ចាប់ស្រ្តីម្នាក់ នៅជនបទ រួមជាមួយនិងថ្នាំញៀន ចំនួន ២០០ គ្រាប់ និងម៉ាទឹកកក ៧ កញ្ចប់

ជនសង្ស័យម្នាក់ រួមជាមួយនិងថ្នាំញៀន ចំនួន ២០០ គ្រាប់ និងម៉ាទឹកកក ៧ កញ្ចប់ ត្រូវបានកម្លាំងប៉ុស្តិ៍នគរបាលរដ្ឋបាលអូរស្មាច់ ធ្វើការបង្ក្រាបបាន រួចបញ្ជូនតាមនីតិវិធី។

ថ្ងៃអង្គារ ១៥កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែកក្កដា ឆ្នាំ២០១៩ នៅវេលាម៉ោង ០៨៖៥៥នាទី ដោយបានទទួលពត៌មានពីភ្នាក់ងារសម្ងាត់ថា៖ ផ្ទះឈ្មោះ ញឹម ងិះ ភេទស្រី អាយុ ៣៩ឆ្នាំ (មុខសញ្ញាចេញពីពន្ធនាគារ ករណីចែកចាយសារធាតុញៀនខុសច្បាប់) នៅភូមិអភិវឌ្ឍន៍ សង្កាត់អូរស្មាច់ ក្រុងសំរោង សង្ស័យមានលាក់ទុកសារធាតុញៀន ។

បន្ទាប់មក កម្លាំងប៉ុស្តិ៍នគរបាលរដ្ឋបាលអូរស្មាច់ ចំនួន ០៤នាក់ ដឹកនាំដោយ លោកអនុសេនីយ៍ឯក ជ័យ វាសនា នាយប៉ុស្តិ៍ បានចុះ ធ្វើការស៊ើបអង្កេត ត្រួតពិនិត្យផ្ទះខាងលើ ។ ជាលទ្ធផល រកឃើញសារធាតុញៀន ៖ ប្រភេទមេតំហ្វេតាមីនគ្រាប់ ពណ៌ផ្កាឈូក ចំនួន ២០០ គ្រាប់ ប្រភេទមេតំហ្វេតាមីនICE (ម៉ាទឹកកក) ចំនួន ៦ កញ្ចប់ធំ និង ១ កញ្ចប់តូច ព្រមទាំងសម្ភារៈវិចខ្ចប់គ្រឿងញៀនមួយចំនួនទៀត ។

បច្ចុប្បន្ន ជនសង្ស័យ រួមនិងវត្ថុតាងខាងលើត្រូវបាននាំមកកាន់អធិការដ្ឋាននគរបាលក្រុង ដើម្បីសាកសួរនិងក៏សាងសំណុំរឿងតាមនិតិវិធី៕