មេដឹកនាំហុងកុងថា គ្មានគម្រោង បន្តការពិភាក្សា លើច្បាប់ធ្វើបត្យាប័នឡើយ ហើយច្បាប់នឹងអាចស្លាប់ នៅពេលអាណិត្តមេដឹកនាំបច្ចុប្បន្នផុតកំណត់
មេដឹកនាំហុងកុង អ្នកស្រី Carrie Lam នៅថ្ងៃអង្គារនេះ បានធ្វើការថ្កោលទោស ចំពោះការលុកលុយ ចូលរដ្ឋសភា ប្រកបដោយអំពើហឹង្សា។ ការថ្កោលទោសរបស់មេដឹកនាំហុងកុង ដែលគាំទ្រក្រុងប៉េកាំងនេះ កើតឡើង ក្រោយពេលក្រុមអ្នកតវ៉ារាប់ពាន់នាក់ បានធ្វើការរុករើកកាយក្នុងរដ្ឋសភា។
នៅក្នុងសន្និសីទសារព័ត៌មាន អ្នកស្រី Carrie Lam បានហៅព្រឹត្តិការណ៍នោះថា ”ជារឿងឈឺចាប់ និងតក់ស្លុត” ហើយអ្នកស្រី សង្ឃឹមថា ស្ថានភាពនឹងត្រឡប់ ទៅកាន់រកភាពដើមវិញ ក្នុងពេលឆាប់ៗ។ អ្នកស្រី ក៏បានទទួលស្គាល់ផងដែរថា មានមនុស្សរាប់ពាន់នាក់ បានធ្វើការហែរក្បួន ដោយសន្តិភាពនៅក្នុងទីក្រុង មុនពេលមានភាពចលាចលកើតឡើង។
អ្នកស្រីថ្លែងថា ”វាមិនមែនជាការពិតទេ ដែលគេនិយាយថា រដ្ឋាភិបាល មិនបានធ្វើការឆ្លើយតប ទៅនឹងការទាមទាររបស់អ្នកតវ៉ា។ ពួកយើងមិនអាចធ្វើតាមគ្រប់ការទាមទារឡើយ ដោយសារហេតុផលជាច្រើន”។
អ្នកស្រី ក៏បានបញ្ជាក់សារឡើងវិញថា ច្បាប់ធ្វើបត្យាប័ន ត្រូវបានព្យួរ ដោយគ្មានពេលកំណត់ និងមិនមានគម្រោង បន្តការពិភាក្សាទៀតឡើយ។
អ្នកស្រីបន្ថែមថា ”ច្បាប់ធ្វើបត្យាប័ន នឹងត្រូវផុតកំណត់ ឬច្បាប់នោះ នឹងត្រូវស្លាប់នៅក្នុងខែកក្កដា ឆ្នាំ២០២០ នៅពេលអាណិត្ត របស់មេដឹកនាំបច្ចុប្បន្នផុតកំណត់។ នេះគឺជាការឆ្លើយតបដ៏វិជ្ជមាន ទៅនឹងការទាមទារ”។ជុំវិញការទាមទារ ឲ្យមានការលើកលែងទោស ទៅដល់អ្នកពាក់ព័ន្ធទាំងអស់ ក្នុងការតវ៉ា អ្នកស្រី ថ្លែងថា “ទង្វើនឹងមិនស្រប តាមនីតិរដ្ឋនោះទេ”។
សូមបញ្ជាក់ថា ទីក្រុងហុងកុង កំពុងត្រូវញាំញី ដោយបាតុកម្មអស់រយៈពេលជាច្រើនសប្តាហ៍មកហើយ ដោយសារតែសេចក្តីស្នើច្បាប់ ធ្វើបត្យាប័ន របស់រដ្ឋាភិបាល ខណៈដែលក្រុមបាតុកររាប់សែននាក់ បានទាមទារ ឲ្យរដ្ឋភិបាលបោះបង់វាចោល និងបានស្នើឲ្យមេដឹកនាំក្រុងហុងកុង ចុះចេញពីតំណែង។
សេចក្តីព្រាងច្បាប់ធ្វើបត្យាប័ននោះ អនុញ្ញាតឲ្យមានការបញ្ជូនជនសង្ស័យ ពីទីក្រុងហុងកុង ដើម្បីយកទៅកាត់ទោស ទៅទីក្រុងប៉េកាំងបាន។
ទីក្រុងហុងកុង ស្ថិតក្រោមអាណានិគមន៍ របស់អង់គ្លេស រយៈពេល ១៥៦ឆ្នាំ ពីឆ្នាំ ១៨៤១ ដល់ឆ្នាំ ១៩៩៧។ ក្នុងឆ្នាំ ១៩៩៧ ទីក្រុងហុងកុង ត្រូវបានប្រគល់ត្រឡប់ឲ្យចិនវិញ ក្រោមកិច្ចព្រមព្រៀង “ប្រទេសមួយប្រព័ន្ធពីរ”៕
