អនុវត្តអភិក្រមទី 5 គឺចាប់មន្ត្រី 3 នាក់ នៅខេត្តពោធិ៍សាត់
ភ្នំពេញ៖ សម្ដេចតេជោ សែន ដាក់បទបញ្ជាឲ្យអនុវត្តន៍អភិក្រមទី៥ តែត្រូវអនុវត្តន៍ដោយគ្មានការលើកលែង ហើយចាប់ពីពេលនេះតទៅ អង្គភាពប្រឆាំងអំពើពុករលួយ (ACU) នឹងចុះចាប់ខ្លួនមន្រ្តីពុករលួយភ្លាមៗតែម្ដង។ សម្តេចតេជោហ៊ុន សែន បានបញ្ជាក់យ៉ាងខ្លីថា ឯងខំធ្វើល្អចង់ងាប់ ពួកវាខំបំផ្លាញ។
សម្ដេចតេជោហ៊ុន សែន បានថ្លែងក្នុងពិធីចុះពិនិត្យការដ្ឋាន សាងសង់ពហុកីឡដ្ឋានមរតកតេជោ នៅព្រឹកថ្ងៃទី 29 ខែកក្កដា ឆ្នាំ 2019 នេះថា “ប៉ុន្មានថ្ងៃនេះ ខ្ញុំត្រូវធ្វើការមួយចំនួន ទាក់ទងនឹងមន្ត្រី ហើយក៏ត្រូវទាក់ទងនិងអភិក្រមទី 5 គឺវះកាត់ផងដែរ ។ អត់មានតទៅទៀតទេ ពីថ្ងៃនេះទៅ គឺប្រាប់ឲ្យហើយ គឺអង្គភាពប្រឆាំងអំពើពុករលួយ ចាប់ត្រង់ៗតែម្ដង ដោយមិនចាំបាច់តាមខ្សែរ៉ឺលេ គឺអាហ្នឹងបោកឆៅ។
សម្ដេចបានថ្លែងថា ហើយរឿងចាប់មន្រ្តី ៣ នាក់ នៅខេត្តពោធិ៍សាត់ គឺត្រូវកសាងរោងចក្រ ខ្ញុំគឺជាអ្នកប្រកាសការកសាងរោងចក្រនេះ នៅកន្លែងហ្នឹង ដល់ពេលគេសុំច្បាប់សាងសង់ គឺវាទារលុយគេ ពីដំបូងត្រឹមតែ ៥ ម៉ឺនដុល្លារទេ វាយឺតការអាហ្នឹង ដល់ក្រោយមក ខ្ញុំបានធ្វើការជាមួយ អង្គភាពប្រឆាំងអំពើពុករលួយ លោកឱម យិនទៀង ដោយធ្វើការស្រាវជ្រាវអាហ្នឹងបន្តិចមើល គេឲ្យមន្ត្រីចូលទៅធ្វើក្លែងបន្លំ ធ្វើជាម្ចាស់ក្រុមហ៊ុន អានោះវាឡើងថ្លៃមួយទ្វេជាពីរ ពី៥ ម៉ឺនដល់ ១០ ម៉ឺនដុល្លារ ហើយទារកក់ 5000 ដុល្លារមុន ហើយខាងអង្គភាពប្រឆាំងអំពើពុករលួយ ក៏ព្រមកក់ 5000ដុល្លារ ស្អែកឡើងក៏យក 45000ដុល្លារទៀត យកទៅកក់ឱ្យគ្រប់ 50 ភាគរយ តាមការទាមទាររបស់ពួកគេ អ៊ីចឹងស្មើនឹង ៥ ម៉ឺនដុល្លារ ។ ពេលល្ងាចកក់ 5000ដុល្លារ ថ្ងៃទី2 ព្រឹកឡើងកក់ 45000ដុល្លារ ដើម្បីឲ្យ គ្រប់ 50000ដុល្លារ។ កក់រួចហើយយកមកបណ្ដោយ។ ថ្ងៃក្រោយឲ្យរាង។ អភិក្រមទី៥ គឺវះកាត់ ត្រូវបានអនុវត្តន៍ គ្មានការលើកលែង បើមិនអញ្ចឹងគឺខូច។ ហ្អែងរកបំផ្លាញជាតិ បំផ្លាញរដ្ឋបាលរបស់ហ៊ុនសែន។ ហើយកុំត្រឹមតែដកតំណែង គឺទ្រព្យសម្បត្តិរបស់ហ្អែងទាំងប៉ុន្មាន មើលអាហ្នឹងថែមទៀត តាមមើលឲ្យដល់ ។
ចំណែកប្រតិបត្តិការទ្រង់ទ្រាយធំ នៅឯមណ្ឌលគិរី និងកន្លែងមួយចំនួនទៀត លើបញ្ហាព្រៃឈើ ត្រូវធ្វើលើកិច្ចការងារហ្នឹង ។ ឯងខំប្រឹងចង់ងាប់ វាខំប្រឹងបំផ្លាញ៕
