បុរសម្នាក់ ប្រើរថយន្តដោះស្រាយកំហឹង បើកបំបុកយុវជនម្នាក់ នៅក្រុងបាត់ដំបង ត្រូវបានឃាត់ខ្លួន បញ្ជូនទៅសាលាដំបូងខេត្តបាត់ដំបង
បាត់ដំបង៖ ស្នងការដ្ឋាននគរបាលខេត្តបាត់ដំបង នៅថ្ងៃទី៨ខែកក្កដានេះថា ពីយប់ថ្ងៃទី ៧ ខែ កក្កដា ឆ្នាំ ២០១៩ ដោយអនុវត្តនូវបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ជនសង័្សយម្នាក់រួមនឹងរថយន្តមួយគ្រឿងផង ត្រូវបានសមត្ថកិច្ចនគរបាល នៃស្នងការដ្ឋាននគរបាលខេត្តបាត់ដំបង ឃាត់ខ្លួននិងឃាត់ទុកហើយយកំពុងរៀបចំសំណុំរឿង បញ្ជូនទៅសាលាដំបូងខេត្តបាត់ដំបង ចាត់ការតាមផ្លូវច្បាប់។
នៅក្នុងហេតុការដ៏រន្ធត់មួយ កាលពីវេលាម៉ោង ២២ និង១០នាទីអធ្រាត្រ ថ្ងៃទី ៧ ខែ កក្កដា ឆ្នាំ ២០១៩ នៅលើដងផ្លូវលេខ០១ ភូមិកំពង់ក្របី សង្កាត់ស្វាយប៉ោ ក្រុងបាត់ដំបង យុវជនម្នាក់បានប្រើប្រាស់រថយន្តទំនើបមួយគ្រឿងដេញបំបុកយុវជនម្នាក់ទៀត ដែលកំពុងជិះម៉ូតូបណ្តាលឲ្យរងរបួសធ្ងន់ធ្ងរ ដោយសាររឿងទំនាស់ ។ លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ នៃស្នងការដ្ឋាននគរបាលខេត្តបាត់ដំបង បានឲ្យដឹងថា នៅវេលាម៉ោងដូចខាងលើយុវជនឈ្មោះ តាំង ហ៊ូយឆាយ ភេទប្រុស ភេទប្រុស អាយុ ២៣ឆ្នាំ មានទីលំនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបងបានបើករថយន្តមួយគ្រឿង ដេញបុកអ្នកជិះម៉ូតូម្នាក់រហូត បណ្តាលឲ្យរងរបួសធ្ងន់ធ្ងរត្រូវបាននាំយកទៅសង្រ្គោះនៅមន្ទីរពេទ្យបង្អែកខេត្តបាត់ដំបង ។ យុវជនរងគ្រោះឈ្មោះ ឡៅ គឹមលាង ភេទប្រុស អាយុ១៥ឆ្នាំមានទីលំនៅភូមិចំការសំរោង០១ សង្កាត់ចំការសំរោង ក្រុងបាត់ដំបង ខេត្តបាត់ដំបង ។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបង បានបញ្ជាក់ថា តាមការសាកសួរបំភ្លឺជំហ៊ានដំបូងឈ្មោះ តាំង ហ៊ូយឆាយ បានលើកហេតុផងថា នៅយប់កើតហេតុមានក្រុមអ្នកជិះម៉ូតូមួយក្រុម បានប្រើប្រាស់ដុំថ្មគប់មកលើរថយន្តរបស់ខ្លួន ដែលកំពុងបើកបរ ហើយភ្លាមៗនេះ ខ្លួនបានបើករថយន្តនេះដេញតាម បំបុកក្រុមអ្នកជិះម៉ូតូទាំងនោះ ជាការសងសឹកវិញ ។ លោកអធិការនគរបាលក្រុងបាត់ដំបង បានបន្ថែមថា បើទោះបីជាការបំភ្លឺបញ្ជាក់ពីម្ចាស់រថយន្តយ៉ាងនេះក្តី តែជនរងគ្រោះឈ្មោះ ឡៅ គឹមលាង បានអះអាងថា ខ្លួនមិនមែនជាអ្នកបង្កទំនាស់ជាមួយម្ចាស់រថយន្តខាងលើនោះទេ។
លោកស្នងការរងជេត វណ្ណនី បានបញ្ជាក់ថា ករណីនេះ តាមបទបញ្ជារបស់លោកស្នងការ អ៊ុច សុខុន ឲ្យកម្លាំងជំនាញរៀបចំសំណុំរឿង បញ្ជូនទៅសាលាដំបូងខេត្តបាត់ដំបង ចាត់ការតាមផ្លូវច្បាប់៕
