន ៖ លោកឧត្តមសេនីយ៍ទោ ជួន ណារិន្ទស្នងការនគរបាលខេត្តព្រះសីហនុ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត លោកឧត្តមសេនីយ៍ទោ សំ ឃិតវៀន ស្នងការនគរបាលខេត្តកោះកុង និង លោកឧត្តមសេនីយ៍ត្រី បែន តារា ស្នងការនគរបាលខេត្តកែប។
លោកឧត្តមសេនីយ៍ទោជួន ណារិន្ទ ស្នងការនគរបាលខេត្ត ព្រះសីហនុ បានរាយការណ៍ ជូនអង្គប្រជុំ អំពីសភាពការណ៍ ទូទៅសន្តិសុខសណ្តាប់ធ្នាប់ សាធារណៈ ក្នុងខេត្ត ជូនអង្គពិធីជ្រាបអំពី ៖ ស្ថានភាពទូទៅ នៅខេត្តព្រះសីហនុ ដោយមានការវិនិយោគច្រើន ពីជនបរទេស ជនជាតិចិន ធ្វើឲ្យខេត្តព្រះសីហនុ មានការរីកចម្រើន យ៉ាងឆាប់រហ័ស លើគ្រប់វិស័យ ដូចជា កាស៊ីណូ សណ្ឋាគារ ផ្ទះសំណាក់ ភោជនីយដ្ឋាន ព្រមទាំងមុខរបរផ្សេងៗ ជាច្រើនទៀត ភាគច្រើន គ្រប់គ្រង ដោយជនជាតិចិន ក្នុងនោះ៖ សណ្ឋាគារនិងផ្ទះសំណាក់ ចំនួន១៥៦កន្លែង គ្រប់គ្រង ដោយជនជាតិចិន ចំនួន១៥០កន្លែង។ កាស៊ីណូចំនួន ៦២កន្លែង វិនិយោគ ដោយជនបរទេស៤៨កន្លែង។ ក្លិបកម្សាន្ត ខារ៉ាអូខេ ៤១កន្លែង គ្រប់គ្រង ដោយជនជាតិចិន។ ហាងម៉ាស្សា ចំនួន៤៦ កន្លែង គ្រប់គ្រង ដោយជនជាតិចិន។
ភោជនីយដ្ឋាន ចំនួន៤៣៦ គ្រប់គ្រង ដោយជនជាតិចិន ៩៥ភាគរយ។
បទល្មើសព្រហ្មទណ្ឌ កើតឡើងច្រើន ជាងមុន តែកងកម្លាំង នគរបាលខេត្តព្រះសីហនុ បង្រ្កាប បានរហូតដល់៩៨ ភាគរយ។
ក្នុងកិច្ចប្រជុំនេះ លោកស្នងការនគរបាលខេត្តកំពត កែប និងខេត្តកោះកុង ក៏បានឡើងរាយការណ៍ ជាបន្តបន្ទាប់ អំពីសភាពការណ៍ទូទៅក្នុងខេត្ត របស់ខ្លួន ទទួលខុសត្រូវផងដែរ។
លោកនាយឧត្តមសេនីយ៍ ថោង លីម អគ្គស្នងការរងនគរបាលជាតិ បានឯកភាព លើរបាយការណ៍ លើកឡើង របស់លោកស្នងការទាំង៤ខេត្ត និងកោតសរសើរ ចំពោះកងកម្លាំង នគរបាលខេត្តព្រះសីហនុ ដែលបាន ខិតខំប្រឹងប្រែង បំពេញការងារថែរក្សា សន្តិសុខ សណ្តាប់ធ្នាប់ សាធារណៈ ទោះជាបទល្មើសព្រហ្មទណ្ឌ កើនឡើង ច្រើនពិតមែន តែយើង បង្ក្រាបបានរហូត ដល់៩៨ភាគរយ ដែលជាលទ្ធផល គួរឲ្យកោតសរសើរ៕
