ខេវិន -តឿន- តាក់ និង ភឿតនរណានៅនរណាទៅ ?
ភ្នំពេញ:ព្រឹត្តិការណ៍TV5 Boxing Knock-Out Serir by K-Cementសម្រាប់យប់ថ្ងៃទី២០កក្កដានេះក្នុង ចំណោមអ្នកប្រដាល់៤រូបមិនដឹងថា២រូបណានៅហើយ២រូបណាខ្ទាតចេញនោះឡើយ ។
សូត្រ ខេវិនរបស់ក្លិបបក្សីស្លាបដែកត្រូវជួបជាមួយអ្នកប្រដាល់ចិត្តធំថន ភឿតរបស់ក្លិបឃ្លាំងមឿងកីឡា ។
ខេវិនដែលមានកំពស់ល្អនោះគេចូលចិត្តប្រើកែងនិងជង្គង់ដើម្បីផ្ដួលគូប្រកួតតែមួយរយៈនេះខេវិនទំនងជាខ្ជីខ្ជារក្នុងការ ហ្វឹកហាត់ហើយមើលទៅបានជាប៉ុន្មានប្រកួតចុងក្រោយនេះគេវ៉ៃអន់និងភាគច្រើនជួបបរាជ័យ ។ សូមបញ្ជាក់ថាអ្នកប្រដាល់រូបនេះចិត្តតូចណាស់បើគេវ៉ៃឲ្យឈឺសាច់បន្តិចនោះ ឬវ៉ៃគេមិនចូល ឬចូលដែរតែគេមិនញញើតខេវិនចាប់ផ្ដើមញញើតគូប្រកួតហើយ ។
ថន ភឿតវិញគេជាអ្នកប្រដាល់ដែលមានចិត្តធំនិងវ៉ៃចូលចិត្តប្ដូរណាស់ ។បើវ៉ៃគូប្រកួតមិនចូលទេនោះទោះបីមួយចានទឹកមួយចានគោកក៏គេហ៊ានប្ដូរដែរ ។ តែជួបជាមួយខេវិនទំនងជាមិនស្រួលលេងឡើយព្រោះអ្នកប្រដាល់ទាំង២រូបនេះមានកំពស់ខុសគ្នាខ្លាំងណាស់ ។ ខេវិនខ្ពស់ ឯ ថន ភឿតទាបជាងច្រើន ។នរណាកក់កៅអីសម្រាប់ជុំទី២ ហើយនរណាបាយៗមុនគេ ។
ប្រកួតក្នុងព្រឹត្តិការណ៍នេះដែរលី តឿនក្លិបម្កុដរាជសីហ៍ប្រកួតជាមួយអ្នកប្រដាល់តាំង តាក់ដែលស្កាត់មកពី ក្លិបរស្មីភូមិគាបខេត្តបន្ទាយមានជ័យ ។
អ្នកប្រដាល់ទាំង២រូបនេះមានកំពស់ និងរាងដូចប៉ុនគ្នាល្អលេង ។លី តឿនបានតែកណ្ដាប់ដៃប៉ុណ្ណោះហើយវ៉ៃចេញមិនសូវច្បាស់ទៀតផង តែបើចំគោលដៅវិញគូប្រកួតលំបាកនឹងទ្រាំទ្រណាស់ ។ចំពោះស្នៀតកែង ទាត់ ជង្គង់គេវ៉ៃមិនសូវច្បាស់ឡើយ ។
តាំង តាក់ជាអ្នកប្រដាល់វ័យក្មេងគេមានកលល្បិចវ៉ៃល្អ ។តែអ្នកប្រដាល់រូបនេះភាពអំណត់របស់គេមិនសូវ ល្អគឺបើគូប្រកួតវ៉ៃឈឺបន្តិចគេសន្លប់តែម្ដងតែការប្រកួតភាគច្រើនគេធ្វើបានល្អ ។ អ្នកប្រដាល់ទាំង២រូបនេះពុំធ្លាប់ជួបប្រកួតគ្នាពីមុនមកទេ ។នរណាខ្ទាតចេញនរណាកក់កៅអីសម្រាប់ជុំទី២ ?
ចំពោះការប្រកួតជាមិត្តភាពជាមួយអ្នកប្រដាល់ថៃវិញនោះជើងខ្លាំងឡៅ ចិត្រាក្លិបទ័ពឆ័ត្រយោង៩១១ ជួបជាមួយផេត ផ្លាយង៉ាម(Phat Pklayngam)ដោយប្រកួតគ្នាក្នុងប្រភេទទម្ងន់៦០គីឡូក្រាម ។
អ្នកប្រដាល់ថៃរូបនេះទើបតែឆ្លងដែនមកប្រកួតនៅស្រុកខ្មែរជាលើកដំបូងនេះទេ ។ លោកថៃ អ៊ូដែលជាអ្នកនាំអ្នកប្រដាល់ថៃរូបនេះមកបានឲ្យដឹងថាផេត ផ្លាយង៉ាមមិនស្រួលបង្ក្រាបឡើយតែជួបជាមួយឡៅ ចិត្រាមិនដឹងជា
លទ្ធផលយ៉ាងណានោះទេ ។
